একতা নগৰ(গুজৰাট), ৩১ অক্টোবৰ: প্ৰধানমন্ত্ৰী নৰেন্দ্ৰ মোদীয়ে বৃহস্পতিবাৰে ইউনিফৰ্ম চিভিল কোড (UCC)ৰ পক্ষত দৃঢ় সমৰ্থন আগবঢ়াই কয় যে, চৰকাৰে ভাৰতত ‘এক ৰাষ্ট্ৰ, এক ধৰ্মনিৰপেক্ষ নাগৰিক সংহিতা’ ৰূপায়ণৰ প্ৰচেষ্টা চলাই আহিছে, যি পদক্ষেপে দেশখনক “শক্তিশালী” কৰিব(PM Modi’s UCC Pitch On Unity Day) ।
ভাৰতৰ প্ৰথমগৰাকী গৃহমন্ত্ৰী চৰ্দাৰ বল্লভভাই পেটেলৰ জন্ম বাৰ্ষিকী উপলক্ষে তেখেতৰ ষ্টেচু অৱ ইউনিটিৰ সমীপত আয়োজিত ৰাষ্ট্ৰীয় ঐক্য দিৱসৰ অনুষ্ঠানত অংশগ্ৰহণ কৰি প্ৰধানমন্ত্ৰী মোদীয়ে(Prime Minister Narendra Modi) এক ৰাষ্ট্ৰ এক নিৰ্বাচন’ৰ কথা উল্লেখ কৰি কয় যে, ই এক উন্নত ভাৰতৰ সপোন বাস্তৱ কৰাৰ এক গুৰুত্বপূৰ্ণ পদক্ষেপ ।
প্ৰধানমন্ত্ৰীগৰাকীয়ে কয়, ‘আজি আমি সকলোৱে ৱান নেচন আইডেন্টিটি – আধাৰৰ সফলতা দেখিবলৈ পাইছো আৰু বিশ্বইও ইয়াৰ ওপৰত আলোচনা কৰি আছে। আগতে ভাৰতত বিভিন্ন কৰ ব্যৱস্থা আছিল, কিন্তু আমি সৃষ্টি কৰিছিলো One Nation One Tax System – GST। আমি One Nation One Power Gridৰ জৰিয়তে দেশৰ শক্তি খণ্ডক শক্তিশালী কৰিলোঁ। One Nation One Ration Cardৰ জৰিয়তে দৰিদ্ৰ লোকৰ বাবে উপলব্ধ সুবিধাসমূহ একত্ৰিত কৰিলোঁ। আমি আয়ুষ্মান ভাৰতৰ ৰূপত দেশবাসীক One Nation One Health Insuranceৰ সুবিধা প্ৰদান কৰিছো।’
তেওঁ লগতে কয়, ‘একতাৰ বাবে আমাৰ এই প্ৰচেষ্টাসমূহৰ অধীনত আমি এতিয়া ৱান নেচন ৱান ইলেকচনৰ(One Nation One Election) দিশত কাম কৰি আছো, যিয়ে ভাৰতৰ গণতন্ত্ৰক শক্তিশালী কৰিব, যিয়ে ভাৰতৰ সম্পদৰ অনুকূল ফলাফল দিব আৰু উন্নত ভাৰতৰ সপোন পূৰণৰ ক্ষেত্ৰত দেশখনে এক নতুন গতি লাভ কৰিব। আজি ভাৰতে ৱান নেচন ৱান চিভিল কোডৰ(One Nation One Civil Code) দিশে আগবাঢ়িছে যিটো চেকুলাৰ চিভিল কোড।’
ভাষণত প্ৰধানমন্ত্ৰীগৰাকীয়ে উল্লেখ কৰে যে ভাৰতৰ ভিতৰৰ আৰু বাহিৰত একাংশ শক্তিয়ে দেশখনক অস্থিৰ কৰি তুলিবলৈ আৰু অৰাজকতা বিয়পাই বিশ্বত ৰাষ্ট্ৰখনৰ প্ৰতি নেতিবাচক ভাবমূৰ্তি গঢ়ি তুলিবলৈ চেষ্টা চলাই আহিছে। তেওঁ দেশখন থানবান কৰিবলৈ চেষ্টা কৰা “নগৰীয়া নক্সাল”ৰ এই নেক্সছটোক চিনাক্ত কৰিবলৈকো দেশবাসীক আহ্বান জনায়।
ভাৰতৰ একত্ৰীকৰণক লৈ লোকসকলৰ মাজত সন্দেহ আছিল যদিও চৰ্দাৰ পেটেলে ইয়াক সম্ভৱ কৰি তুলিলে বুলি উল্লেখ কৰি মোদীয়ে কয় যে দেশখনে আগন্তুক দুবছৰৰ বাবে পেটেলৰ ১৫০তম জন্ম জয়ন্তী উদযাপন কৰিব।
বিগত ১০ বছৰত চৰকাৰৰ প্ৰচেষ্টাৰ বাবে ভাৰতত নক্সালবাদে শেষ নিশ্বাস গণিছে বুলি উল্লেখ কৰাৰ লগতে তেওঁ কয়,‘৭০ বছৰৰ পাছত প্ৰথমবাৰৰ বাবে জম্মু-কাশ্মীৰৰ মুখ্যমন্ত্ৰীয়ে সংবিধানৰ ওপৰত শপত গ্ৰহণ কৰিছে।’
ৰাষ্ট্ৰীয় একতা দিৱস উপলক্ষে আয়োজিত অনুষ্ঠানটোত প্ৰধানমন্ত্ৰী মোদীয়ে একতা দিৱসৰ প্ৰতিশ্ৰুতি প্ৰদান কৰি দিৱসৰ পেৰেডৰো অভিবাদন গ্ৰহণ কৰে । দিৱস উপলক্ষে আয়োজিত এই পেৰেডত ভাগ লৈছিল দেশৰ ৯খন ৰাজ্যৰ পৰা অহা ১৬টা মাৰ্চিং কনটিঞ্জেণ্ট, এটা কেন্দ্ৰীয় শাসিত অঞ্চলৰ আৰক্ষীৰ দল, চাৰিটা কেন্দ্ৰীয় সশস্ত্ৰ আৰক্ষী বাহিনীৰ দল, এনচিচি, আৰু এটা বেণ্ডে।
প্ৰধানমন্ত্ৰী গৰাকীয়ে এটা টুইটযোগে লিখিলে, ‘ভাৰত ৰত্ন চৰ্দাৰ বল্লভভাই পেটেলৰ জন্ম বাৰ্ষিকীত তেখেতক গভীৰ শ্ৰদ্ধাঞ্জলি জনাইছো। ৰাষ্ট্ৰৰ ঐক্য আৰু সাৰ্বভৌমত্ব সংৰক্ষণ তেওঁৰ জীৱনৰ সৰ্বোচ্চ অগ্ৰাধিকাৰ আছিল। তেওঁৰ ব্যক্তিত্ব আৰু কৰ্মই আমাৰ দেশৰ প্ৰতিটো প্ৰজন্মক অনুপ্ৰাণিত কৰি থাকিব।’