ৰাভা হাছং স্বায়ত্ত শাসিত পৰিষদৰ 19 নং দ’দান পৰিষদীয় সমষ্টিৰ অন্তর্গত মালাধৰা আৰু ৰংছাইত 25 এপ্ৰিল তাৰিখে একেদিনাই পৰিষদৰ বিত্তীয় অনুদানেৰে নির্মিত আৰু নির্মান হ’বলগীয়া তিনি খনকৈ আঁচনিৰ শুভাৰম্ভণিল কার্য ৰুপায়ন কৰে ৰাভা হাছঙৰ কার্যবাহী সদস্যা জ্যোতিকা ৰাভাই ।
পুৱা দহ বজাত পৰিষদৰ 2019 – 20 বিত্তীয় বর্ষৰ আৰ্থিক অনুদানেৰে নির্মিত মালাধৰা ৰাজহুৱা খেলপথাৰ প্ৰাঙ্গনত মালাধৰা বাৰে-বৰণীয়া সাংস্কৃতিক সংঘৰ সাংস্কৃতিক মঞ্চৰ গৃহ উন্মোচন কৰে কার্যবাহী সদস্যা জ্যোতিকা ৰাভাই । সাংস্কৃতিক মঞ্চৰ গৃহ উন্মোচনী অনুষ্ঠানত মালাধৰা আঞ্চলিক ৰাভা ছাত্ৰ সন্থাৰ লগতে অঞ্চলৰ বিশিষ্ট ব্যক্তিসকল উপস্থিত থাকে ।ইয়াৰ পিছতে দিনৰ এঘাৰ বজাত কার্যবাহী সদস্যাগৰাকীয়ে ৰাভা হাছং স্বায়ত্ত শাসিত পৰিষদৰ 2020 -21 বিত্তীয়বর্ষৰ মুখ্য কার্যবাহী সদস্যৰ বিশেষ পুঁজিৰ 21 লাখ টকা ব্যয় সাপেক্ষে নির্মাণ হ’বলগীয়া ৰংছাই – বায়দাস্থিত ঐতিহ্যমণ্ডিত দ’দান মন্দিৰৰ নাচঘৰ নির্মানৰ আধাৰশিলা স্থাপন কৰে ।
উক্ত অনুষ্ঠানত দ’দান থান পৰিচালনা কমিটিৰ সভাপতি সম্পাদক ক্ৰমে নিষ্টোমোহন ৰাভা আৰু শিৱপ্ৰসাদ ৰাভাৰ লগতে বিশিষ্ট সাহিত্যিক চাৰুমোহন ৰাভা ,দুর্যোধন ৰাভা প্ৰমুখ্যে বিশিষ্ট ব্যক্তিসকল উপস্থিত থাকে । তাৰ পিছতে কার্যবাহী সদস্যা গৰাকীয়ে ৰংছাই বজাৰত পৰিষদৰ মুখ্য কার্যবাহী সদস্যৰ বিশেষ পুঁজিৰ 15 লাখ টকা ব্যয় সাপেক্ষে মেছপাৰা মধ্যাঞ্চল ৰাভা সমাজৰ কার্যালয় গৃহ নির্মানৰ আধাৰশিলা স্থাপন কৰে ।
উল্লেখ্য যে ৰাভা হাছং স্বায়ত্ত শাসিত পৰিষদৰ মুখ্য কার্যবাহী সদস্য টংকেশ্বৰ ৰাভাৰ সৱল নেতৃত্বত পৰিষদীয় এলেকাত বিশেষকৈ দ’দান আৰু জয়ৰামকুছি সমষ্টিত যি সামগ্ৰীক উন্নয়নৰ ধাৰা অব্যাহত হৈছে তাৰ বাবে কার্যবাহী সদস্যা জ্যোতিকা ৰাভাই ৰাভা হাছঙৰ মুখ্য কার্যবাহী সদস্য টংকেশ্বৰ ৰাভা লৈ বিশেষ কৃতজ্ঞতা জ্ঞাপন কৰে ।