দৈনন্দিন বাৰ্তাৰ ডেস্ক :
সমগ্ৰ বিশ্বতে ক’ৰোনা সংক্ৰমণ এক কোটি অতিক্ৰম কৰিলে ৷ শনিবাৰে এই সংখ্যা অতিক্ৰম কৰে ৷ ইয়াৰ লগতে মৃত্যুৰ সংখ্যা ৫ লাখ স্পৰ্শ কৰিলে ৷ ইপিনে ইউৰোপীয় ইউনিয়নে শীঘ্ৰে ‘নিৰাপদ দেশৰ’ তালিকা প্রকাশ কৰিব ৷ সকলো দেশৰ বাসিন্দাক ইউৰোপত প্ৰৱেশৰ অনুমতি দিয়া হ’ব৷ সম্ভৱত অহা সপ্তাহৰ পৰাই এই কাৰ্য আৰম্ভ হ’ব ৷ এই তালিকাত আমেৰিকাৰ নাম যে নাথাকে সেয়া এক প্ৰকাৰ নিশ্চিত৷ ব্ৰাজিল, ভাৰত বা ৰাছিয়াৰ নামো এই তালিকাত নাথাকে বুলি জানিব পৰা গৈছে ৷ আনহাতে ভাৰতত একেদিনাই ২০ হাজাৰ লোক ক’ৰোনাত আক্ৰান্ত হয়৷ ফলত এদিনত আক্ৰান্ত হোৱাৰ তালিকাত পূৰ্বৰ অভিলেখ ভংগ কৰে৷ ইয়াৰ মাজতে তিনি লাখ আক্ৰান্তই ক’ৰোনাক জয় কৰিছে৷ দেওবাৰে স্বাস্থ্য আৰু পৰিয়াল কল্যাণ মন্ত্ৰালয়ে দিয়া তথ্য মতে যোৱা ২৪ ঘণ্টাত ১৯৯৬০ জন লোক ক’ৰোনাত আক্ৰান্ত হয়৷ ফলত মুঠ আক্ৰান্তৰ সংখ্যা ৫২৮৮৫৯ জন হ’ল ৷ ইয়াৰ মাজতে ৩০৯৭১৩ জন লোক সুস্থ হৈ ঘৰলৈ গৈছে ৷ এতিয়া দেশত ২০৩০৫১ জন চিকিৎসাধীন ৷ সংক্ৰমণৰ নিৰিখত ভাৰত এতিয়াও বিশ্বৰ চতুৰ্থ স্থানত আছে ৷ আনহাতে স্বাস্থ্য আৰু পৰিয়াল কল্যাণ মন্ত্ৰালয়ে দিয়া তথ্য মতে যোৱা ২৪ ঘণ্টাত ক’ৰোনাত আক্ৰান্ত হৈ মৃত্যু হয় ৪১০ জন লোক৷ ফলত মুঠ মৃত্যুৰ সংখ্যা ১৬০৯৫জন হ’ল ৷ আনহাতে যোৱা ২৪ ঘণ্টাত ২৩১০৯৫ জন লোকৰ নমুনা পৰীক্ষা কৰা হৈছে ৷ এই পৰ্যন্ত দেশত ৬২২৭৮০২ জনৰ নমুনা পৰীক্ষা কৰা হয়৷ আনহাতে দেওবাৰৰ তথ্য মতে সমগ্ৰ বিশ্বত এক কোটিৰো অধিৰ লোক ক’ৰোনাত আক্ৰান্ত হৈছে ৷ তদুপৰি সমগ্ৰ বিশ্বত ৫৬৫৮৬৯ জন লোক ক’ৰোনাত মৃত্যু হৈছে ৷ উল্লেখ্য যে ৩ এপ্ৰিলৰ ভিতৰত ক’ৰোনাত আক্ৰান্তৰ সংখ্যা আছিল ১০৪০৫৬৭ জন ৷ ইয়াৰ ৪৮ দিনৰ পাছত ৫১০২০২৩ হয় ৷ কিন্তু এক কোটি হ’বলৈ সময় লাগিল ৩৮ দিন৷ দেওবাৰে দিনৰ ৩.৩০ বজাত সমগ্ৰ বিশ্বত ক’ৰোনাত আক্ৰান্তৰ সংখ্যা ১০০০১৫২৭ হয়গৈ ৷
সমগ্ৰ বিশ্বতে ক’ৰোনা আক্ৰান্তৰ সংখ্যা ১ কোটি অতিক্ৰম : ভাৰতত ৬২২৭৮০২ জনৰ নমুনা পৰীক্ষা ।
