বেংক কৰ্তৃপক্ষৰ ৰহস্যজনক ভুমিকা : আজিও নহ’ল তদন্ত ।

এ জে আকন্দ‌ :

চৰকাৰে প্ৰৱৰ্তন কৰা জন ধন আচঁনি, প্ৰধানমন্ত্ৰীৰ বীমা যোজনা, ৰন্ধন গেছ, প্ৰধানমন্ত্ৰীৰ কৃষি সন্মান নিধি আচঁনি, সংখ্যালঘু ছাত্ৰ-ছাত্ৰী বৃত্তি, জব কাৰ্ড  আদিকে ধৰি বহু আচঁনিৰ অধীনত থকা হিচাধিকাৰীৰ একাউন্টৰ বিপৰীতে ব্যাপক লুন্ঠন চলোৱা নগাঁৱৰ এটা চি এচ পিৰ বিৰুদ্ধে সংবাদ মাধ্যমত বাতৰি প্ৰকাশৰ পিছতো আজিও নহ’ল কোনো তদন্ত। নগাঁও জিলাৰ গ্ৰামীণ বিকাশ বেংক ৰাইদঙীয়া শাখাৰ অধীনত থকা হাতীযুজোৱা চি এচ পিৰ  বাণিজ্যিক প্ৰতিনিধিয়ে ব্যাপক দুৰ্নীতি-অনিয়ম সংঘটিত কৰাৰ গুৰুতৰ অভিযোগ উঠাৰ পিছত ৰহস্যজনক ভাবে এতিয়াও নিমাত সংশ্লিষ্ট বেংক কৰ্তৃপক্ষ। চি এচ পি টোৰ বানিজ্যিক প্ৰতিনিধি নিজৰ পত্নী হোৱাৰ সুবাদতে স্বামী আনজাৰ হুছেইনে কাকো কেৰেপ নকৰাকৈ চলাই গৈছে ইটোৰ পিছত সিটো লুন্ঠনৰ বজাৰ। উল্লেখ্য যে প্ৰথম অৱস্থাত এই চি এচ পিটোৰ বানিজ্যিক প্ৰতিনিধি আনজাৰ হুছেইন আছিল যদিও বিভিন্ন অনিয়ম-দুৰ্নীতিৰ তথ্য ধৰা পৰাৰ পিছত বেংক কৰ্তৃপক্ষই তেওঁৰ চি এচ পিটো বন্ধ কৰি দিছিল। কিন্তু অতি আচৰ্যজনক কথাটো এই যে চি এচ পিটো বন্ধ কৰাৰ পৰৱৰ্তী সময়ত চতুৰ আনজাৰে বেংকৰ একাংশ বিষয়া-কৰ্মচাৰীক মেনেজ কৰি পুণৰ তেওঁৰ পত্নী ৰেজিনা বেগমৰ নামত চি এচ পিটো মুকলি কৰি নামি পৰিছে লুন্ঠনৰাজত। পত্নীৰ নামত থকা চি এচ পিটো নতুন বটলত পুৰণা মদৰ লেখিয়াকৈয়ে আনজাৰে শেহতীয়াকৈ আৰম্ভ কৰিছে প্ৰধানমন্ত্ৰী কৃষাণ সন্মান নিধিৰ আচনিত শ শ ভূৱা কৃষকৰ নামত কোটি কোটি টকা আত্মসাত কৰিছে। নগাঁও জিলাত প্ৰধানমন্ত্ৰী কৃষাণ সন্মান নিধি আচনিত সংঘটিত কৰা দুৰ্নীতিৰ মহানায়ক হিচাপে পৰিচিত এইগৰাকী আনজাৰ তথা চি এচ পিটোৰ বিৰুদ্ধে বেংক কৰ্তৃপক্ষই বিহিত ব্যৱস্থা গ্ৰহণ কৰাৰ পৰিৱৰ্তে ৰক্ষণাবেক্ষণ দিয়াৰহে অভিযোগ উঠিছে। গুৰু গোহাঁই নমনা মেনেজ মাষ্টৰৰূপী আনজাৰে এতিয়া ধনৰ বলত বলিয়ান হৈ কোনো সংবাদ মাধ্যমকো কেৰেপ নকৰে বুলিও দম্ভালি মাৰি ফুৰিছে। আনকি, বেংক কৰ্তৃপক্ষ তেওঁৰ পকেটত আছে বুলিও একাংশ লোক গাই বাই ফুৰাৰো অভিযোগ উঠিছে। বেংক কৰ্তৃপক্ষ‌ই এনে এজন দুৰ্নীতিপৰায়ণ ব্যক্তিৰ বিৰুদ্ধে কিয় আজি পৰ্যন্ত ব্যৱস্থা গ্ৰহণ কৰা নাই এই লৈ ৰাইজৰ মাজত সৰব চৰ্চা চলিছে। যদিহে বেংক কৰ্তৃপক্ষই বিহিত ব্যৱস্থা নলয়, তেন্তে নগাঁৱৰ এগৰাকী আৰ টি আই কৰ্মীয়ে দুৰ্নীতি নিবাৰক শাখাত গোচৰ তৰিব বুলি জানিব পৰা গৈছে।