বৰ্তমানৰ শিশুৱে মধুৰ শৈশৱটি উদযাপন কৰিব পৰা নাই, তাৰ বাবে লাহে লাহে সিহঁত যন্ত্ৰ হৈ পৰিব এদিন। ফেচবুকত লিখি লাভ নাই যদিও আমি এনে সৰু কিছুমান পদক্ষেপ ল’ব পাৰোনে অগ্ৰজ হিচাপে! ধৰি লওক
১। শিশু সাহিত্যৰ প্ৰসাৰ ঘটাব লাগে। অসমীয়া চলচ্চিত্ৰ এখনত “ক গৈছিল কল খাবলৈ” গীতটোত যিদৰে বৰ্ণমালাৰ উচিত প্ৰয়োগ শিশুক শিকোৱা হৈছিল, সেইদৰেই আমি শিশু সাহিত্যৰ প্ৰচাৰ কৰিব লাগে। পদ্যই শিশুক বিশেষভাৱে প্ৰভাৱিত কৰে যদিও মই কোনো ভাষাবিদ নহয় , তথাপি উপলব্ধি কৰিছো । ৰঘুনাথ চৌধাৰী , লক্ষ্মীনাথ বেজবৰুৱাদেৱৰ পদ্যৰপৰা আমি যি ৰস পাইছিলো সেয়া আজিকালি নাই । মিত্ৰাক্ষৰ ছন্দৰ কবিতা লিখাটো অতিকৈ প্ৰয়োজনীয় সিহঁতৰ বাবে।
২। আমিয়েই হয়তো শেষ প্ৰজন্ম , যিয়ে মোবাইল চাই চাই ভাত খোৱা নাছিল। মোবাইলৰ প্ৰতি সৰুতেই শিশুৰ যি নিচা আহিছে , সিহঁতে ডাঙৰ হোৱাৰ সময়ত মোবাইল বিৰক্ত হ’ব আৰু নতুন কিবাৰ প্ৰতি ভোক বাঢ়িব। শিশুৰ মানসিক স্থিতিৰ ওপৰত গুৰুত্ব দি মোবাইলৰ সলনি পুৰণিকলীয়া শৈশৱ এটা দিয়াৰ দায়িত্ব কেৱল অভিভাৱকৰ।
৩। প্ৰথম শ্ৰেণীৰপৰা পঞ্চম শ্ৰেণীলৈ টিউচন দিয়াৰ কোনো প্ৰয়োজন নাই। মোক কোনোবাই প্ৰস্তাৱ দিবলৈ আহিলেও এইদৰে ঘূৰাই পঠাওঁ। সম্পূৰ্ণ অভিভাৱকৰ তত্ত্বাৱধানত থকা সময়ত শিক্ষাগ্ৰহণ কৰাটো উচিত, তাৰবাবে অভিভাৱকে নিজে সময়সূচী আৰু গুৰুত্ব প্ৰদান কৰিব লাগে।
৪। সাম্প্ৰতিক সময়ত কন্যা ভ্ৰূণ হত্যাতকৈও মাৰাত্মক Paedophile ৰ চিকাৰ হোৱাটো। সিহঁতে মন মাৰি থাকিলে বা সঘনাই বেমাৰ হ’লে মুকলিমূৰীয়াকৈ সুধিব লাগে। ৰাক্ষসৰ চিকাৰ হোৱাত কোনো স্থান-কাল-পাত্ৰ নাই। মানসিকভাৱে শক্তিশালী কৰি ৰাখিবলৈ উপযুক্ত পৰিৱেশ দিয়াৰ দৰকাৰ।
৫। কন্যা শিশুক “Insta Reels” ত প্ৰেমৰ সংগীতত নাচিবলৈ দিয়াটো ভুল, চিধা কথা। ভক্তিমূলক গীত, দেশপ্ৰেমমূলক গীত ইত্যাদিত নৃত্য কৰক অতি মোহনীয়। কোনো তথাকথিত ম’ডেলে শাৰীৰিক গঠন কৃত্ৰিমভাৱে সৃষ্টি কৰাত যদি আপুনি আপোনাৰ শিশুক মডেলৰ বাবে কৃত্ৰিম বনায়, তেন্তে তাই ধ্বংস। সুখ, আনন্দবোৰ ইয়াত প্ৰয়োগ কৰিলে সিহঁতে পাহৰি যাব শিষ্টাচাৰ, শৈশৱ আৰু আন বহুতো দিশ।
• “চালককভুকতেলভু” ( Trigonometry) ; Yes, I have a number ( π=3.14) , অসমীয়াৰপৰা ইংৰাজীলৈ শুদ্ধ বৰ্ণমালাৰ প্ৰয়োগ ইত্যাদি চৰ্টকাট শিকাব লাগে। মানুহে চৰ্টকাট বহুত ভাল পায়, গণিতৰ ক্ষেত্ৰত বৈদিক গণিতে বিশেষভাৱে ইয়াৰ ভূমিকা পালন কৰি আহিছে। কিবা নোৱাৰিলে সাধুৰ দৰে বুজাওক, ভৌতিক পদাৰ্থৰ উদাহৰণ দি পঢ়াওক।
বছৰে বছৰে শিশু দিৱস পালন কৰিলে কি হ’ব! আমি এইখিনি কৰণীয় ঘৰতেই পালন কৰিব পাৰো। যুৱকৰ বাবে যৌৱন, শিশুৰ বাবে শৈশৱ । উপভোগ কৰিবলৈ দিয়ক শিশুক… মংগল হ’ব
লেখক : ৰক্তিম ৰঞ্জন তালুকদাৰ