১৭ মে’ত ৰোপণ কৰা হ’ব এক লাখ গছ পুলি। ইতিমধ্যে লাডাখৰ বিভিন্ন অঞ্চলত ১ লাখ ৫০ হাজাৰ গছ ৰোপণ কৰা হৈছে আৰু হিমালয়ত অৱস্থিত ১০০০ বছৰীয়া ড্ৰুকপা অৰ্ডাৰৰ আধ্যাত্মিক মুৰব্বী গ্যালৱাং ড্ৰুকপাৰ নেতৃত্বত কুংফু ননসকলৰ তত্বাৱধানত এই কাৰ্য হাতত লোৱা হৈছে। ২০১২ চনত মানৱীয় আৰু পৰিৱেশ সম্পৰ্কীয় কামৰ বাবে ৰাষ্ট্ৰসংঘৰ মিলেনিয়াম ডেভেলপমেণ্ট গ’লছ বঁটা লাভ কৰা গ্যালৱাং ড্ৰুকপাই প্ৰতিষ্ঠা কৰা লাইভ টু লাভে ফিলিপাইনছৰ “সৰ্বাধিক গছ ৰোপণ”ৰ অভিলেখ ভংগ কৰি গিনিজ ৱৰ্ল্ড ৰেকৰ্ডৰ ইতিহাসত নিজৰ নাম দখল কৰি একেলগে” বিশ্ববিখ্যাত হেমিছ মঠৰ ওচৰত ৯,৮১৪ জন স্বেচ্ছাসেৱকক জড়িত কৰি ৯৯,১০৩ টা লাডাখী উইলো গছপুলি ৰোপণ কৰে এঘণ্টাৰো কম সময়ৰ ভিতৰতে। ইয়াৰ পূৰ্বে ২০১০ চনৰ অক্টোবৰ মাহত লাইভ টু লাভৰ ৯,০৩৩ জন স্বেচ্ছাসেৱকে ৫০,০৩৩ টা পুলি ৰোপণ কৰিছিল। ২০১১ চনৰ জানুৱাৰী মাহত ফিলিপাইনছত এঘণ্টাৰ ভিতৰতে ৬৬,০০০ টা পুলি ৰোপণ কৰিছিল।
এপ্ৰিকোট, আপেল, বগৰী, আখৰোট, আৰু নাচপতিৰ ফল-মূলৰ পুলিও ৰোপণ কৰিছে। খৰাং সদৃশ পৰিস্থিতিৰ প্ৰতি লক্ষ্য ৰাখি গছপুলিৰ সমূহৰ বাবে জলসিঞ্চন ব্যৱস্থা কৰা হৈছে। ইয়াৰ বাবে ওচৰৰ সিন্ধু নদীৰ পৰা পানী তুলি লোৱা হ’ব। লাইভ টু লাভৰ মতে, এই অভিযানে লাডাখৰ বন্যভূমি সেউজীয়া কৰিব, প্ৰাকৃতিক জলভাগৰ সৃষ্টি কৰিব, মাটিৰ খহনীয়া হ্ৰাস কৰিব আৰু বিধ্বংসী ক্ষন্তেকীয়া বানপানী আৰু ভূমিস্খলন হ্ৰাস কৰিব। জীৱ-জন্তুৰ বাসস্থান থাকিব আৰু লাডাখী জনগোষ্ঠীসমূহে সেউজীয়াৰ অৰণ্য উপভোগ কৰিব পাৰিব। ১৭ মে’ৰ এই পদক্ষেপত নেপাল আৰু ভূটানৰ পৰা লাইভ টু লাভৰ স্বেচ্ছাসেৱকসকলে অংশগ্ৰহণ কৰিব।