টীয়ক
বিশ্ব আজি ক’ৰোনাৰ গ্ৰাসত কোঙা দেশে দেশত গৃহবন্দী প্ৰজা৷ অসমো তাৰ ব্যতিক্ৰম নহয়৷ ব্যৱসায়-বাণিজ্য, স্কুল-কলেজ সকলো বন্ধ৷ এই মহামাৰীৰ মাজতে ৰাজ্যত অন্য এক বিভীষিকা হৈ আবিৰ্ভাৱ হৈছে গাহৰিৰ দেহত মাৰত্মক আফ্ৰিকান ছোৱাইন ফিভাৰ৷ এই ভাইৰাছে গাহৰি পালকসকলৰ জীৱনলৈ অমানিশা নমাই আনিছে। ইতিমধ্যে পশু পালন বিভাগে কেইবাখনো জিলাত হাজাৰ হাজাৰ গাহৰিৰ মৃত্যু হোৱাত সতৰ্কতামূলক ব্যৱস্থা হিচাপে গাহৰিৰ কিনা-বেচা, গাহৰি মাংস বিক্ৰী বন্ধ কৰি দিছে৷ গাহৰিৰ এই অস্বাভাৱিক মৃত্যু ৰোধ কৰিবৰ বাবে বিভাগৰ উপৰি বিভিন্ন স্থানত বেচৰকাৰী সংস্থাসমূহে গাহৰিৰ গড়ালকে ধৰি গাহৰিৰ বিচৰণ ঠাই সমূহত ছেনিটাইজেচনৰ ব্যৱস্থা কৰিছে। টীয়কৰ জাঁজীমুখ অঞ্চল, যোৰহাটৰ বাঁহফলা অঞ্চলকে ধৰি কেইবাটাও অঞ্চলত মিচিং স্বায়ত্ব শাসিত পৰিষদৰ উদ্যোগত যোৰহাট জিলাৰ পশুপালন বিভাগৰ সহযোগত ছেনিটাইজেচনৰ ব্যৱস্থা কৰিছে। যুৱ নেতা হৰেন ৰিচঙৰ বিশেষ তৎপৰতাত গ্ৰহণ কৰা এই কাৰ্যসূচীত পশু চিকিৎসক ডাঃ প্ৰবীন কুমাৰ নেওগকে ধৰি পশু পালন আৰু পশু চিকিৎসা বিভাগৰ কেইবাগৰাকী ক্ষেত্ৰ সহায়কে সহযোগিতা আগবঢ়ায়। গাহৰি পালন যিহেতু মিচিং জনগোষ্ঠীৰ পৰম্পৰা, সেয়ে এই সংগঠনটোৱে তেওঁলোকৰ অধীনস্থ প্ৰায়বোৰ অঞ্চলতে গাঁৱৰ তথা মে এ চিৰ সদস্যৰ সহায়ত ঘৰে ঘৰে গৈ গাহৰি গড়ালসমূহ পৰিস্কাৰ কৰাৰ লগতে সজাগতা সৃষ্টি কৰিবলৈ চেষ্টা অব্যাহত ৰাখিছে।