দৈনন্দিনবাৰ্তাডেস্ক:
ৰাজস্থানৰ মুখ্যমন্ত্ৰী অশোক গেহলটৰ ভাতৃৰ ঘৰত অভিযান চলালে এনফৰ্চমেণ্ট ডিৰেক্টৰে ৷ সাৰ কেলেংকাৰীত নাম সাঙোৰ খোৱাৰ বাবে জেৰাৰ সন্মুখীন হ’ব অগ্ৰসেন গেহলট৷ তেওঁৰ বিৰুদ্ধে ধন আত্মসাতৰ অভিযোগ উত্থাপন হৈছে৷ ইডি (এনফৰ্চমেণ্ট ডিৰেক্টৰ)ৰ সূত্ৰত জানিব পৰা মতে ইতিমধ্যে সাৰ কেলেংকাৰীৰ বাবে অগ্ৰসেন গেহলটক সাত কোটি টকা গ্ৰাহকক দিবলৈ নিৰ্দেশ দিয়া হৈছে ৷ উল্লেখ্য যে ৰাজস্থানৰ প্ৰায় ১৩ ঠাইত ইডিয়ে অভিযান চলাইছে ৷ তদুপৰি দুটা বাংলোৰ লগতে গুজৰাটৰ চাৰি আৰু দিল্লীৰ এঠাইত তালাচী চলোৱা হৈছে৷ ২০০৭-২০০৯ চনত কেন্দ্ৰত কংগ্ৰেছ নেতৃত্বাধীন ইউপিএ চৰকাৰ থকা সময়ত ৰাজসাহায্যৰ ৰাসায়নিক সাৰ বিদেশলৈ ৰপ্তানি কৰে অগ্ৰসেনৰ প্ৰতিষ্ঠানে ৷ গ্ৰাহৰক অভিযোগৰ ভিত্তিত ইডিয়ে তদন্ত আৰম্ভ কৰে ৷ অগ্ৰসেনৰ বিৰুদ্ধে ধন আত্মসাত প্ৰতিৰোধ আইনত গোচৰ ৰুজু কৰিছে ইডিয়ে ৷ ২০১৭ চনৰ নৱেম্বৰ মাহত অগ্ৰসেন গেহলটৰ বিৰুদ্ধে দুৰ্নীতিৰ অভিযোগ আনিছিল বিজেপিয়ে৷ অভিযোগত প্ৰকাশ যে কেন্দ্ৰত কংগ্ৰেছ চৰকাৰ থকা সময়ত ৰাজসাহায্য প্ৰাপ্ত ৰাসায়নিক সাৰ বিদেশলৈ ৰপ্তানি কৰিছে অগ্ৰসেনৰ প্ৰতিষ্ঠানে ৷ এই সাৰ বিদেশলৈ ৰপ্তানি কৰা আইন বিৰুদ্ধ ৷