প্ৰাক্ ভোগালী বিহু উপলক্ষে নৱ প্ৰজন্মৰ ছাত্ৰ-ছাত্ৰীক অসমীয়া জা-জলপান হেৰাই যাবলৈ ধৰা পিঠা-পনা-লাৰু আদি তৈয়াৰ(Pre-Bhogali Bihu) কৰাৰ পদ্ধতি শিকোৱাৰ লগতে ঋতু অনুসৰি প্ৰস্তুত কৰা পিঠা-জা-জলপানৰ পুষ্টিগত গুণ আদি বিষয়ত জ্ঞান দিবলৈ আমচং চাহ বাগিছা আদৰ্শ বিদ্যালয়ত এক প্ৰদৰ্শনীৰ আয়োজন কৰা হয়।
কেইবাগৰাকী ছাত্ৰ-ছাত্ৰী আৰু অভিভাৱকে অংশগ্ৰহণ কৰা প্ৰদৰ্শনীখনৰ খাদ্য প্ৰস্তুত আৰু পৰিৱেশন এই দুয়োটা দিশৰ ওপৰত বিবেচনা কৰি ছয় গৰাকী ছাত্ৰী ক্ৰমান্বয়ে পূজা দাস, অম্বিকা বড়ো, মুনমী অকবাং, প্ৰিয়াক্ষী বড়ো,লতিকা বড়ো,হিমাদ্ৰী টুমুং আৰু অভিভাৱক অনু লহকৰক বঁটা প্ৰদানৰ বাবে নিৰ্বাচিত কৰা হয়।
প্ৰতিযোগিতাৰ বিচাৰক হিচাপে অংশ গ্ৰহণ কৰে প্ৰধান শিক্ষক উপেন গোস্বামী আৰু শিক্ষয়িত্ৰী মুনমী বৰুৱাই। বিজয়ী প্ৰতিযোগীসকলক বঁটা প্ৰদান কৰে জেষ্ঠ সাংবাদিক উৎপল শইকীয়া আৰু শিক্ষয়িত্ৰী মুনমী বৰুৱাই। বিদ্যালয় খনৰ প্ৰায় ডেৰ শতাধিক ছাত্ৰ-ছাত্ৰী আৰু অভিভাৱক প্ৰদৰ্শনীত উপস্থিত থাকে।