মুকালমুৱা
কৰ’ণা ভাইৰাছৰ সংক্ৰমণৰ প্ৰতি লক্ষ্য ৰাখি সমগ্ৰ দেশতে চৰকাৰে ঘোষণা কৰা দীঘলীয়া লকডাউনৰ বাবে বহু লোকৰ জীৱন নিৰ্বাহৰ প্ৰক্ৰিয়া যেন সলনি হৈ গৈছে। নিজৰ দৈনন্দিন কৰ্মৰাজী বন্ধ হৈ পৰাৰ ফলত নিজৰ লগতে পৰিয়ালৰ খৰছ উলিওৱাৰ বাবে বহু লোকে নিজৰ জীৱিকা পৰ্য্যন্ত সলনি কৰিবলগীয়া হৈছে। অসমৰ এটি অন্যতম উদ্যোগ ভ্ৰাম্যমান থিয়েটাৰৰ ও বহু সৰু বৰ কলা কুশলী এতিয়া দৈনন্দিন জীৱন প্ৰক্ৰিয়া স্তব্ধ হৈ পৰাৰ ফলত অইন জীৱিকাত ব্যস্ত হৈ পৰিবলৈ যেন এক প্ৰকাৰ বাধ্য হৈ পৰিছে । ভ্ৰাম্যমাণ থিয়েটাৰ এখনত আমি দেখি থকা অভিনেতা অভিনেত্ৰী সকলৰ উপৰিও গাড়ীচালকৰ পৰা ধোবা গৰাকীলৈ , মেকআপ শিল্পী সকলৰ পৰা গায়ক গায়িকা , বৈদ্যযন্ত্ৰ চালক সকললৈ , মঞ্চ আৰু পেণ্ডেল সাজি উলিওৱা শিল্পী গৰাকীৰ পৰা চাহ ভাত বনাই দিয়া লৰা জনলৈ বহু লোকৰ জীৱন জীৱিকা জড়িত হৈ থাকে। লক ডাউনৰ বাবে বহু এনেকুৱা কলা কুশলী এতিয়া ঘূৰি আহিছে নিজৰ আপোন গাওঁখনলৈ । মুকালমুৱাৰ টেঘেৰিয়াটাৰী নিবাসী মনোজ মেধিও লকডাউনৰ ফলত ভ্ৰাম্যমাণ থিয়েটাৰ বন্ধ হৈ থকা বাবে উভতি আহিছিল নিজৰ ঘৰখনলৈ। বিগত ১৩ বছৰ ধৰি বিভিন্ন সৰু বৰ ভ্ৰাম্যমাণ গোষ্ঠীৰ লগত ৰান্ধনী হিচাবে জড়িত মনোজ মেধি (বয়স প্ৰায় ৩৯ বছৰ) ভ্ৰাম্যমাণ গোষ্ঠী সমূহৰ মাজত লম্বু বুলিয়ে পৰিচিত। প্ৰায় ৬ ফুট ১০ ইঞ্চি উচ্চতাৰ এই সহজ সৰল যুৱকজনে ঘৰৰ আৰ্থিক অৱস্থা বেয়া হোৱা হেতুকেই মুকালমুৱা ৰঘুনাথ চৌধাৰী উচ্চতৰ মাধ্যমিক বিদ্যালয়ত নৱম শ্ৰেণীত শিক্ষা সমাপ্ত কৰি ঘৰৰ পৰা ওলাই গৈছিল জীৱিকাৰ সন্ধানত। গুৱাহাটীৰ বিভিন্ন হোটেলত কেইবছৰমান কাম কৰি পিছত তেওঁ ৰাজশ্ৰী থিয়েটাৰত ৪ বছৰ , বৃন্দাবন থিয়েটাৰত ৩ বছৰ , ইতিহাস থিয়েটাৰত ১ বছৰ , বৰদৈচিলা থিয়েটাৰত ১ বছৰ , সূৰ্য্য থিয়েটাৰত ১ বছৰ আৰু বিভিন্ন সৰু বৰ থিয়েটাৰ গোষ্ঠীৰ লগত বিগত প্ৰায় ১৩ বছৰ জড়িত হৈ আছিল। নিজৰ সুস্বাদু ব্যঞ্জনেৰে বহু অভিনেতা অভিনেত্ৰীৰ অৱসাদ দূৰ কৰি প্ৰশংসা বুটলিবলৈ সক্ষম হোৱা লম্বু ভ্ৰাম্যমাণ উদ্যোগ বন্ধ হৈ থকা বাবে এতিয়া নিজ গাওঁৰ পদপথত এখন সৰু চাহৰ হোটেল দি জীৱিকা চলাই আছে। পথাৰত খেতি কৰিবলৈ খেতি মাটিও নোহোৱা মনোজৰ বাবে হৈ পৰিছিল লকডাউন এক অভিশাপ স্বৰূপ । ঘৰত থকা নিজৰ ৭০ বছৰীয়া মাতৃ আৰু পত্নীৰ লগতে ঘৰখনৰ উপাৰ্জনৰ একমাত্ৰ ভৰষা হল মনোজ। মনোজ ওৰফে লম্বুৰ দৰে বহু লোক এতিয়া এই উদ্যোগতো বন্ধ হোৱা বাবে নিজৰ জীৱন জীৱিকাৰ বাবে হাহাকাৰ কৰিব লগীয়া হৈছে। এতিয়া ৰাজ্যৰ চাৰিওপিনে থকা এনেকুৱা কলা-কুশলী বোৰৰ বাবে চৰকাৰৰ তৰফৰ পৰাও কিবা সহায় সহযোগ আগবঢ়োৱাৰ দাবী উত্থাপন কৰি আহিছে ৰাইজে । অনাগত দিনত অসমৰ সংস্কৃতি ও সুনাম বিশ্ব দৰবাৰত চিনাকি কৰাই দিবলৈ সক্ষম হোৱা এই উদ্যোগতোৰ কলা-কুশলীৰ প্ৰতি চৰকাৰে কিবা ব্যৱস্থা লব বুলিও জানিব পৰা গৈছে যদিও এই ক্ষেত্ৰত কৃষি বিভাগৰ আঁচনিৰ দৰে বিভাগীয় সুৰুঙাৰ মেৰপেছত পৰি প্ৰকৃত হিতাধিকাৰী যাতে বঞ্চিত নহয় তাৰ বাবেও ৰাইজে দাবী জনাইছে। ইফালে মুকালমুৱাৰ এই যুৱক গৰাকীক নগদ তিনি হেজাৰ টকাৰে সহায় আগবঢ়ায় বৰতলা গাঁৱৰ পঞ্চায়ত প্ৰতিনিধি প্ৰীতম গোস্বামীয়ে।