নিশা মুকালমুৱাৰ লোহাৰকাঠা মাদলাবড়ীত ভয়ংকৰ পথ দুৰ্ঘটনা। থিতাতে এজন নিহত, পাঁচজন আহত।
ৰাসৰ আনন্দৰ মাজতে মুকালমুৱাৰ লোহাৰকাঠা মাদলাবড়ীত ভয়ংকৰ পথ দুৰ্ঘটনা সংঘটিত হয়। বৰপেটাৰ চেঙাৰ দিশৰ পৰা আহি থকা এখন চাৰিচকীয়া বাহন আৰু বিপৰীত দিশৰ পৰা যোৱা এখন পালচাৰ বাইকৰ মাজত মুখামুখি সংঘৰ্ষ হয়। ফলত বাইক আৰোহী এজন থিতাতে নিহত হয়। নিহত লোকজনৰ নাম আছান আলী ।
লগতে গুৰুতৰভাৱে আহত হয় বাইকখনৰ আনজন আৰোহী তাহেৰ আলী। আনহাতে চাৰিচকীয়া বাহনখনৰ চাৰিগৰাকী লোক আহত হয়। আহত সকলৰ নাম খাইৰুন নেছা, মিৰ হুছেইন, ৰিংকু আলী আৰু মুনিয়া বেগত। আহত আটাইকেইজনে আদাবাৰীৰ মহাত্মা গান্ধী আদৰ্শ চিকিৎসালয়ত ভৰ্তি কৰোৱাই যদিও উন্নত চিকিৎসাৰ বাবে আটাইকেইজনকে GMCHলৈ প্ৰেৰণ কৰে।
চাৰিচকীয়া বাহন খনেৰে চেঙাৰ পৰা এগৰাকী ৰোগীক গুৱাহাটী চিকিৎসা মহাবিদ্যালয়লৈ লৈ গৈ থকাৰ সময়তে পথ দুৰ্ঘটনাটো সংঘটিত হয়। দুৰ্ঘটনাগ্ৰস্থ চাৰিচকীয়া বাহনখনৰ নম্বৰ AS-01-AB-9077 আৰু দুচকীয়া বাহনখনৰ নম্বৰ AS-01-EL-5653. নিহত আছান আলীৰ ঘৰ আদাবাৰীৰ হাবলাখোৱাত বুলি জানিব পৰা গৈছে।