চৰকাৰৰ নতুন উদ্যোগ নীতিৰ অধ্যাদেশ প্ৰত্যাহাৰৰ দাবীত নাজিৰাৰ প্ৰান্তে প্ৰান্তে উত্তাল প্ৰতিবাদ বিভিন্ন সংগঠনৰ।

নাজিৰা : জাতি-মাটি-ভেটি সুৰক্ষাৰ কথাৰে ৰাজপাট দখল কৰা বিজেপি নেতৃত্বাধীন অসম চৰকাৰে শেহতীয়াকৈ নতুন উদ্যোগ নীতিৰ অধ্যাদেশৰ সিদ্ধান্ত গ্ৰহণ কৰি অসমৰ খিলঞ্জীয়া জনসাধাৰণৰ হাতত থকা বাকী কৃষি ভূমিসমূহ বহিৰাগত পুজিপতিৰ হাতত গতাই দিয়াৰ পদক্ষেপৰ বিৰুদ্ধে অসমৰ প্ৰান্তে প্ৰান্তে প্ৰতিবাদৰ ৰণডংকাৰ সূচনা কৰি উত্তাল কৰি তুলিছে বিভিন্ন দল-সংগঠনে। চৰকাৰৰ এই হঠকাৰী সিদ্ধান্তৰ তীব্ৰ বিৰোধিতা কৰি নতুন উদ্যোগ নীতিৰ অধ্যাদেশ প্ৰত্যাহাৰৰ দাবী জনাই আজি নাজিৰাতো বিভিন্ন সংগঠনে উত্তাল প্ৰতিবাদ সাব্যস্ত কৰে। কৃষক মুক্তি সংগ্ৰাম সমিতিৰ শিমলুগুৰি আঞ্চলিক সমিতিৰ সভাপতি বিকাশ ফুকন, যুটীয়া সম্পাদকদ্বয় পৰাগ কুমাৰ গগৈ,  অৰিন্দম শইকীয়া আৰু উপ-সভাপতি মানস দত্তৰ নেতৃত্বত নাজিৰা ৰাজহ চক্ৰ বিষয়া কাৰ্যালয়ৰ সন্মুখত তিনিঘণ্টীয়া অৱস্থান ধৰ্মঘট কাৰ্যসূচী ৰূপায়ণ কৰাৰ লগতে নতুন উদ্যোগ নীতিৰ অধ্যাদেশ প্ৰত্যাহাৰ কৰা আৰু অসমবাসীৰ ভূমিৰ অধিকাৰ সুৰক্ষিত কৰাৰ দাবীত সংগঠনটোৱে নাজিৰা ৰাজহ চক্ৰ বিষয়াৰ জৰিয়তে অসমৰ মুখ্যমন্ত্ৰীলৈ এখনি স্মাৰক পত্ৰ প্ৰদান কৰে। আনহাতে টাই আহোম যুৱ পৰিষদৰ নাজিৰা মহকুমা সমিতিয়ে নাজিৰা নাট্য মন্দিৰৰ সন্মুখত, বৃহত্তৰ অসমীয়া যুৱ মঞ্চ আৰু বীৰ লাচিত সেনাৰ নাজিৰা মহকুমা সমিতিয়ে নাজিৰা নগৰ চাৰিআলিত অসমৰ মুখ্যমন্ত্ৰী সৰ্বানন্দ সোনোৱাল, উদ্যোগ মন্ত্ৰী চন্দ্ৰ মোহন পাটোৱাৰী আৰু খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰীৰ প্ৰতিকৃতি দাহ কৰে। টাইপাৰ কেন্দ্ৰীয় সমিতিৰ উপ-সভাপতি যতীন বৰুৱা, সাংগাঠনিক সম্পাদক প্ৰাঞ্জল বৰুৱা, সাংস্কৃতিক সম্পাদক অৰুণ ৰাজকোঁৱৰ, নাজিৰা মহকুমা সমিতিৰ সভাপতি ৰাতুল দুৱৰা, কাৰ্যকৰী সভাপতি দিলীপ গগৈ, যুটীয়া সম্পাদকদ্বয় অসীম ৰঞ্জন বুঢ়াগোহাঁই, ৰিদিপ গগৈৰ লগতে নাজিৰা, পিয়লি ফুকন আৰু গেলেকী আঞ্চলিক সমিতিৰ ভিলেকেইজন বিষয়-ববীয়াই উক্ত কাৰ্যসূচীত অংশগ্ৰহণ কৰি বিভিন্ন চৰকাৰ বিৰোধী শ্ল’গানেৰে ধৰ্ণা দি নতুন উদ্যোগ নীতিৰ অধ্যাদেশ প্ৰত্যাহাৰৰ দাবীত উত্তাল প্ৰতিবাদ সাব্যস্ত কৰে।