দিছপুৰ, ৭ জানুৱাৰীঃ Pijush Hazarika । অসম চৰকাৰৰ জলসম্পদ, তথ্য আৰু জনসংযোগ ইত্যাদি বিভাগৰ মন্ত্ৰী তথা শোণিতপুৰ জিলাৰ অভিভাৱক মন্ত্ৰী পীযুষ হাজৰীকাই আজি শোণিতপুৰ জিলাৰ জামুগুৰি উচ্চতৰ মাধ্যমিক বিদ্যালয়ৰ গৌৰৱোজ্জ্বল শতবৰ্ষ মহোৎসৱৰ গ্ৰন্থ উন্মোচন আৰু মুকলি সভাত মুখ্য অতিথি হিচাপে উপস্থিত থাকে | বিধায়কদ্বয় পদ্ম হাজৰিকা আৰু গনেশ লিম্বু আৰু বহুকেইজন বিশিষ্ট ব্যক্তিৰ উপস্থিতিত জামুগুৰি উচ্চতৰ মাধ্যমিক বিদ্যালয়ৰ ন-পুৰণি শিক্ষাৰ্থী তথা উপস্থিত ব্যক্তিসকলৰ সন্মুখত নিজৰ বক্তব্য ৰাখি মন্ত্ৰীগৰাকীয়ে ১০০ বছৰৰ আগতেই বৃহত্তৰ জামুগুৰিহাট অঞ্চলটোৰ প্ৰথমখন শিক্ষানুষ্ঠান স্থাপন কৰা দূৰদৰ্শী ব্যক্তিসকলক শ্ৰদ্ধাৰে স্মৰণ কৰে | শোণিত কোঁৱৰ গজেন বৰুৱা, বিশিষ্ট নাট্য শিল্পী ভোলা কটকী, ভবেন বৰা, অভিনেতা লক্ষী বৰঠাকুৰ, ৰাজ্যখনৰ সংবাদ জগতৰ এগৰাকী মহীৰূহ স্বৰূপ ব্যক্তি সাহিত্য অকাডেমীৰ অনুবাদ বঁটাৰে সন্মানিত ৰাধিকা মোহন ভাগৱতী, বিজ্ঞানী তথা বিজ্ঞান লেখক ক্ষীৰধৰ বৰুৱাকে ধৰি দেশে বিদেশে খ্যাতি লাভ কৰা বহু ব্যক্তিয়ে শিক্ষা গ্ৰহণ কৰা জামুগুৰি উচ্চতৰ মাধ্যমিক বিদ্যালয়খন শোণিতপুৰ জিলাৰেই নহয়, সমগ্ৰ ৰাজ্যখনৰো এখন আগশাৰীৰ বিদ্যালয় বুলি মন্ত্ৰী হাজৰীকাই মন্তব্য কৰে | আনহাতে বিদ্যালয়খনৰ ইতিহাসত ৭ গৰাকী শিক্ষাৰ্থীয়ে উচ্চ আৰু উচ্চতৰ মাধ্যমিক চুড়ান্ত পৰীক্ষাত অসমৰ ভিতৰত প্ৰথম ১০ টা স্থানৰ অন্তৰ্ভুক্ত হ’বলৈ সক্ষম হোৱা বুলি মন্তব্য কৰি মন্ত্ৰী হাজৰীকাই কয় যে বিদ্যালয়খনৰ প্ৰাক্তন শিক্ষাৰ্থীয়ে সৰ্বভাৰতীয় প্ৰশাসনিক সেৱাৰ চাকৰিকে ধৰি বিভিন্ন ক্ষেত্ৰত সু-প্ৰতিষ্ঠিত হ’বলৈ সক্ষম হৈছে |
আজিৰ অনুষ্ঠানত উপস্থিত থকা বিদ্যালয়খনত বৰ্তমানে অধ্যয়নৰত শিক্ষাৰ্থীসকলক উদ্দেশ্যি মন্ত্ৰী পীযুষ হাজৰীকাই আৰু কয় যে ভাৰতবৰ্ষৰ নাগৰিকে আজি বিশ্বৰ আগশাৰীৰ প্ৰতিষ্ঠানত শীৰ্ষ পদবীত অধীস্থিত হ’বলৈ সক্ষম হৈছে | বিশেষকৈ কম্পিউটাৰ আৰু প্ৰযুক্তিবিদ্যাৰ ক্ষেত্ৰখনত ভাৰতীয় নাগৰিকৰ বহু সন্মান আৰু এক কথাত প্ৰতিপত্তি আছে বুলি মন্ত্ৰীগৰাকীয়ে মন্তব্য কৰে | মাইক্ৰ’চফ্ট, গুগল, টুইটাৰ, বিশ্ব বেংক আদি বিশ্বৰ আগশাৰীৰ প্ৰতিষ্ঠানৰ শীৰ্ষ পদবীত ভাৰতীয় নাগৰিক অথবা ভাৰতীয় মূলৰ ব্যক্তি অধীষ্ঠিত হোৱাত আমি ভাৰতীয় নাগৰিক হিচাপে গৌৰৱ কৰিব পাৰো | মন্ত্ৰীগৰাকীয়ে কয় যে ভাৰতীয় শিক্ষা ব্যৱস্থাতে অধ্যয়ন কৰি এনেদৰে বিশ্বৰ আগশাৰীৰ প্ৰতিষ্ঠানত সুপ্ৰতিষ্ঠিত হোৱা ব্যক্তিসকলৰ আদৰ্শৰে আমাৰ ছাত্ৰ-ছাত্ৰীসকলো আগবাঢ়ি গ’লে তেওঁলোকো এদিন সুপ্ৰতিষ্ঠিত হ’বলৈ সক্ষম হ’ব | মন্ত্ৰীগৰাকীয়ে লগতে কয় যে ভালদৰে পঢ়া শুনা নকৰিলে কোনো ব্যক্তিয়েই জীৱনত সু-প্ৰতিষ্ঠিত হ’ব নোৱাৰে | আনহাতে জীৱনত প্ৰতিষ্ঠা লাভৰ লগে ব্যক্তি এজন সামাজিকভাৱেও দায়বদ্ধ হোৱা উচিত বুলি তেওঁ মন্তব্য কৰে | সামাজিক ভাৱে দায়বদ্ধ ন’হলে আৰু নিজৰ পিতৃ মাতৃক তথা শিক্ষাগুৰুক সন্মান কৰিব নাজানিলে ব্যক্তি এজন যিমানেই সু-প্ৰতিষ্ঠিত নহওক কিয় তেওঁ কেতিয়াও সন্মানৰ পাত্ৰ হ’ব নোৱাৰে | সামাজিক ন্যায় আৰু সবলীকৰণ বিভাগৰো মন্ত্ৰীগৰাকী বিদ্যালয়খনৰ আন্তঃগাথনিৰ উন্নয়নৰ বাবে মুখ্যমন্ত্ৰী ড০ হিমন্ত বিশ্ব শৰ্মাই ইতিমধ্যেই ৮ কোটি টকাৰ পুঁজিৰ অনুমোদন দিয়া বুলি উল্লেখ কৰি সামাজিক ন্যায় আৰু সবলীকৰণ বিভাগৰ ফালৰ পৰাও ২০ লাখ টকাৰ পুঁজি প্ৰদান কৰাৰ কথা ঘোষণা কৰে | আজিৰ সভাতে মন্ত্ৰী হাজৰীকাই “বৃহত্তৰ জামুগুৰিহাট অঞ্চলৰ সাংস্কৃতিক আন্দোলনৰ ৰূপৰেখা” নামৰ গ্ৰন্থ এখনো উন্মোচন কৰে |