তিনিচুকীয়া জিলাৰ ফিল’বাৰী আৰক্ষী থানাৰ অন্তৰ্গত গৌৰীপুৰ গাঁৱৰ গাঁওপ্ৰধান খগেশ্বৰ বৰুৱাৰ বাসগৃহত আজি দিনৰ ভাগত এক ভয়ংকৰ অগ্নিকাণ্ডৰ ঘটনা সংঘটিত হয় । অগ্নিকাণ্ডত খগেশ্বৰ বৰুৱাৰ বাসগৃহৰ সমীপতেই থকা ভড়াল ঘৰৰ লগতে গা-ধুৱা ঘৰ সম্পূৰ্ণৰূপে জ্বলি ভষ্মিভূত হয় । ভড়াল ঘৰত জুই লগাৰ ফলত ভড়ালত থকা ধান সম্পূৰ্ণৰূপে জ্বলি ছাই হয় ।
পৰৱৰ্তী সময়ত ডুমডুমাৰ পৰা অগ্নিনিৰ্বাপনৰ বাবে এখন বাহন আহে যদিও অগ্নিনিৰ্বাপন বাহিনীৰ বাহন আহি পোৱাৰ পূৰ্বেই ৰাইজৰ তৎপৰতাত জুই নিৰ্বাপন কৰিবলৈ সক্ষম হয় । অগ্নিকাণ্ডত সৌভাগ্যক্ৰমে খগেশ্বৰ বৰুৱাৰ মূল বাসগৃহ ৰক্ষা পৰে বুলি জানিব পৰা গৈছে । উল্লেখ্য যে, বৈদ্যুতিক পানীৰ মটৰত চৰ্ট ছাৰ্কিটৰ ফলতেই উক্ত অগ্নিকাণ্ডৰ সূত্ৰপাত হোৱাৰ সন্দেহ কৰা হৈছে । অগ্নিকাণ্ডত খগেশ্বৰ বৰুৱাৰ প্ৰায় লক্ষাধিক টকাৰ বয়-বস্তুৰ লগতে সামগ্ৰী অনিষ্ট হোৱা বুলি জানিব পৰা গৈছে ।