আমিনগাঁৱত আয়োজিত বিশাল সভাত কামৰূপ জিলাৰ হিতাধিকাৰী সকলৰ মাজত অসম মাইক্ৰ’ফাইনেন্স উদগনি আৰু সকাহ আঁচনি, ২০২১ ৰ চেক্ বিতৰণ ।ঋণৰ ধনৰ সদব্যৱহাৰেৰে অৰ্থনৈতিক স্বাৱলম্বীতাৰ পথ প্ৰসস্ত কৰাৰ বাবে বিত্তমন্ত্ৰী অজন্তা নেওগৰ আহ্বান।অসমৰ বিত্তমন্ত্ৰী অজন্তা নেওগ আৰু উদ্যোগ আৰু বাণিজ্য ইত্যাদি বিভাগৰ মন্ত্ৰী তথা কামৰূপ জিলাৰ অভিভাৱক মন্ত্ৰী চন্দ্ৰ মোহন পাটোৱৰীয়ে আজি কামৰূপ জিলাৰ হিতাধিকাৰী সকলৰ মাজত অসম মাইক্ৰ’ফাইনেন্স উদগনি আৰু সকাহ আঁচনি, ২০২১ ৰ চেক্ সমূহ আনুষ্ঠানিকভাৱে বিতৰণ কৰে। উল্লেখ্য যে অসম মাইক্ৰ’ফাইনেন্স উদগনি আৰু সকাহ আঁচনি, ২০২১ৰ জৰিয়তে মাইক্ৰফাইনেন্সৰ পৰা ঋণ গ্ৰহণ কৰোতা সকলক তিনিটা শ্ৰেণীত বিভক্ত কৰা হৈছে। যি সকল ঋণ গ্ৰহণ কাৰীয়ে নিয়মিত ভাৱে ঋণৰ কিস্তি পৰিশোধ কৰি আহিছে তেওঁলোকক সকাহ প্ৰদানৰ বাবে চৰকাৰে প্ৰথম পৰ্যায়ত ব্যৱস্থা লৈছে। ৰাজ্যখনৰ প্ৰায় ১১ লাখ হিতাধিকাৰী কেটেগৰী-১ত আছে আৰু কামৰূপ জিলাত প্ৰায় ৭৬ হাজাৰ গৰাকী হিতাধিকাৰী কেটেগৰী-১ত আছে। বিত্তমন্ত্ৰী তথা উদ্যোগ আৰু বাণিজ্য ইত্যাদি বিভাগৰ মন্ত্ৰীয়ে আমিনগাঁওৰ কুমাৰ ভাস্কৰ বৰ্মন ক্ষেত্ৰত অসম চৰকাৰৰ বিত্ত বিভাগ তথা কামৰূপ জিলা প্ৰশাসনৰ উদ্যোগত আয়োজিত অনুষ্ঠানত আনুষ্ঠানিকভাৱে চেক্ বিতৰণ কৰাৰ পিছত জিলাখনৰ সৰ্বমুঠ ৫ হেজাৰ গৰাকী হিতাধিকাৰীক আজি সভাথলীত স্থাপিত বিভিন্ন কাউন্টাৰত চেক্ বিতৰণ কৰা হয়। বাকী থকা হিতাধিকাৰী সকলক ব্লক পৰ্যায়ত নিৰ্দ্ধাৰিত ধনৰাশিৰ চেক্ প্ৰদান কৰা হব।
এই উপলক্ষে আয়োজিত সভাত ভাষণ প্ৰদান কৰি বিত্তমন্ত্ৰী অজন্তা নেওগে কয় যে মুখ্যমন্ত্ৰী ড০ হিমন্ত বিশ্ব শৰ্মাই অসমৰ আই-মাতৃ সকলৰ নামত এই আঁচনিখন উৎসৰ্গিত কৰিছে । মুখ্যমন্ত্ৰীয়ে প্ৰতিশ্ৰুতি অনুসৰি আঁচনিখন আখৰে ৰপায়ন কৰিছে । ৩ টা শ্ৰেণীত বিভক্ত কৰি ৰূপায়ন কৰিবলৈ লোৱা আঁচনিখনৰ দ্বাৰা সৰ্বমুঠ ২৪ লাখ হিতাধিকাৰী লাভাম্বিত হ’ব । কামৰূপ জিলাত প্ৰ্থম শ্ৰেণিৰ ৭৬ হাজাৰ হিতাধিকাৰী লাভাম্বিত হ’ব আৰু ইয়াৰ বাবদ ১৪০ কোটি টকা ব্যয় কৰা হৈছে বুলি তেওঁ কয় । মন্ত্ৰী গৰাকীয়ে মহিলা আৰু আই-মাতৃ সকলক সকলক ঋণৰ ধনৰ সদব্যৱহাৰেৰে অৰ্থনৈতিক স্বাৱলম্বীতাৰ পথ প্ৰশস্ত কৰাৰ বাবে আহ্বান জনায় ।অনুষ্ঠানত ভাষণ প্ৰদান কৰি উদ্যোগ আৰু বাণিজ্য বিভাগৰ মান্ত্ৰী চন্দ্ৰমোহন পাটোৱাৰীয়ে কয় যে বিভিন্ন ৰাজনৈতিক দলে নিৰ্বাচনত জয়ী হোৱাৰ বাবে বিভিন্ন প্ৰতিশ্ৰুতি প্ৰদান কৰে যদিও নিৰ্বাচনত জয়ী হোৱাৰ পিচত পালন নকৰে । কিন্তু এই ক্ষেত্ৰত মুখ্যমন্ত্ৰী ড০ হিমন্ত বিস্ব শৰ্মা ব্যতিক্ৰম বুলি উল্লেখ কৰি মুখ্যমন্ত্ৰী গৰাকী এই ক্ষেত্ৰত শলাগৰ পাত্ৰ বুলি কয় ।
অনুষ্ঠানত ৰাজ্য সভাৰ সাংসদ ভূবেনেশ্বৰ কলিতা, বিধায়ক সকল ক্ৰমে- ভৱেশ কলিতা, দিগন্ত কলিতা, সুমন হৰিপ্ৰিয়া, ৰেকিবুদ্দিন আহমেদ, নন্দিতা দাসেও অসম চৰকাৰে লোৱা এনে আঁচনিৰ শলাগ লৈ বক্তব্য আগবঢ়ায় ।
কামৰূপ জিলাৰ উপায়ুক্ত কৈলাশ কাৰ্তিক এনে আদৰণি ভাষণ প্ৰদান কৰা আজিৰ এই অনুষ্ঠানত বিধায়ক হেমাঙ্গ ঠাকুৰীয়াৰ লগতে মুখ্যমন্ত্ৰীৰ বিশেষ কৰ্তব্যৰত বিষয়া হেমন্ত চৌধুৰীকে ধৰি বহু গন্য-মান্য ব্যাক্তিয়ে অংশগ্ৰহণ কৰে।