নৱ প্ৰজন্মৰ এগৰাকী শক্তিশালী লেখিকা ড০ ৰুমী কলিতাৰ ‘মহিম বৰাৰ(Mahim Bara) চুটি গল্পত নাৰী আৰু নাৰী মনস্তত্বৰ প্ৰতিফলন’— শীৰ্ষক গৱেষণাধৰ্মী গ্ৰন্থখনি অলপতে পঢ়াৰ সৌভাগ্য ঘটিছে।
পাঁচটা অধ্যায়ত সন্নিৱিষ্ট গ্ৰন্থখনিত পুংখানুপুংখ ভাৱে অসমীয়া চুটি গল্পৰ আৰম্ভণি আৰু বিকাশৰ বিশ্লেষণ আগবঢ়াইছে।
প্ৰথম অধ্যায়টোত চুটি গল্পৰ সংজ্ঞা জোনাকী যুগৰ গল্প সাহিত্য বিশেষকৈ সাহিত্য ৰথী লক্ষ্মীনাথ বেজবৰুৱা, শৰৎ চন্দ্ৰ গোস্বামী, নকুলচন্দ্ৰ ভূঞা, দণ্ডিনাথ কলিতা, ড০ সূযৰ্্য কুমাৰ ভুঞাৰ গল্পৰ বিষয়ে সুন্দৰ ভাৱে অৱলোকন কৰিছে।
আবাহন যুগৰ গল্প সাহিত্য বিশেষকৈ নগেন্দ্ৰ নাৰায়ণ চৌধুৰী, নকুল চন্দ্ৰ ভূঞা, হলীৰাম ডেকা, লক্ষ্মীনাথ ফুকন, বিৰিঞ্চি কুমাৰ বৰুৱা, ৰমা দাস, ত্ৰৈলোক্য নাথ গোস্বামী, ৰাধিকা মোহন গোস্বামী, কৃষ্ণ ভূঞা, মুনীন বৰকটকী, দ্বীপান্বিতা চৌধুৰী, চাহ চৈয়দ হাছান আলি, উমেশ চন্দ্ৰ শইকীয়া, উমাকান্ত শৰ্মাৰ দৰে স্বনামধন্য গল্পকাৰ সকলৰ গল্পৰ সন্দৰ্ভত চমু বৰ্ণনা সুন্দৰ ৰূপত পৰিস্ফুট হৈছে।
‘যুদ্ধোত্তৰ যুগ বা ৰামধেনু যুগৰ গল্প সাহিত্য’ৰ বিষয়ে লেখিকাই তথ্য ভিত্তিক ভাৱে বস্তুনিষ্ঠ বিষয় উপস্থাপন কৰা দেখা গৈছে। লেখাটোৰ শেষত নিজৰ ভাষাৰে উল্লেখ কৰিছে— সকলো যুগৰ সাহিত্যৰ পটভূমি নিৰ্মাণ হয় সমকালীন ৰাজনৈতিক, অৰ্থনৈতিক, সামাজিক আৰু সাংস্কৃতিক মূল্যবোধৰ ওপৰত নিৰ্ভৰ কৰি।
যুদ্ধোত্তৰ বা ৰামধেনু যুগৰ বিশিষ্ট গল্পকাৰসকল— চৈয়দ আব্দুল মালিক, বীৰেন্দ্ৰ কুমাৰ ভটাচাৰ্য, প্ৰফুল্ল দত্ত গোস্বামী, যোগেশ দাস, সৌৰভ কুমৰা চলিহা, ভবেন্দ্ৰ নাথ শইকীয়া, হোমেন বৰগোহাঞি, চন্দ্ৰ প্ৰসাদ শইকীয়া, স্নেহ দেৱী, ৰোহিনী কুমাৰ কাকতি, লক্ষ্মীনন্দন বৰা, নিৰুপমা বৰগোহাঞি, পদ্ম বৰকটকী, মেদিনী চৌধুৰী, অতুলানন্দ গোস্বামী, নিৰোদ চৌধুৰী, শীলভদ্ৰ, মামণি ৰয়ছম গোস্বামী, ড০ নগেন শইকীয়া, ইমৰান শ্বাহ, প্ৰবীনা শইকীয়া, ঈশ্বৰ মহন্ত, গোবিন্দ্ৰ প্ৰসাদ শৰ্মা, কুমুদ গোস্বামী, অপূৰ্ব শৰ্মা, প্ৰণৱজ্যোতি ডেকা, হৰেকৃষ্ণ ডেকা, দিপালী দত্ত, আলিমুন্নিচ্ছা পীয়াৰ, ৰোহিনী কুমাৰ বৰা, ৰাজেন্দ্ৰ নাথ হাজৰিকা, চিত্ৰলতা ফুকন, মিনতি হাজৰিকা, সাধনা মজিন্দাৰ বৰুৱা, ফুল বৰা, পোলেন বৰকটকী, ত্ৰৈলোক্য নাথ ভট্টাচাৰ্য, ৰিজু হাজৰিকা, পজিৰ উদ্দিন আহমেদ, আৰু আৰতি দাস বৈৰাগীৰ গল্প সন্দৰ্ভত চমুটোকা সমূহে অসমীয়া সাহিত্যৰ পাঠকক কিছু নতুনত্বৰ সোৱাদ দিবলৈ সক্ষম হ’ব।
‘সাম্প্ৰতিক যুগৰ গল্প সাহিত্য’— শীৰ্ষক নিবন্ধটিত অৰুণ গোস্বামী, অনিল শইকীয়া, অখিল চক্ৰৱৰ্তী, অৰূপা পটংগীয়া কলিতা, অভিজিৎ শৰ্মা বৰুৱা, অৰ্পন শইকীয়া, ইন্দ্ৰকান্ত কাৰ্কী, উদয়াদিত্য ভৰালী, কৈলাশ শৰ্মা, গুনীন্দ্ৰ গায়ন, চন্দ্ৰ বৰপাত্ৰ গোহাঁই, ড০ জয়কান্ত গন্ধীয়া, জিতেন শৰ্মা, জ্যোতিষ শিকদাৰ, দুৰ্লভ বুঢ়াগোহাঁই, দীপালি ডেকা, দেৱব্ৰত দাস, পৰাগ কুমাৰ ভটাচাৰ্য, প্ৰফুল্ল চন্দ্ৰ বৰা, পূৰবী তামুলী, ড০ পৰমানন্দ ৰাজবংশী, প্ৰণতি গোস্বামী, প্ৰদীপ হাজৰিকা, প্ৰশান্ত কুমাৰ দাস, প্ৰদীপ কুমাৰ পূজাৰী, প্ৰশান্ত ৰাজগুৰু, প্ৰহ্লাদ কুমাৰ বৰুৱা, ফুল গোস্বামী, বিকিৰণ বৰদলৈ, বিৰিঞ্চি কুমাৰ মেধি, বসন্ত কুমাৰ ভটাচাৰ্য, মদন শৰ্মা, মীনাক্ষী চৌধুৰী, মনোৰমা বৰগোহাঞি, যতীন্দ্ৰ কুমাৰ বৰগোহাঞি, ৰংবং তেৰাং, ৰূপশ্ৰী গোস্বামীৰ গল্পৰ পটভূমি আৰু বিষয় বস্তু সন্দৰ্ভত নিপোটল বৰ্ণনা দাঙি ধৰিবলৈ সক্ষম হৈছে।
অসমীয়া গল্প সাহিত্যই জোনাকী যুগৰ পৰা বৰ্তমানলৈ এক গৌৰৱময় শতিকা অতিক্ৰম কৰি ভৱিষ্যতৰ দিশে ধাৱমান হোৱা কথাটো লেখিকা ড০ ৰুমী কলিতাই গৱেষণা মূলক দৃষ্টিৰে ফুটাই তোলাত সক্ষম হোৱা বুলি ক’ব পাৰি।
মুঠ পাঁচটা অধ্যায়ত বিভক্ত এই গ্ৰন্থখনৰ দ্বিতীয় অধ্যায়— টমহিম বৰাৰ গল্প পটভূমি আৰু বিষয় বৈচিত্ৰ্য’ত সাহিত্যচাৰ্যৰ মহিমবৰাৰ গল্পৰ পটভূমি, বিষয়বস্তু গ্ৰাম্যজীৱন কেন্দ্ৰিক প্ৰভাৱ নগৰ কেন্দ্ৰিক প্ৰভাৱৰ বিষয়ে বিশেষ বৰ্ণনা দাঙি ধৰাত সফল হৈছে।
তৃতীয় অধ্যায়ত ‘মহিম বৰাৰ গল্পত নাৰী আৰু নাৰী মনস্তত্ব’ত অসমৰ সমাজ জীৱনত নাৰীৰ স্থান আৰু মৰ্যদা সাহিত্যত নাৰীৰ স্থান, নাৰী চৰিত্ৰৰ বিশিষ্টতা, নাৰী মনস্তত্ত্ব, ফ্ৰয়েডীয় তত্ত্বৰ প্ৰভাৱৰ বিষয়ে বিচাৰ বিশ্লেষণ আগবঢ়াইছে।
চতুৰ্থ অধ্যায়— “নাৰী মুক্তি আন্দোলন আৰু মহিম বৰাৰ গল্প’ত উৎপত্তি, বিকাশ আৰু বিস্তৃতি, অসমীয়া সাহিত্যত নাৰী মুক্তি চেতনা আৰু মহিমবৰাৰ গল্পত ইয়াৰ প্ৰতিফলন মহিম বৰাৰ সৃষ্টিতনাৰী পুৰুষৰ প্ৰেমৰ বিষয়ে দাঙি ধৰি অসমীয়া সাহিত্যত সাহিত্যচাৰ্য মহিম বৰাই গল্পৰ মাজেৰে নাৰী পুৰুষৰ প্ৰেম ভিন্নৰূপত উপস্থাপন কৰি সেই সময়ৰ অসমীয় সমাজখনক সুন্দৰ ভাৱে প্ৰতিফলিত কৰাৰ বিষয়ে নিজস্ব দৃষ্টিভংগী ব্যক্ত কৰিছে।
পঞ্চম অধ্যায়— ‘অসমীয়া গল্প সাহিত্যত মহিম বৰা’ শীৰ্ষক অধ্যায়টিত অসমীয়া গল্প সাহিত্যত মহিম বৰাৰ স্থান, মহিম বৰা সন্দৰ্ভত ভিন্নজনৰ দৃষ্টি ভংগী দাঙি ধৰিছে।
গ্ৰন্থখনিৰ জৰিয়তে লেখিকা ড০ ৰুমী কলিতাই গল্পকাৰ মহিম বৰাৰ নাৰী মন অতি দক্ষতাৰে বিচাৰ কৰিব পাৰিছে। তদুপৰি গ্ৰন্থখনিৰ মাজেৰে লেখিকাই মহিম বৰাৰ গল্পৰ আলোচনা পৰ্যালোচনাৰ মাজেৰে অসমীয়া সাহিত্যত নাৰীৰ স্থান আৰু নাৰীমুক্তি চেতনাৰ বিষয়েও আলোকপাত কৰিছে।
লেখিকাৰ শব্দ শিল্প প্ৰাঞ্জল আৰু মনোৰম। ১৮৩ পৃষ্ঠাৰ গ্ৰন্থখনিৰ মূল্য ২০০ টকা। গুৱহাটীৰ শব্দ শিল্প প্ৰকাশনে প্ৰকাশ বৰা গ্ৰন্থখনিয়ে অসমীয়া সাহিত্যৰ আলোচনাত ইতিবাচক প্ৰভাৱ পেলাব। পাঠক সমাজে আদৰি ল’লেই লেখিকাৰ শ্ৰম সাৰ্থক হ’ব।
লেখকঃ জগন্নাথ কলিতা