নগাঁও, ২২ডিচেম্বৰ : মধ্যঅসমৰ উচ্চশিক্ষাৰ একমাত্ৰ প্ৰতিষ্ঠান হিচাপে পৰিচিত ঐতিহ্যমণ্ডিত নগাঁও মহাবিদ্যালয়ক বিশ্ববিদ্যালয় অনুদান আয়োগে অট’নমাছ কলেজৰ স্বীকৃতি প্ৰদান কৰিছে। গুৱাহাটী বিশ্ববিদ্যালয়ৰ অধীনস্থ প্ৰথমখন মহাবিদ্যালয় হিচাপে নগাঁও মহাবিদ্যালয়ে এই স্বীকৃতি লাভ কৰিছে। ইয়াৰ পূৰ্বে ডিব্ৰুগড় বিশ্ববিদ্যালয়ৰ অধীনস্থ যোৰহাট জে বি কলেজ আৰু লক্ষীমপুৰ মহাবিদ্যালয়ক বিশ্ববিদ্যালয় অনুদান আয়োগে এই স্বীকৃতি লাভ কৰিছে। উল্লেখযোগ্য যে, যোৱা ৬ডিচেম্বৰত বিশ্ববিদ্যালয় অনুদান আয়োগৰ অধীনৰ এটি সঁজাতি দলে নগাঁও মহাবিদ্যালয় পৰিদৰ্শন কৰিছিল। মহাবিদ্যালয় খনৰ অধ্যক্ষ ড° শৰৎ বৰকটকী, বিধায়ক ৰূপক শৰ্মা আৰু মহাবিদ্যালয় খনৰ শিক্ষক-কৰ্মচাৰীৰ সৈতে এক বৈঠকতো মিলিত হৈছিল। সেই বৈঠকতে নগাঁও মহাবিদ্যালয়ক অট’নমাছ কলেজ ৰূপে স্বীকৃতি দিয়াৰ বাবে বিশ্ববিদ্যালয় অনুদান আয়োগৰ দলটোৱে সকলো দিশ পৰ্য্যবেক্ষণ কৰিছিল। অৱশেষত আজি বিশ্ববিদ্যালয় অনুদান আয়োগে নগাঁও মহাবিদ্যালয়ক এই স্বীকৃতি প্ৰদান কৰিছে। এতিয়াৰে পৰা মহাবিদ্যালয় খনে সকলো কাৰ্য স্বতন্ত্ৰ ভাৱে পৰিচালনা কৰিব পাৰিব। আনহাতে এই খবৰ লাভ কৰাৰ লগে লগে বিধায়ক ৰূপক শৰ্মাই মহাবিদ্যালয় খনৰ অধ্যক্ষ তথা সকলো শিক্ষক-শিক্ষয়ত্ৰী,কৰ্মচাৰী আৰু ছাত্ৰ-ছাত্ৰীলৈ শুভেচ্ছা জ্ঞাপন কৰি কয় যে, নগাঁও মহাবিদ্যালয়ৰ প্ৰাক্তন ছাত্ৰ আৰু প্ৰাক্তন ছাত্ৰ সন্মিলনীৰ সভাপতি হিচাপে আমি গৌৰৱবোধ কৰিছো। ইপিনে মহাবিদ্যালয়খনৰ অধ্যক্ষ ড° শৰৎ বৰকটকীয়ে এই সফলতাৰ বাবে মহাবিদ্যালয় খনৰ শিক্ষক-কৰ্মচাৰীৰ লগতে ন-পুৰণি সকলো ছাত্ৰ-ছাত্ৰীকে অভিনন্দন জনাই।
