দৈনন্দিন বাৰ্তা ডেস্ক : দেশত ক’ৰোনাত আক্ৰান্তৰ সংখ্যা বৃদ্ধি পাই আছে ৷ ইয়াৰ লগতে মৃত্যুৰ সংখ্যাও বাঢ়ি আছে৷ এনে সময়তে দেশৰ ১০ খন ৰাজ্যৰ মুখ্যমন্ত্ৰীৰ সৈতে ভিডিঅ’ কনফাৰেন্স যোগে সভাত বহিল প্ৰধানমন্ত্ৰী নৰেন্দ্ৰ মোডী৷ উল্লেখ্য যে দেশৰ ক’ৰোনাত আক্ৰান্ত হোৱা ৰাজ্যকেইখনৰ ভিতৰত ৮০ শতাংশ হ’ল ১০খন ৰাজ্যৰ৷ সেই ৰাজ্যকেইখন হ’ল মহাৰাষ্ট্ৰ, অন্ধ্রপ্রদেশ, কৰ্ণাটক, পশ্চিমবংগ, পাঞ্জাৱ, বিহাৰ, তামিলনাডু, উত্তৰপ্রদেশ, গুজৰাট, তেলংগানা। এই ৰাজ্যকেইখনৰ মুখ্যমন্ত্ৰীসকলৰ সৈতে মঙলবাৰে সভাত বহে প্ৰধানমন্ত্ৰী মোডী৷ প্ৰধানমন্ত্ৰীয়ে কয়, এই ১০ খন ৰাজ্যত ক’ৰোনাক হৰুৱালে গোটেই দেশ জয়ী হ’ব৷ মৃত্যুৰ হাৰ এই প্ৰথম কমিছে৷ তাকে লৈ সভাত সন্তোষ প্ৰকাশ কৰে ৷ প্ৰধানমন্ত্ৰীয়ে কয়, ক’ৰোনা মোকাবিলাত আমি সঠিক পথত গৈছো৷ ঐক্যবদ্ধভাৱে আমি ক’ৰোনা ৰোধ কৰিম৷ তদুপৰি ক’ৰোনা মোকাবিলাত কেইটামান ঔষধৰ কথা ক’লে মোডীয়ে৷ তেওঁৰ মতে, এই পৰ্যন্ত আমাৰ যি অভিজ্ঞতা তাৰ পৰা কেইটামান বিষয় স্পষ্ট৷ ক’ৰোনা নিয়ন্ত্ৰণ কৰিবলৈ হ’লে ৰোগীৰ সন্ধান কৰা, তেওঁলোকৰ ওপৰত দৃষ্টি দিয়া আৰু প্ৰয়োজনত কোৱাৰেণ্টাইন কৰা৷ এই তিনিটা বিষয় সকলোতকৈ কাৰ্যকৰী অস্ত্ৰ ৷ তেওঁ লগতে কয়, বিশেষজ্ঞসকলে কয় যে যদি ক’ৰোনা সংক্ৰমিত হোৱাৰ ৭২ ঘণ্টাৰ ভিতৰত ৰোগী চিহ্নিত কৰা হয় তেনে সেই ৰোগীৰ পৰা ক’ৰোনা সংক্ৰমণ হোৱাৰ আশংকা অতি কম৷ এজনৰ সংক্ৰমণ ধৰা পৰিলে ৭২ ঘণ্টাৰ ভিতৰত পৰিয়ালৰ বাকীসকলৰ পৰীক্ষা কৰিব লাগে৷ মোডীৰ পৰামৰ্শ, কোৱাৰেণ্টাইন জ’নবোৰ সম্পূৰ্ণ বেলেগে ৰাখিব লাগে৷ বিহাৰ, পশ্চিম বংগ, গুজৰাট, তেলেংগানাত ক’ৰোনা পৰীক্ষা বঢ়োৱা হ’ব৷ দিল্লীত নিৰ্দিষ্ট ৰ’ডমেপ মানি পৰিস্থিতি নিয়ন্ত্ৰণলৈ অনা হৈছে ৷ সভাত বাৰম্বাৰ প্ৰধানমন্ত্ৰীয়ে ঐক্যবদ্ধভাৱে ক’ৰোনা মোকাবিলা কৰাত জোৰ দিয়ে ৰাজ্যবোৰক৷ ক’ৰোনা মোকাবিলা কৰাত ইয়াকে লৈ সপ্তমবাৰ ৰাজ্যৰ মুখ্যমন্ত্ৰীৰ লগত সভাত বহিল প্ৰধানমন্ত্ৰী ৷ ইপিনে কেন্দ্ৰীয় স্বাস্থ্য মন্ত্ৰালয়ে মঙলবাৰে পুৱা জনায় যে যোৱা ২৪ ঘণ্টাত দেশত ক’ৰোনাত আক্ৰান্ত হৈছে ৫৩ হাজাৰ ৬০১ জন৷ ইয়াকে লৈ দেশত মুঠ ক’ৰোনাত আক্ৰান্তৰ সংখ্যা হ’ল ২২ লাখ ৬৮ হাজাৰ ৬৭৫জন ৷ দেশত যোৱা ২৪ ঘণ্টাত ক’ৰোনাত মৃত্যু হৈছে ৮৭১জন ৷
