মহামাৰী ক’ৰোনা ভাইৰাছৰ বিৰুদ্ধে যুঁজৰ মুখ্য অস্ত্ৰ হিচাপে দেশত বিগত দুমাহে চলি আছে লকডাউন৷ ৩১ মে’ পৰ্যন্ত দেশত চতুৰ্থ পৰ্যায়ৰ লকডাউন৷ মাৰাত্মক ক’ভিড-১৯ৰ বিৰুদ্ধে যুঁজত এই পৰ্যন্ত লকডাউনৰ পৰিকল্পনা কিমান সফল হৈছে, মাজে সময়ে এই প্ৰশ্নও উত্থাপন নোহোৱা নহয়৷ শেহতীয়া তথ্য অনুসৰি লকডাউনে দেশত ক’ৰোনাৰ সংক্ৰমণ ব্যাপক হাৰত ৰোধ কৰিবলৈ সক্ষম হৈছে৷ শুকুৰবাৰে এক তথ্যভিত্তিক প্ৰতিবেদনত লকডাউনে দেশত ক’ভিড-১৯ৰ ১৪-২৯ লাখ ঘটনা ৰোধ কৰা লগতে ৩৭০০০-৭৮০০০ লোকৰ প্ৰাণ ৰক্ষা কৰিছে৷ প্ৰথম আৰু দ্বিতীয় পৰ্যায়ৰ লকডাউনৰ বিশ্লেষণ দাঙি ধৰি নীতি আয়োগ (স্বাস্থ্য)ৰ সদস্য ডাঃ ভি কে পালে কয়-’লকডাউনত আৰোপ কৰা নিষিদ্ধতাই কোৰোনা সংক্ৰমণৰ গতি ৰোধ কৰে ৷ ৩ এপ্ৰিলত প্ৰতিদিনে ২২.৬% ক’ৰোনা সংক্ৰমণ পোহৰলৈ আহিছিল৷ কিন্তু ৪ এপ্ৰিলৰ পাছত এই সংক্ৰমণৰ হাৰ ৫.৫% লৈ হ্ৰাস পায় ৷’ দেশজুৰি ২৫ মাৰ্চৰ পৰা লকডাউন আৰম্ভ হৈছিল৷ যথাসময়ত লকডাউনৰ সিদ্ধান্ত লোৱা বাবে ক’ৰোনাই ভাৰতত গা কৰি উঠিব নোৱাৰিলে বুলিও ডাঃ পালে কয়৷ তদুপৰি লকডাউনৰ সময়ছোৱাত কেন্দ্ৰ তথা বিভিন্ন ৰাজ্য চৰকাৰে স্বাস্থ্য ক্ষেত্ৰৰ উন্নত পৰিকাঠামো গঢ়ি তোলাৰ লগতে স্বাস্থ্য কৰ্মী, স্বাস্থ্য সামগ্ৰী পৰ্যাপ্ত পৰিমাণে যোগাৰ কৰে৷ উল্লেখ্য, ষ্টেটিছটিকছ, প্লেনিং আৰু প্ৰগ্ৰেম ইমপ্লেটেশ্যন মন্ত্ৰণালয়ৰ সচিব প্ৰবীন শ্ৰীবাস্তৱৰ উপস্থিতিত দেশত লকডাউন অবিহনে হ’ব পৰা পৰিস্থিতিৰ তথ্যসুলভ আৰ্হি দেখুৱাই ভাৰতীয় পাবলিক হেল্থ ফাউণ্ডেচন (পিএইচএফআই) আৰু বষ্টন কনচাল্টিং গ্ৰুপ (বিচিজি)এ৷ পিএইচএফআইৰ মতে, লকডাউনে প্ৰাণ ৰক্ষা কৰিছে ৭৮০০০ৰ৷ আনহাতে বিচিজিৰ আৰ্হি অনুসৰি লকডাউনৰ ফলত ৩৬-৭০ লাখ সংক্ৰমণ ৰোধ হোৱাৰ লগতে ১.২-২.১ লাখ লোকৰ প্ৰাণ ৰক্ষা পৰিছে৷
