গুৱাহাটী, ২৬ নৱেম্বৰঃ শ্বেত বিপ্লৱৰ জনক(Father of the White Revolution), ভাৰতবৰ্ষৰ দুগ্ধ মানৱখ্যাত(Famous Dairy man of India), পদ্মশ্ৰী আৰু পদ্মবিভূষণ বঁটা প্ৰাপক ড০ ভাৰ্গিজ কুৰিয়েনৰ(Dr. Virgil Kurien) জন্মবাৰ্ষিকী উপলক্ষে প্ৰতি বছৰে সমগ্ৰ দেশতে পালন কৰা হয় ৰাষ্ট্ৰীয় দুগ্ধ দিৱস(National Dairy Day)।
অসম চৰকাৰৰ দুগ্ধ উন্নয়ন বিভাগ তথা পশুপালন আৰু পশু চিকিৎসা বিভাগৰ উদ্যোগত মহানগৰীৰ পাঞ্জাবাৰীস্থিত কলাক্ষেত্ৰ চৌহদত থকা শ্ৰীমন্ত শংকৰদেৱ আন্তৰ্জাতিক প্ৰেক্ষাগৃ্হত আজি বৰ্ণাঢ্য কাৰ্যসূচীৰে পালন কৰা হয় ৰাষ্ট্ৰীয় দুগ্ধ দিৱস। উক্ত অনুষ্ঠানত মুখ্য অতিথি হিচাপে উপস্থিত থাকে অসম চৰকাৰৰ পশুপালন আৰু পশু চিকিৎসা বিভাগৰ মন্ত্ৰী অতুল বৰা।(Dainandin Barta)
ভাষণ প্ৰদানত মন্ত্ৰীগৰাকীয়ে কয় যে ৰাজ্যখনত গাখীৰৰ উৎপাদন বৃদ্ধি কৰিবৰ বাবে চৰকাৰে পশুধনৰ স্বাস্থ্য সেৱা, ছিটাকৰণ, মোবাইল ভেটেৰিনেৰি ইউনিট আদি বিভিন্ন উন্নয়নমূলক কাৰ্যসূচী ৰূপায়ণ কৰাৰ লগতে দুগ্ধ উৎপাদনকাৰী সকলৰ উত্তৰণৰ হকে বিভিন্ন ইতিবাচক পদক্ষেপ গ্ৰহণ কৰিছে। বিশ্বৰ সৰ্বমুঠ গাখীৰৰ ২৫% ভাৰতে উৎপাদন কৰে।
অসমত গাখীৰৰ উৎপাদন বৃদ্ধিৰ বাবে চৰকাৰে বিভিন্ন আঁচনি গ্ৰহণ কৰিছে। সাম্প্ৰতিক সময়ত ৰাজ্যৰ শিক্ষিত যুৱ সমাজ দুগ্ধ উৎপাদন পামৰ প্ৰতি আগ্ৰহী হোৱাটো নিশ্চিতভাৱে এক শুভ লক্ষণ।
আজিৰ এই অনুষ্ঠানত ৰাজ্যৰ দুগ্ধ সমবায় সমিতি তথা লিংগ নিৰ্ধাৰিত শুক্ৰ আঁচনিৰ অধীনস্থ কৃত্ৰিম প্ৰজনন কৰ্মীসকলক উদগনি যোগোৱাৰ উদ্দেশ্যে ৩খন শ্ৰেষ্ঠ দুগ্ধ সমবায় সমিতি ক্ৰমে বিশ্বনাথ চাৰিআলিৰ কুমালিয়া, বঙাইগাঁওৰ প্ৰগতি, যোৰহাটৰ সুৰভি দুগ্ধ সমবায় সমিতিলৈ বঁটা প্ৰদান কৰা হয়।
লগতে কামৰূপৰ নিমাজুদ্দিন আহমেদ, ডিব্ৰুগড়ৰ মকিবুৰ আলী আৰু তিনিচুকীয়াৰ ডাঃ প্ৰভাত দত্তলৈ শ্ৰেষ্ঠ কৃত্ৰিম প্ৰজনন কৰ্মীৰ বঁটা আগবঢ়োৱা হয়। তদূপৰি লিংগ নিৰ্ধাৰিত শুক্ৰ আঁচনিৰ অধীনস্থ ৩খন শ্ৰেষ্ঠ হিমায়িত শুক্ৰ ভাণ্ডাৰ ক্ৰমে খানাপাৰা, মঙ্গলদৈ আৰু অভয়াপুৰীলৈও বঁটা প্ৰদান কৰা হয়।
অনুষ্ঠানত মন্ত্ৰী বৰাই কৃষক তথা গোপালকসকলৰ সুবিধাৰ্থে অসমীয়া, ইংৰাজী আৰু হিন্দী ভাষাৰ এক ত্ৰিভাষিক মোবাইল এপ্লিকেচনৰ শুভাৰম্ভ কৰে।
ইয়াৰ জৰিয়তে সকলো ধৰণৰ মোবাইল ছফ্টৱেৰৰ যোগেদি আঁচনি, পৰিকল্পনা আদিৰ তথ্য মূল্যায়নৰ উপৰিও কৃষক-গোপালক সকলে সংশ্লিষ্ট বিশেষজ্ঞৰ পৰা পৰামৰ্শ লাভ কৰিব পাৰিব। অনুষ্ঠানত অসম চৰকাৰৰ সমবায় মন্ত্ৰী নন্দিতা গাৰ্লোচা, অসম পশুধন আৰু হাঁহ-কুকূৰা নিগমৰ অধ্যক্ষ মনোজ শইকীয়া, পশুপালন আৰু দুগ্ধ উন্নয়ন বিভাগৰ প্ৰধান সচিব মণিষ ঠাকুৰ, সচিব অভিজিৎ বৰুৱা, সঞ্চালক অনিল চন্দ্ৰ দেউৰী, দুগ্ধ উন্নয়ন বিভাগৰ সঞ্চালক পাঞ্চালী কাকতি, পশু চিকিৎসা বিজ্ঞান মহাবিদ্যালয়ৰ ডীন ড০ বিবেকানন্দ শইকীয়াৰ লগতে ৰাজ্যৰ বিভিন্ন প্ৰান্তৰ পৰা অহা কৃষক-পশুপালকসকল উপস্থিত থাকে।
বিশিষ্ট সংগীত শিল্পী তথা পশুপালন বিভাগৰ অৱসৰপ্ৰাপ্ত সহকাৰী সঞ্চালক ডাঃ ৰূপজ্যোতি ওজাৰ ভজনেৰে শুভাৰম্ভ কৰা ৰাষ্ট্ৰীয় দুগ্ধ দিৱসৰ অনুষ্ঠানত দুগ্ধ উৎপাদন আৰু লিংগ নিৰ্ধাৰিত শুক্ৰাণু বিষয়ক এখনি তথ্যচিত্ৰৰ প্ৰদৰ্শন কৰা হয়।
আনহাতে দুগ্ধ দিৱসৰ লগত সংগতি ৰাখি এখনি বিশেষ প্ৰদৰ্শনীৰ ব্যৱস্থা কৰা হয় আৰু ইয়াত বিভিন্ন প্ৰতিষ্ঠানে অংশগ্ৰহণ কৰে। প্ৰদৰ্শনীত বিভিন্ন দুগ্ধজাত সামগ্ৰীৰ প্ৰদৰ্শন আৰু বিক্ৰীৰ ব্যৱস্থা কৰা হয়।