নৰেন্দ্ৰ মোদী, ভাৰতৰ প্ৰধানমন্ত্ৰীঃ আজি শ্ৰী ৰতন টাটাজীৰ(Ratan Naval Tata) মৃত্যুৰ এমাহ পূৰ্ণ হ’ল। যোৱা মাহৰ আজিৰ দিনটোতে, যেতিয়া মই তেওঁৰ মৃত্যুৰ খবৰ পাইছিলো, মই সেই সময়ত আছিয়ান সন্মিলনলৈ যোৱাৰ বাবে প্ৰস্তুতি চলাই আছিলো। ৰতন টাটাজী আমাৰ পৰা আঁতৰি যোৱাৰ বেদনাই এতিয়াও মোৰ মনত দুখ দি আছে।
তেওঁ নথকাৰ এই বিষটো পাহৰি যোৱাটো সহজ কথা নহয়। ৰতন টাটাজীক হেৰুৱাই ভাৰতে ইয়াৰ এজন মহান পুত্ৰক হেৰুৱাইছে। দেশে এক অমূল্য ৰত্ন হেৰুৱাইছে।(PM Narendra Modi)
আজিও চহৰৰ পৰা গাঁৱলৈকে মানুহে তেওঁ নথকাৰ কথা গভীৰভাৱে অনুভৱ কৰিছে। আমি সকলোৱে এই দুখৰ সমভাগী।
উদ্যোগখণ্ডৰ উদীয়মান উদ্যোগীয়েই হওঁক বা পেছাদাৰীয়েই হওঁক, সকলোৱে তেওঁৰ মৃত্যুত দুখ প্ৰকাশ কৰিছে।পৰিৱেশ সুৰক্ষাৰ সৈতে জড়িত লোকসকল, সমাজ সেৱাৰ সৈতে জড়িত লোকসকলো তেওঁৰ মৃত্যুত সমানে ম্ৰিয়মান। কেৱল ভাৰততে নহয় , সমগ্ৰ বিশ্বই ৰতন টাটাৰ মৃত্যুত দুখ অনুভৱ কৰিছে।(Prime Minister of India)
যুৱসকলৰ বাবে শ্ৰী ৰতন টাটা এক অনুপ্ৰেৰণা আছিল। তেওঁৰ জীৱন, তেওঁৰ ব্যক্তিত্বই আমাক সোঁৱৰাই দিয়ে যে এনে কোনো সপোন নাই যাক পূৰণ কৰিব নোৱাৰি, এনে কোনো লক্ষ্য নাই য’ত উপনীত হ’ব নোৱাৰি। ৰতন টাটাজীয়ে সকলোকে শিকাই গৈছে যে আনক নম্ৰ প্ৰকৃতিৰে সহায় কৰিও সফলতা অৰ্জন কৰিব পাৰি।
ৰতন টাটা জী ভাৰতৰ উদ্যোগ খণ্ডৰ সৰ্বশ্ৰেষ্ঠ পৰম্পৰাৰ এক প্ৰতিভূ আছিল। তেওঁ নিৰ্ভৰযোগ্যতা, উৎকৃষ্টতা আৰু উৎকৃষ্ট সেৱাৰ দৰে মূল্যবোধৰ এক অটল প্ৰতিনিধি আছিল।
তেওঁৰ নেতৃত্বতে টাটা গোটে সমগ্ৰ বিশ্বতে সন্মান, সততা আৰু বিশ্বাসযোগ্যতাৰ প্ৰতীক হিচাবে নতুন শিখৰত আৰোহণ কৰিবলৈ সক্ষম হৈছিল। ইমান সফলতাৰ পিছতো তেওঁ সম্পূৰ্ণ নম্ৰতা আৰু বিনয়েৰে সকলো কৃতিত্ব গ্ৰহণ কৰিছিল।
আনৰ সপোনক নৱৰূপ দান কৰা, আনক তেওঁলোকৰ সপোন পূৰণ কৰাত সহায় কৰা, এয়া আছিল শ্ৰী ৰতন টাটাৰ আটাইতকৈ উৎকৃষ্ট গুণবোৰৰ ভিতৰৰে এটা ।
শেহতীয়া বছৰবোৰত তেওঁ ভাৰতৰ ষ্টাৰ্টআপৰ ক্ষেত্ৰখনক পথ প্ৰদৰ্শন কৰাৰ লগতে ভৱিষ্যতৰ সম্ভাৱনাৰে পৰিপূৰ্ণ উদ্যোগত বিনিয়োগ ককৰাৰ বাবে আগবাঢ়ি আহিছিল। তেওঁ যুৱ উদ্যোগীসকলৰ আশা আৰু আকাংক্ষাৰ লগতে ভাৰতৰ ভৱিষ্যত গঢ়ি তোলাৰ সম্ভাৱনাৰ কথাও হৃদয়াংগম কৰিব পাৰিছিল।
ভাৰতৰ যুৱপ্ৰজন্মৰ প্ৰচেষ্টাক সমৰ্থন কৰি তেওঁ নতুন প্ৰজন্মক নতুন সপোন দেখিবলৈ আৰু আৰু সকলো বিপদাশংকা কান্ধ পাতি ল’বলৈ উৎসাহিত কৰিছিল। তেওঁৰ পদক্ষেপে ভাৰতত উদ্ভাৱন আৰু উদ্যোগৰ সংস্কৃতি বিকশিত কৰাত সহায় কৰিছে। আমি নিশ্চিতভাৱে আগন্তুক দশকবোৰত ভাৰতত ইয়াৰ ইতিবাচক প্ৰভাৱ দেখিবলৈ পাম।
ৰতন টাটাজীয়ে সদায় সৰ্বশ্ৰেষ্ঠ মানৰ সামগ্ৰী প্ৰস্তুত কৰি আহিছিল। তেওঁ সদায় সেৱাৰ সৰ্বশ্ৰেষ্ঠ মানৰ ওপৰত গুৰুত্ব আৰোপ কৰিছিল আৰু ভাৰতীয় উদ্যোগসমূহক বিশ্বব্যাপী মান নিৰ্ধাৰণ কৰাৰ পথ দেখুৱাইছিল।
আজি যিটো সময়ত ভাৰতে ২০৪৭ চনৰ ভিতৰত বিকাশৰ লক্ষ্যৰ দিশে আগবাঢ়িছে, আমি কেৱল এক বিশ্বব্যাপী মান নিৰূপণ কৰিহে বিশ্বত আমাৰ বিজয়ৰ ধ্বজা উত্তোলন কৰিব পাৰিম। মই আশা কৰোঁ যে তেওঁৰ দৃষ্টিভংগীয়ে আমাৰ দেশৰ ভৱিষ্যত প্ৰজন্মক অনুপ্ৰাণিত কৰিব আৰু ভাৰতে বিশ্বমানৰ মান নিশ্চিতকৰণেৰে নিজৰ পৰিচয় শক্তিশালী কৰিব।
ৰতন টাটাৰ মাহাত্ম্য বোৰ্ডৰ সদস্য বা সহকৰ্মীসকলক সহায় কৰাতে সীমাবদ্ধ নাছিল। সকলো জীৱৰ প্ৰতি তেওঁৰ সহানুভূতি আছিল। জন্তুৰ প্ৰতি তেওঁৰ গভীৰ প্ৰেমৰ কথা সুবিদিত। তেওঁ জীৱ-জন্তুৰ কল্যাণৰ বাবেও বিভিন্ন প্ৰচেষ্টাক গ্ৰহণ কৰিছিল।
তেওঁ প্ৰায়ে তেওঁৰ কুকুৰবোৰৰ ফটো শ্বেয়াৰ কৰিছিল, যিবোৰ তেওঁৰ জীৱনৰ এক অবিচ্ছেদ্য অংশ আছিল। মোৰ মনত আছে যেতিয়া মানুহে ৰতন টাটাজীক বিদায় জনাবলৈ ভিৰ কৰিছিল… সেই সময়ত তেওঁৰ মৰমৰ কুকুৰ ‘গোৱা’ও সেমেকা চকুৰে তাত উপস্থিত হৈছিল।
ৰতন টাটা জীৰ জীৱনৰ এটা পৰম উপলব্ধি এয়াই আছিল যে নেতৃত্ব কেৱল কৃতিত্বৰ দ্বাৰা নহয়, আটাইতকৈ দুৰ্বল লোকসকলৰ কথা চিন্তা কৰি তেওঁলোকৰ হকে কাম কৰাৰ সামৰ্থ্যৰ দ্বাৰাও বিচাৰ কৰা হয়।
ৰতন টাটাজীয়ে সদায় নেশ্যন ফাৰ্ষ্টৰ ভাবনাক সৰ্বোচ্চ স্থান দিছিল। ২৬/১১ ৰ সন্ত্ৰাসবাদী আক্ৰমণৰ পিছত মুম্বাইত তেওঁ প্ৰতিষ্ঠা কৰা তাজ হোটেলখন পুনৰ সময়ৰ বিলম্ব নকৰি তৎক্ষণাৎ মুকলি কৰাটো সংকটৰ সময়ত ৰাষ্ট্ৰ ঐক্যবদ্ধ হোৱাৰ এক প্ৰতীক হিচাবে পৰিগণিত হৈছিল।
তেওঁৰ এনে পদক্ষেপে এটা ডাঙৰ বাৰ্তা দিছিল যে – ভাৰত ৰুদ্ধ হৈ নপৰে … ভাৰত নিৰ্ভীক আৰু সন্ত্ৰাসবাদৰ ওচৰত শিৰনত কৰিবলৈ অস্বীকাৰ কৰিছে।
ব্যক্তিগতভাৱে, মই যোৱা কেইটামান দশকত তেওঁক ঘনিষ্ঠভাৱে জনাৰ সৌভাগ্য লাভ কৰিছো। আমি গুজৰাটত একেলগে কাম কৰিছিলো। তেওঁলোকৰ কোম্পানীবোৰৰ দ্বাৰা বৃহৎ বিনিয়োগ কৰা হৈছিল। সেইবোৰৰ ভিতৰত এনে বহু প্ৰকল্প অন্তৰ্ভুক্ত আছিল, যিবোৰকলৈ তেওঁ অতি আৱেগিক আৰু উৎসাহিত আছিল।
যেতিয়া মই কেন্দ্ৰত শাসনভাৰ লোৱা চৰকাৰত যোগদান কৰিছিলো, আমি আমাৰ ঘনিষ্ঠ বাৰ্তালাপ অব্যাহত ৰাখিছিলো আৰু তেওঁ সদায় আমাৰ ৰাষ্ট্ৰ নিৰ্মাণৰ প্ৰচেষ্টাত এক প্ৰতিশ্ৰুতিবদ্ধ অংশীদাৰ হৈ আছিল।
স্বচ্ছ ভাৰত অভিযানৰ প্ৰতি শ্ৰী ৰতন টাটাৰ উৎসাহে মোৰ হৃদয় বিশেষভাবে স্পৰ্শ কৰিছিল। তেওঁ এই গণ আন্দোলনৰ এগৰাকী উল্লেখনীয় তথা সক্ৰিয় সমৰ্থক আছিল। তেওঁ বুজি পাইছিল যে ভাৰতৰ প্ৰগতিৰ বাবে পৰিষ্কাৰ পৰিচ্ছন্নতা আৰু স্বাস্থ্যকৰ অভ্যাস কিমান গুৰুত্বপূৰ্ণ।
অক্টোবৰৰ আৰম্ভণিতে স্বচ্ছ ভাৰত অভিযানৰ দশম বাৰ্ষিকীত তেওঁ প্ৰকাশ কৰা ভিডিঅ’ বাৰ্তাটো মোৰ এতিয়াও মনত আছে। এই ভিডিঅ’ বাৰ্তাটো তেওঁৰ অন্তিম ৰাজহুৱা উপস্থিতিৰ ভিতৰৰে এটা হিচাবে পৰিগণিত হৈছে।
কৰ্কট ৰোগৰ বিৰুদ্ধে যুঁজ দিয়াটো তেওঁৰ আন এক লক্ষ্য আছিল, যিটো আহ্বান তেওঁৰ হৃদয়ৰ পৰাই অনুৰণিত হৈছিল। মই দুবছৰ পূৰ্বে অসমত হোৱা অনুষ্ঠানটোৰ কথা মনত পেলাইছো , য’ত আমি যুটীয়াভাৱে ৰাজ্যখনৰ বিভিন্ন কৰ্কট চিকিৎসালয় উদ্বোধন কৰিছিলো।
সেই উপলক্ষে দিয়া ভাষণত তেওঁ স্পষ্টকৈ কৈছিল যে তেওঁ জীৱনৰ অন্তিম বছৰবোৰ স্বাস্থ্য খণ্ডলৈ উৎসৰ্গা কৰিব বিচাৰে। স্বাস্থ্যসেৱা আৰু কৰ্কট ৰোগৰ যত্ন সুলভ তথা সহজ কৰি তোলাৰ বাবে তেওঁ গ্ৰহণ কৰা প্ৰচেষ্টাই এই কথা প্ৰমাণ কৰিছে যে কৰ্কট ৰোগত আক্ৰান্ত লোকসকলৰ প্ৰতি তেওঁ কিমান সহানুভূতিশীল আছিল।
মই ৰতন টাটাজীক এজন বিদ্বান ব্যক্তি হিচাপেও মনত ৰাখিছো- তেওঁ প্ৰায়ে মোলৈ বিভিন্ন বিষয়ত লিখি পঠিয়াইছিল, সেয়া শাসনৰ বিষয়েই হওঁক, কামৰ প্ৰশংসা কৰাই হওঁক বা নিৰ্বাচনত জয়ী হোৱাৰ পিছত অভিনন্দন বাৰ্তা প্ৰেৰণ কৰাই হওঁক।
মাত্ৰ কেইসপ্তাহমান আগতে, মই স্পেইনৰ চৰকাৰৰ ৰাষ্ট্ৰপতি শ্ৰীযুত পেদ্ৰো ছানছেজৰ সৈতে বদোদৰাত আছিলো আৰু আমি যুটীয়াভাৱে এটা বিমান নিৰ্মাণ কাৰখানা উদ্বোধন কৰিছিলো।
ভাৰতত চি-২৯৫ বিমানখন এই কাৰখানাতে নিৰ্মাণ কৰা হ’ব। শ্ৰীযুত ৰতন টাটাই এই কামটো আৰম্ভ কৰিছিল। সেই সময় খিনিত মই শ্ৰীযুত ৰতন টাটাক বহুত মনত পেলাইছিলো।
আজি যেতিয়া আমি তেওঁক স্মৰণ কৰিছো, এই সময়ত আমি তেওঁ কল্পনা কৰা সমাজখনৰ কথাও মনত ৰাখিব লাগিব। য’ত ব্যৱসায়ে ভাল কামৰ বাবে এক শক্তি হিচাপে কাম কৰে, য’ত প্ৰতিজন ব্যক্তিৰ সম্ভাৱনাক মূল্য দিয়া হয় আৰু য’ত সকলোৰে কল্যাণ তথা সুখৰ ওপৰত আধাৰ কৰি প্ৰগতিৰ সোপান ৰচনা কৰা হয়।
ৰতন টাটাজী এতিয়াও তেওঁৰ জীৱন দৰ্শন আৰু সপোনবোৰৰ মাজতে জীয়াই আছে, যি সপোন তেওঁ পূৰণ কৰিছিল। ভাৰতক এক উন্নত, সহানুভূতিশীল আৰু আশাৰ দেশ হিচাপে গঢ়ি তোলাৰ বাবেই অনাগত দিনত সকলো প্ৰজন্ম ৰতন টাটাজীৰ ওচৰত চিৰকৃতজ্ঞ হৈ থাকিব।