আজি হেঁপাহৰ মাঘ বিহু। উৰুকাৰ নিশা ভোজ খোৱাৰ পিছত ৰাজ্যবাসীয়ে পালন কৰিছে ভোগালী বিহু।(Magh Bihu 2025) পুৱাই মেজি জ্বলাই অগ্নিদেৱতাৰ ওচৰত আশীষ ল’লে ৰাজ্যবাসীয়ে। মেজি জ্বলাই অপায়-অমংগল নাশৰ কামনা কৰি অগ্নি দেৱতাক সেৱা কৰে ৰাইজে। পৰম্পৰা ৰক্ষা কৰি অসমীয়াই পালন কৰিছে হেঁপাহৰ ভোগালী বিহু।
হেঁপাহৰ ভোগালী বিহুৰ শুভেচ্ছা জ্ঞাপন কৰে মুখ্যমন্ত্ৰী হিমন্ত বিশ্ব শৰ্মাই। মুখ্যমন্ত্ৰীগৰাকীয়ে সামাজিক মাধ্যমত লিখে, অসম আৰু অসমীয়াৰ জাতীয় জীৱনৰ স্বাভিমান বাপতিসাহোন ভোগালী বিহুৰ আপোনালোক সদৌটিলৈ ওলগ আৰু শুভেচ্ছা জ্ঞাপন কৰিলোঁ। মেজিৰ জুয়ে দহি নিয়ক আমাৰ চৌপাশৰ কলুষ-কালিমা আৰু দুখবোধ। ভোগালীৰ উলাহে প্ৰাণে প্ৰাণে সঞ্চাৰিত কৰক নতুন উদ্যম আৰু সঞ্জীৱনী শকতি, সকলোৰে বাবে সময় হওক হিতসাধিনী-মংগলময়।
কেন্দ্ৰীয় মন্ত্ৰী সৰ্বানন্দ সোণোৱালে সামাজিক মাধ্যমত বিহুৰ শুভেচ্ছা জনাই লিখে, সমূহ অসমবাসীলৈ বাপতিসাহোন ভোগালী বিহুৰ আন্তৰিক ওলগ জনালোঁ।
আনহাতে দেশৰ প্ৰধানমন্ত্ৰী নৰেন্দ্ৰ মোদীয়ে ভোগালী বিহুৰ শুভেচ্ছা জ্ঞাপন কৰে অসমবাসীক।