‘কা’ বাতিলৰ দাবীত ডিকমত মটক ছাত্ৰ সন্থাৰ প্ৰতিবাদ

দৈনন্দিন বাৰ্তা ডেস্ক : নাগৰিকত্ব সংশোধনী আইন বাতিল কৰা, পৰিৱেশ প্ৰভাৱ নিৰূপণ অধিসূচনা-২০২০ বাতিল কৰা, অখিল গগৈক মুক্তি দিয়াৰ দাবীত শুকুৰবাৰে কেন্দ্ৰীয় চৰকাৰৰ বিৰুদ্ধে ডিব্ৰুগড়ৰ ডিকমত প্ৰতিবাদ সাব্যস্ত কৰে উজনি অসমৰ মটক জনগোষ্ঠী অন্যতম জাতীয় সংগঠন সদৌ অসম মটক ছাত্ৰ সন্থাই৷ সদৌ অসম মটক ছাত্ৰ সন্থাৰ ডিব্ৰুগড় জিলা সমিতি আৰু ডিকম আঞ্চলিক সমিতিয়ে ডিব্ৰুগড়ৰ ডিকমৰ ৩৭নং ৰাষ্ট্ৰীয় ঘাইপথত প্ৰতিবাদ সাব্যস্ত কৰি নাগৰিকত্ব সংশোধনী আইন বাতিল কৰা, পৰিৱেশ প্ৰভাৱ নিৰূপণ অধিসূচনা-২০২০ বাতিল কৰাৰ লগতে কৃষক নেতা অখিল গগৈক বিনাচৰ্তে মুক্তিৰ দাবী জনায়৷ কেইবা শতাধিক নেতা-কৰ্মীয়ে হাতে হাতে প্লে কাৰ্ড লৈ মানৱ শৃংখল কাৰ্যসূচী ৰূপায়ন কৰি বৰতাল বজাই প্ৰতিবাদ জনায়৷ অসমৰ জৈৱ বৈচিত্ৰ ৰক্ষা কৰক, অখিল গগৈক বিনাচৰ্তে মুক্তি দিয়ক, কা-বাতিল কৰক, কা-আমি নামানো, EIA-২০২০ অধিসূচনা প্ৰত্যাহাৰ কৰক, ডিকম আঞ্চলিক মটক ছাত্ৰ সন্থা জিন্দাবাদ, বিজেপি চৰকাৰ হায়ঃ হায়ঃ, সৰ্বানন্দ সোণোৱাল মুৰ্দাবাদ, নৰেন্দ্ৰ মোদী মুৰ্দাবাদ আদি শ্ল’গান দি ডিকমৰ আকাশ বতাহ কঁপাই তোলে। কাৰ্যসূচীত সংগঠনটোৰ কেন্দ্ৰীয় মুখ্য উপদেষ্টা যুগল বৰুৱা, তিনিচুকীয়া জিলা সমিতিৰ সভাপতি সঞ্জয় হাজৰিকাৰ লগতে ডিব্ৰুগড় জিলা সমিতিৰ বিষয়-ববীয়া উপস্থিত থাকি বিজেপি নেতৃত্বাধীন কেন্দ্ৰীয় আৰু ৰাজ্যৰ চৰকাৰখনক তীব্ৰ সমালোচনা কৰা পৰিলক্ষিত হয়।