ড্ৰাগছৰ বিৰুদ্ধে কঠোৰ নগাঁও আৰক্ষী : আৰক্ষীৰ অভিযানত আটক ৫ জন ড্ৰাগছ মাফিয়া ।
দৈনন্দিন বাৰ্তা, নগাঁও
ড্ৰাগছৰ ঘাটি হিচাপে পৰিচিত নগাঁৱত কালি আৰক্ষীয়ে অভিযান চলাই মাইনুল হক আৰু মজিবুৰ ৰহমান নামৰ দুই ড্ৰাগছ সৰবৰাহকাৰীক গ্ৰেপ্তাৰ কৰে। নগাঁও জিলাত ক্ৰমাৎ বৃদ্ধি হোৱা ড্ৰাগছৰ ব্যৱসায় ৰোধ কৰাৰ স্বাৰ্থত নগাঁও আৰক্ষীয়ে তীব্ৰতৰ কৰিছে অভিযান। কালিৰ দিনটোতে ৫ টাকৈ দুধৰ্ষ ড্ৰাগছ মাফিয়াক গ্ৰেপ্তাৰ কৰিছে নগাঁও আৰক্ষীয়ে। নগাঁও আৰক্ষীয়ে কঁচুৱা আৰক্ষীৰ সহযোগত অভিযান চলাই জাহাঙ্গীৰ আলম নামৰ আন এটা দুধৰ্ষ ড্ৰাগছ মাফিয়াকো গ্ৰেপ্তাৰ কৰে। উল্লেখযোগ্য যে দুদিন পূৰ্বেও জাহাঙ্গীৰক বিচাৰি আৰক্ষীয়ে অভিযান চলাইছিল যদিও আৰক্ষীৰ দলক দেখি মটৰচাইকেল আৰু ড্ৰাগছৰ টোপোলা এৰি জাহাংগীৰে পলায়ন কৰিছিল। ইতিমধ্যে নগাঁও সদৰ থানাত মাইনুল হক(২২) আৰু মজিবুৰ ৰহমান(৩২)ৰ বিৰুদ্ধে এনডিপিএছ এক্টৰ অধীনত ২০(বি)/২২(এ)/২১(বি)/২৭ ধাৰাত ৮৫৭/২০২০ নম্বৰ এটা গোচৰ ৰুজু কৰাৰ বিপৰীতে জাহাঙ্গীৰ আলমৰ বিৰুদ্ধেও এনডিপিএছ এক্টৰ ২১(চি) ধাৰাত ৯৪/২০ নম্বৰত গোচৰ ৰুজু কৰি তিনিওকে জেল হাজেতলৈ প্ৰেৰণ কৰিছে। আনহাতে বৃহস্পতিবাৰৰ দিনটোতে অসম আৰক্ষীৰ ম’ষ্ট ৱাণ্টেডৰ তালিকাত স্থান লাভ কৰা ৰুবুল খান আৰু জাকিৰ হুছেইনকো নগাঁও আৰক্ষীয়ে গ্ৰেপ্তাৰ কৰিবলৈ সক্ষম হৈছিল। ইতিমধ্যে এই দুই ড্ৰাগছ মাফিয়াক জেৰা অব্যাহত ৰাখিছে অসম আৰক্ষীৰ অপৰাধ অনুসন্ধান শাখাই। নগাঁও আৰক্ষী অধীক্ষক গৌৰৱ অভিজিতে সংবাদ মাধ্যমক জনায় যে জিলাখনত বৃদ্ধি পোৱা ড্ৰাগছৰ অবৈধ ব্যৱসায়ৰ বিৰুদ্ধে অনাগত সময়ত আৰু অধিক কঠোৰ হ’ব নগাঁও আৰক্ষী।