দৈনন্দিন বাৰ্তাৰ ডেস্ক : সীমান্তত ভাৰত আৰু চীনৰ মাজত সংঘৰ্ষ৷ দুয়োখন দেশৰ দ্বন্দ্বৰ বাবেই ত্ৰিপাক্ষিক বৈঠকত মধ্যস্থতাকাৰীৰ ভূমিকা পালনত ব্যৰ্থ হয় ৰাছিয়া৷ সীমান্ত সমস্যাত তৃতীয় পক্ষৰ হস্তক্ষেপ নিবিচাৰে ভাৰত আৰু চীনে৷ বৈঠকৰ শেষত এই কথা জনালে ৰাছিয়াৰ বিদেশ মন্ত্ৰীয়ে৷ ভাৰত-চীন সীমান্ত সংঘাতত ৰাছিয়াৰ ভূমিকা গুৰুত্বপূৰ্ণ হৈ উঠিব পাৰে৷ এয়াই আশা কৰিছিল কূটনীতিবিদে৷ সেই আশাত চেঁচা পানী ঢালিলে৷ উল্লেখ্য যে পূৱ লাডাখ সীমান্তত শান্তি ঘুৰাই আনিবলৈ মঙলবাৰে ভাৰ্চুৱেল ত্রিপাক্ষিক বৈঠকত বহিছিল ৰাছিয়া, ভাৰত আৰু চীনৰ বিদেশ মন্ত্ৰীসকল৷ কিন্তু সেই বৈঠক ফলপ্রসূ হৈ নুঠিল৷ সেই কথা জনালে ৰাছিয়াৰ বিদেশ মন্ত্ৰী ছাৰজেই লাভৰোভে৷ তেওঁ কয়, আমাৰ ধাৰণা সীমান্ত সংক্ৰান্ত বিষয়ত ভাৰত-চীনে তৃতীয় পক্ষ কাৰোৰে সহায় নিবিচাৰে৷ আমাৰ মতে এই বিষয়ে তেওঁলোকক সহায় কৰাৰো প্ৰয়োজন নাই৷ ত্রিপাক্ষিক বৈঠকত ভাৰতৰ বিদেশ মন্ত্রী এছ জয়শংকৰে যোৱা সপ্তাহত গালৱানত হোৱা ঘটনা কয়৷ চীনৰ লালফৌজৰ হাতত ভাৰতৰ ২০জন সেনা নিহত হোৱাত ক্ষোভপ্রকাশ কৰে৷ সীমান্তত সংঘাতৰ বাবে চীনৰ ওপৰত অৰ্থনৈতিক ব্যৱস্থা গ্ৰহণৰ কথা আহি পৰিছে৷ আনহাতে নিজৰ সিদ্ধান্তত শেষ পৰ্যন্ত অটল থাকে চীনৰ বিদেশ মন্ত্ৰী ৷
