ৰাষ্ট্ৰীয় পৰ্যায়ৰ বেডমিন্টন খেলুৱৈ মণিকৰ্নিকা গগৈয়ে সদ্য ঘোষিত চি বি এছ চি দশম শ্ৰেণীৰ পৰীক্ষাত অ’এন জি চি শিৱসাগৰ কেন্দ্ৰীয় বিদ্যালয়ৰ পৰা ৯২শতাংশ নম্বৰ লাভ কৰি এক সুকীয়া গৌৰৱৰ অধিকাৰী হৈ শিৱসাগৰ তথা অসমলৈ সুনাম কঢ়িয়াই আনিছে। উল্লেখ্যযোগ্য যে ৭ বছৰৰ পৰা বেডমিন্টন খেলিবলৈ আৰম্ভ কৰা মণিকৰ্নিকাই
অল অসম গাৰ্লছ ছিংগলছ U-11,U-13,U-15,U-17 চেম্পিয়নশ্বিপত এক নম্বৰ ৰেংকিঙৰ ধাৰাবাহিকতা ৰক্ষা কৰিবলৈ সক্ষম হৈছে। তেনেদৰে জুনিয়ৰ নেচনেল গেমছত দুবাৰকৈ অসমৰ পৰা প্ৰতিনিধিত্ব কৰা মণিকৰ্নিকাই U-13 , U-15 শিতানত ক্ৰমে ইণ্ডিয়া ৰেংকিং ১৩ আৰু ১২ পাবলৈ সক্ষম হৈছে।
মন কৰিবলগীয়া বিষয় যে সাধাৰণতে খেল আৰু পঢ়া দুয়োটা একেলগে বৰ্তিই ৰখা ইমান সহজ কথা নহয় যদিও দৈনিক কেইবা ঘণ্টা কঠোৰ অনুশীলন কৰা মণিকৰ্নিকাই শৈক্ষিক ক্ষেত্ৰতো উন্নত ফলাফল দেখুৱাই সমাজত এক সুকীয়া নিদৰ্শন দাঙি ধৰিছে। মণিকৰ্নিকাৰ এই সফলতাত পৰিয়ালবৰ্গৰ লগতে শিৱসাগৰবাসীক গৌৰৱান্বিত কৰি তুলিছে। মণিকৰ্নিকা শিৱসাগৰ বৰপাত্ৰ নগৰৰ নিবাসী মৃগেন গগৈ আৰু জুৰি গগৈৰ কন্যা।