বড়ো সাহিত্য সভাৰ অহা ২, ৩ আৰু ৪ মে’ত তামুলপুৰৰ কচুবাৰী গৌজন ফৌথাৰত অনুষ্ঠিত হ’বলগীয়া ৬১ সংখ্যক তামুলপুৰ অধিবেশনৰ প্ৰস্তুতিৰ ওপৰত আজি গৌজন ফৌথাৰত বড়ো সাহিত্য সভাৰ তৰফৰ পৰা এখন সংবাদ মেল অনুষ্ঠিত কৰে। সংবাদ মেলত বড়ো সাহিত্য সভাৰ সভাপতি তৰেণ বড়ো ই অংশগ্রহণ কৰি কয়, ” বড়ো সাহিত্য সভাই বিটিআৰৰ প্ৰধান প্ৰমোদ বড়োৰ লগত হোৱা আলোচনা মৰ্মে তামুলপুৰৰ কচুবাৰী গৌজন ফৌথাৰত ৬১ সংখ্যক বড়ো সাহিত্য সভা অনুষ্ঠিত কৰাৰ বাবে সিদ্ধান্ত লৈ এখন শক্তিশালী অভ্যৰ্থনা সমিতি গঠন কৰা হয়। বিটিআৰৰ কাৰ্যবাহী সদস্য ধৰ্ম নাৰায়ণ দাসক সভাপতি আৰু ৰত্নেশ্বৰ বড়োক সাধাৰণ সম্পাদক হিচাপে লৈ ২১ খন উপ সমিতিৰে এক শক্তিশালী অভ্যৰ্থনা সমিতি গঠন কৰা হয়। এই অঞ্চলৰ সকলো জাতি জনগোষ্ঠীৰ যথেষ্ট সহাৰি পাইছো আৰু মহামান্য ৰাষ্ট্ৰপতিক মুখ্য অতিথিৰে এক ঐতিহাসিক অধিবেশন অনুষ্ঠিত কৰিবলৈ লৈছো। য’ত ৰাজ্যৰ উপৰিও বাংলাদেশ, ত্ৰিপুৰা আৰু নেপালৰ পৰা প্ৰতিনিধি আৰু অতিথিয়ে অংশগ্রহণ কৰিব।সেয়ে জাতি, ধৰ্ম, বৰ্ণ নিৰ্বিশেষে সকলো লোকে শান্তি সাম্প্রীতিৰে অংশগ্রহণ কৰাৰ বাবে আহ্বান জনাইছো।
“বড়ো সাহিত্য সভাৰ সভাপতি তৰেণ বড়োই কাৰ্যসূচী সমূহ প্ৰকাশ কৰা সংবাদ মেলৰ পিছত অসমৰ কেবিনেট মন্ত্রী উৰ্খাও গৌৰা ব্ৰহ্মই বড়ো সাহিত্য সভাৰ ওপৰত সংবাদ মাধ্যমৰ আগত কয়, ” বড়ো সাহিত্য সভাৰ ৬১ সংখ্যক অধিবেশনৰ প্ৰস্তুতি চাবলৈ আজি মই আহিছো আৰু বড়ো সাহিত্য সভাৰ ৭০ বছৰীয়া কালত কোনো দিনে যিহেতু ৰাষ্ট্ৰপতি অথবা প্ৰধান মন্ত্ৰী অহা নাছিল সেয়ে ই ঐতিহাসিক অধিবেশন হবলৈ গৈ আছে। বিটিআৰৰ চৰকাৰৰ লগতে অসম চৰকাৰ আৰু মুখ্য মন্ত্রীৰ তৰফৰ পৰাও যথেষ্ট সহযোগিতা লাভ কৰিছো। সেয়ে আমি সকলো দিশত নিয়াৰিকৈ পৰিচালনা কৰি এখন অধিবেশন অনুষ্ঠিত কৰিবলৈ গৈছো। “