দৈনন্দিন বাৰ্তা ডেস্ক : বিশ্বৰ ধনীৰ তালিকাত চতুৰ্থ স্থান লাভ কৰিছে মুকেশ আম্বানিয়ে৷ এমাহৰ কম সময়তে সপ্তম স্থানৰ পৰা তেওঁ চতুৰ্থ স্থান পালেহি৷ শনিবাৰে ব্লুমবার্গ বিলিনিয়াৰৰ তালিকা অনুযায়ী ৰিলায়েন্সৰ কৰ্ণধাৰৰ সম্পত্তিৰ মূল্য ৮০.৬ বিলিয়ন ডলাৰ৷ অথচ ২৩ জুলাইত তেওঁ আছিল পঞ্চম স্থানত৷ মাত্ৰ ১০-১২ দিনৰ ভিতৰত আন এটা ঢাপ উঠিল মুকেশ আম্বানি৷ এতিয়া তেওঁৰ আগত আছে মাত্ৰ তিনিজন৷ যোৱা ১০ জুলাইত বিশ্বৰ সপ্তম ধনী ব্যক্তি আছিল ৰিলায়েন্স ইণ্ড্ৰাষ্টিজৰ কৰ্ণধাৰ৷ বাৰ্কছায়াৰ হাথাৱেৰ চিইঅ’ ৱাৰেন বাফেটক পিছ পেলাই তেওঁ এই স্থান দখল কৰিছে৷ মাত্ৰ ১২ দিনতে ৭৫ মাৰ্কিন বিলিয়ন ডলাৰেৰে পঞ্চম স্থান লাভ কৰিছিল মুকেশ আম্বানিয়ে৷ তেতিয়া ভাৰতীয় মুদ্ৰাত তেওঁৰ সম্পত্তিৰ মূল্য আছিল ৫.৬১ লাখ কোটি টকা৷ এতিয়া ৮০.৬ বিলিয়ন ডলাৰ মূল্য সম্পত্তিৰ গৰাকী মুকেশ আম্বানি৷ তেওঁৰ আগত আছে জেফ বেজছ, বিল গেটছ আৰু মাৰ্ক জুকাৰবাৰ্গ৷ তেওঁলোকৰ সম্পত্তিৰ পৰিমাণ হ’ল যথাক্রমে ১৮৭ বিলিয়ন, ১২১ বিলিয়ন আৰু ১০২ বিলিয়ন ডলাৰ৷
