দৈনন্দিন বাৰ্তা ডেস্ক : ক’ৰোনাৰ বাবেই বিশ্বজুৰি শিক্ষাৰ্থীসকল অসুবিধাৰ সন্মুখীন হয় ৷ এই মহামাৰীৰ বাবে ৭০ শতাংশ শিক্ষানুষ্ঠানৰ শিক্ষাৰ্থী আৰু নানা বিষয়ত প্ৰশিক্ষণ লোৱা যুৱসকল বাধাগ্ৰস্ত হৈছে বুলি আগতেই তথ্য দিছিল আন্তৰ্জাতিক শ্ৰম সংস্থা (আইএলঅ’)ই ৷ এইবাৰ এনচিইআৰটি অৰ্থাৎ নেচনেল কাউন্সিল অব এডুকেছনেল ৰিচাৰ্চ এণ্ড ট্ৰেনিঙৰ এক সমীক্ষাত জনোৱা হৈছে, অনলাইন ক্লাছৰ বাবে দেশৰ ২৭ শতাংশ শিক্ষাৰ্থীৰ স্মাৰ্টফোন বা লেপটপ নাই ৷ যিসকলে অনলাইন ক্লাছ কৰিছে, তেওঁলোকৰ বেছিভাগ অনলাইন ক্লাছলৈ সুখী নহয় ৷ অংক আৰু বিজ্ঞান বিষয়বোৰ অনলাইনত শিকিবলৈ বহু অসুবিধাৰ সন্মুখীন হয় শিক্ষাৰ্থী ৷ দেশজুৰি চিবিএছইৰ বিদ্যালয়, কেন্দ্ৰীয় বিদ্যালয় আদিত মুঠ ১৮১৮৮ জন শিক্ষাৰ্থীৰ ওপৰত এনচিইআৰটিয়ে এটা সমীক্ষা চলায় ৷ প্ৰকাশিত সমীক্ষাত দেখা গৈছে যে ৩৩ শতাংশ শিক্ষাৰ্থীৰ বাবে অনলাইন ক্লাছ কঠিন আৰু ক্লান্তিকৰ ৷ সমীক্ষাটোৰ মতে অনলাইন ক্লাছ কৰিব পৰা ৮৪ শতাংশ শিক্ষাৰ্থীয়ে স্মাৰ্টফোনত নিৰ্ভৰ কৰে৷ মাত্ৰ ১৭ শতাংশ শিক্ষাৰ্থীয়ে লেপটপ ব্যৱহাৰ কৰিব পাৰে ৷ আনহাতে টিভি আৰু ৰেডিয়ৰ যোগে অলপ সংখ্যক শিক্ষাৰ্থীয়ে দূৰশিক্ষা পাইছে ৷ প্ৰায় ৩৫ হাজাৰ ছাত্র-ছাত্রী, শিক্ষক, প্রধান শিক্ষক আৰু অভিভাবক ল’ডশ্বেডিঙৰ বাবে অনলাইন যোগাযোগ অন্তৰায় হিচাপে চিহ্নিত হয় ৷ অনলাইন ক্লাছত অংক আৰু বিজ্ঞানৰ দৰে বিষয়বোৰ বুজাত অসুবিধা ৷
