অসম চৰকাৰৰ বিৰুদ্ধে তীব্ৰ ক্ষোভ উজাৰি সদৌ অসম মাদ্ৰছা ঠিকাভিত্তিক শিক্ষক সন্থাই ৰঙিয়া প্ৰেছ ক্লাৱত বুধবাৰে এখন সংবাদ মেলৰ আয়োজন কৰে। মুখ্যমন্ত্ৰী হিমন্ত বিশ্ব শৰ্মাক কেবাবাৰো বিষয়টো সন্দৰ্ভত অনুনয়-বিনয় কৰিও সুফল পোৱা নাই বুলি আক্ষেপ প্ৰকাশ কৰে সন্থাৰ সভাপতি চাহজাহান চিদ্দিকিয়ে।এইক্ষেত্ৰত মুখ্যমন্ত্ৰীয়ে কেৱল আশ্বাস দিয়ে দ্বায়িত্ব সামৰাৰো অভিযোগ উত্থাপন কৰে। উল্লেখযোগ্য যে বিগত ৯ মাহে দৰমহাৰ পৰা বঞ্চিত হৈ আছে এই সকল মাদ্ৰাছা শিক্ষকে। ২০১০ চনত চৰকাৰে সম্পূৰ্ণ নীতি নিয়ম অনুসৰি নিযুক্তি দিয়া এইসকল ঠিকা ভিত্তিক শিক্ষকৰ মাজৰ কেবল মাত্ৰ ১৪১ গৰাকী মাদ্ৰছা শিক্ষকক এইপৰ্যন্ত দিয়া নাই কোনো সা-সুবিধা। কি কাৰণত ৰাজ্য চৰকাৰে এই সন্দৰ্ভত আজিলৈকে কোনো ব্যৱস্থা গ্ৰহণ কৰা নাই এই বুলিও প্ৰশ্ন উত্থাপন কৰে বঞ্চিত শিক্ষক তথা সন্থাৰ উপ-সভাপতি ডঃ মণি চৌধুৰীয়ে। শেহতীয়াভাৱেদৰমহা নাপাই চিকিৎসাৰ অভাৱত মৃত্যুবৰণ কৰিছে দুগৰাকীকৈ শিক্ষকে। বৰ্তমান পৰিয়াল চলাবলৈও অক্ষম এইসকল শিক্ষকৰ অনতিপলমে তেওঁলোকক পূৰ্বৰদৰেই দৰমহা তথা সা-সুবিধা দিবলৈ চৰকাৰৰ ওচৰত দাবী জনাই,অন্যথা তেওঁলোকে আমৰণ অনশনত বহিব বুলিও হুংকাৰ দিয়ে।
