নগাঁও, ১৮ ডিচেম্বৰ: নগাঁও চহৰৰ কলঙৰ বাকৰি নেহেৰুৱালিত ১০৮ সংখ্যক ভোগালী বিহু উৎসৱ উদযাপনৰ প্ৰস্তুতি চলিছে । সদৌ নগাঁও ভোগালী বিহু উৎসৱ উদযাপন সমিতিৰ উদ্যোগত ২০২১ বৰ্ষৰ ১৩, ১৪, ১৫, ১৬ আৰু ১৭ জানুৱাৰীত ৫দিনীয়া কাৰ্যসূচীৰে ভোগালী বিহু উৎসৱ উদযাপন কৰাৰ সিদ্ধান্ত গ্ৰহণ কৰা হৈছে। ঐতিহ্যমণ্ডিত এই ভোগালী বিহু উৎসৱ উদযাপনৰ বাবে নগাঁৱৰ বিশিষ্ট নাগৰিক ৰঞ্জিত কুমাৰ তামুলি ফুকনক সভাপতি, নগাঁও সদৰ সমষ্টিৰ বিধায়ক ৰূপক শৰ্মাক কাৰ্যকৰী সভাপতি আৰু জয়ন্ত বৰা, ৰঞ্জিত বৰাক সাধাৰণ সম্পাদক হিচাপে লৈ এখন শক্তিশালী উদযাপন সমিতি গঠন কৰা হৈছে। পাঁচ দিনীয়া বৰ্ণাঢ্য কাৰ্যসূচীৰে অনুষ্ঠিত হ’ব লগা এই ভোগালী বিহু উৎসৱত সকলোৰে সহযোগিতা কামনা কৰিছে উদযাপন সমিতিয়ে ।
