দৈনন্দিন বাৰ্তাৰ ডেস্ক :
প্রতি ২৪ ঘণ্টাত নতুন ক’ৰোনা সংক্রমণে অভিলেখ সৃষ্টি কৰিছে ৷ কমাব পৰা নাই সংক্ৰমণ ৷ শুকুৰবাৰে পুৱা কেন্দ্ৰীয় স্বাস্থ্য মন্ত্ৰালয়ৰ তথ্য মতে যোৱা ২৪ ঘণ্টাত ভাৰতত ১৭,২৯৬ জন লোক নতুনকৈ ক’ৰোনাত আক্ৰান্ত হৈছে৷ ইয়াৰ লগতে ৪০৭ জনৰ মৃত্যু হৈছে ৷ এতিয়া দেশত মুঠ ক’ৰোনাত আক্ৰান্তৰ সংখ্যা ৪,৯০,৪০১ জন ৷ এই পৰ্যন্ত মুঠ মৃত্যুৰ সংখ্যা ১৫,৩০১ জন ৷ ইয়াৰ মাজতে দেশত সুস্থৰ সংখ্যা বাঢ়িছে৷ ইয়াৰ পৰিমাণ হ’ল ৫৮.২৪ শতাংশ। এই পৰ্যন্ত দেশত ২,৮৫,৬৩৭ জন লোক সুস্থ হৈছে৷ কিন্তু ২৪ ঘণ্টাত নতুনকৈ সংক্ৰমণ হোৱা কথাই চিকিৎসকসকলৰ মাজত উদ্বেগৰ সৃষ্টি হৈছে৷ আক্ৰান্তৰ তালিকাত শীৰ্ষত আছে মহাৰাষ্ট্ৰ৷ এইখন ৰাজ্যত যোৱা ২৪ ঘণ্টাত নতুনকৈ আক্ৰান্ত হয় ৪,৮৪১ জন। ৰাজ্যখনত মুঠ আক্ৰান্তৰ সংখ্যা হ’ল ১,৪৭,৭৪১ জন ৷ কেৱল মুম্বাইতে আক্ৰান্ত হৈছে ৭০,৯৯০ জন ৷ ইয়াৰ পাছত আছে দিল্লী, তামিলনাডু, গুজৰাট, উত্তৰ প্ৰদেশ, ৰাজস্থান আৰু পশ্চিম বংগ ৷ দিল্লীত মুঠ আক্ৰান্তৰ সংখ্যা হ’ল ৭৩,৭৮০ জন৷ তৃতীয় স্থানত থকা তামিলনাডুত মুঠ আক্ৰান্ত হ’ল ৭০,৯৭৭ জন ৷ তালিকাৰ চতুৰ্থত থকা গুজৰাটত মুঠ আক্ৰান্ত হ’ল ২৯,৫২০ জন৷ মৃত্যুৰ তালিকাত সকলোবোৰ ৰাজ্যৰ ভিতৰত ওপৰত আছে মহাৰাষ্ট্ৰ৷ এইখন ৰাজ্যত সাত হাজাৰ লোকৰ মৃত্যু হৈছে ৷ দিল্লীত ২৪২৯, গুজৰাটত ১৭৫৩, পশ্চিম বংগত ৬০৬ জনৰ মৃত্যু হৈছে৷ এই পৰ্যন্ত দেশত ৭৭,৭৬,২২৮ জন লোকৰ নমুনা পৰীক্ষা কৰা হৈছে ৷ যোৱা ২৪ ঘণ্টাত ২,১৫,৪৪৬ জন লোকৰ নমুনা পৰীক্ষা কৰে ৷