আজি লাচিত বৰফুকনৰ ৪০২ সংখ্যক জন্মজয়ন্তী। ৰাজ্যজুৰি স্মৰণ বীৰ পুৰুষজনৰ শৌৰ্য-বীৰ্য। ১৬২২ চনৰ ২৪ নৱেম্বৰ তাৰিখে আহোম ৰাজধানী গড়গাঁৱত জন্ম হৈছিল লাচিত বৰফুকনৰ। তেওঁৰ পিতৃৰ নাম আছিল ম’-মাই তামূলী ফুকেলুং। জন্মসূত্ৰে তেওঁৰ নাম লা-চিত৷ (Lachit Diwas 2024)
ৰাজ্যৰ বিভিন্ন প্ৰান্তত আজি লাচিত দিৱসৰ বৰ্ণাঢ্য কাৰ্যসূচী আয়োজন কৰা হৈছে। অসমীয়া জাতিৰ বাবে “লাচিত বৰফুকন”এটা কেৱল চৰিত্ৰই নহয়। প্ৰতিজন স্বাভিমানী অসমীয়াৰ পৰিচয়, সাহস আৰু গৌৰৱ।(Lachit Borphukan)
মুখ্যমন্ত্ৰী ড°হিমন্ত বিশ্ব শৰ্মাই আজি লাচিত দিৱসৰ মহানক্ষণত তেখেতলৈ সন্মান হিচাপে ফে’চবুক, টুইটাৰ বা ৱাটছএপত বীৰ লাচিতৰ ফটো প্ৰফাইল ছবি হিচাপে ৰাখিবলৈ শনিবাৰে ফে’চবুক লাইভযোগে অসমবাসীৰ লৈ আহ্বান জনায়৷(himanta biswa sarma)
আনহাতে মুখ্যমন্ত্ৰী হিমন্ত বিশ্ব শৰ্মাইও নিজৰ সামাজিক মাধ্যমৰ একাউণ্টৰ প্ৰফাইল ফটো হিচাপে ৰাখিলে বীৰ লাচিতৰ ফটো। ফটো ৰাখি মুখ্যমন্ত্ৰীগৰাকীয়ে লিখিলে –
“লাচিত বৰফুকন : সশ্ৰদ্ধ প্ৰণাম 
লাচিত বৰফুকনৰ বীৰত্ব আৰু শৌৰ্য গাথাই যুগে যুগে অসম তথা ভাৰতবাসীক আলোড়িত কৰি ৰাখিব৷ মহান আহোম সেনাপতিগৰাকীৰ সাহস, বীৰত্ব আৰু ত্যাগ তথা কৰ্মৰাজিৰ প্ৰচাৰ আৰু প্ৰসাৰৰ বাবে আমাৰ চৰকাৰৰ দ্বাৰা ইতিমধ্যে বিভিন্ন পদক্ষেপ গ্ৰহণ কৰা হৈছে৷ আমাৰ অসমৰ অদম্য সাহস, স্বাভিমান, শৌৰ্য আদিক প্ৰতিনিধিত্ব কৰে লাচিত বৰফুকনে৷ আজি অসম তথা ভাৰত বুৰঞ্জীৰ এই ঐতিহাসিক চৰিত্ৰটিক ৪০২সংখ্যক জয়ন্তীত হৃদয়ৰ গভীৰ কোণৰ পৰা শ্ৰদ্ধাঞ্জলি যাচিলোঁ৷ আটাইলৈ অনুৰোধ, মহান অসমীয়াগৰাকীৰ আজিৰ জয়ন্তীৰ দিনটো প্ৰতিজনে উদযাপন কৰি তেখেতৰ মহান ত্যাগক পুনৰবাৰ ৰোমন্থন কৰক৷”