উচ্চতম ন্যায়ালয়ৰ ৰায় : সংৰক্ষণ কোনো মৌলিক অধিকাৰ নহয় ।
দৈনন্দিন বাৰ্তা
সংৰক্ষণক লৈ তাৎপর্যপূর্ণ ৰায় দিলে দেশৰ উচ্চতম ন্যায়ালয়ে৷ এটা গোচৰৰ সন্দৰ্ভত আদালতে কয় যে সংৰক্ষণ কোনো মৌলিক অধিকাৰ নহয়৷ সেয়ে কোটাৰ সুযোগ নাপালে মৌলিক অধিকাৰ ভংগ বুলি গণ্য কৰা নহ’ব৷ তামিলনাডু চিকিৎসা মহাবিদ্যালয়ত কোটাত ভৰ্ত্তি সংক্ৰান্তীয় এটা গোচৰৰ সন্দৰ্ভত দেশৰ শীৰ্ষ আদালতে এই তাৎপর্যপূর্ণ ৰায় দিয়ে৷ তামিলনাডু চিকিৎসা মহাবিদ্যালয়বোৰত নামভৰ্ত্তিৰ বাবে আসন সংৰক্ষিত নকৰাত মৌলিক অধিকাৰ খর্ব কৰা হৈছে বুলি অভিযোগ দি উচ্চতম ন্যায়ালয়ত কেইজনমান অ’বিচি শিক্ষাৰ্থীয়ে গোচৰ তৰিছিল৷ শিক্ষাৰ্থীসকলৰ হৈ মাত মাতিছিল চিপিআই, ডিএমকে দলে৷ তেওঁলোকৰ দাবী আছিল ২০২০-২১ শিক্ষাবর্ষত তামিলনাডুৰ চিকিৎসা মহাবিদ্যালয়বোৰত অ’বিচিৰ বাবে ৫০ শতাংশ কোটা ৰখা হওক৷ গোচৰৰ পৰিপেক্ষিতত ন্যায়াধীশ এল নাগেশ্বৰ ৰাও, কৃষ্ণ মুৰাৰি আৰু এছ ৰবীন্দ্র ভাটেৰ বিচাৰপীঠে কয়, সংৰক্ষণক মৌলিক অধিকাৰ বুলি দাবী কৰাৰ কাৰো অধিকাৰ নাই৷ সংৰক্ষণত কোনো মৌলিক অধিকাৰ নাই৷ সেয়ে এই আবেদন মাদ্ৰাজ উচ্চ ন্যায়ালয়ত দিবলৈ অনুমতি দিয়ে আৰু উচ্চতম ন্যায়ালয়ে আবেদন প্ৰত্যাহাৰ কৰে৷