দৈনন্দিন বাৰ্তা ডেস্ক : নিৰাপত্তাৰক্ষীৰ তৎপৰতাত সন্ত্ৰাসবাদীৰ বৃহৎ আক্ৰমণৰ পৰা ৰক্ষা পৰিল দিল্লী ৷ তুমুল গুলীয়াগুলীৰ পাচত আইইডি বিস্ফোৰকসহ এক আইএছআইএছ সন্ত্ৰাসবাদীক গ্ৰেপ্তাৰ কৰে দিল্লীৰ বিশেষ আৰক্ষীয়ে ৷ ধৃত সন্ত্ৰাসবাদীৰ নাম ইউছুফ খান বুলি জানিব পৰা গৈছে ৷ এই ঘটনাৰ পাচতে উত্তৰ প্ৰদেশত হাই এলাৰ্ট জাৰি কৰা হৈছে ৷ আৰক্ষীৰ সূত্ৰৰ মতে শুকুৰবাৰে বিশেষ সূত্ৰৰ পৰা জানিব পাৰে যে কৰোল বাগ আৰু ধৌলা কুৱান এলেকাৰ মাজৰ এঠাইত এক সন্ত্ৰাসবাদী লুকাই আছে ৷ তাৰ পাচতে দিল্লী আৰক্ষীৰ বিশেষ শাখাই তালাচী আৰম্ভ কৰে ৷ কৰোল বাগ আৰু ধৌলা কুৱান এলেকাৰ মাজৰ এলেকা বুদ্ধ জয়ন্তী পাৰ্কৰ ওচৰত তালাচী চলি থকা সময়তে আইএছআইএছ সন্ত্ৰাসবাদীৰ সৈতে গুলীয়াগুলী আৰম্ভ হয় ৷ কিছু পৰ দুয়ো পক্ষৰ মাজত গুলীয়াগুলী চলে ৷ তাৰ পাচতে ইউছুফ নামৰ এই সন্ত্ৰাসবাদীক গ্ৰেপ্তাৰ কৰে৷ ধৃত সন্ত্ৰাসবাদীৰ পৰা আইইডি বিস্ফোৰক আৰু এটা পিস্তল আৰক্ষীয়ে জব্দ কৰে ৷ বৰ্তমানে এই এলেকাত এনএছজি কমাণ্ডোৱে তালাচী চলাই আছে ৷ এই ঘটনাক লৈ ৰাজধানী দিল্লীত উত্তেজনাই বিৰাজ কৰি আছে ৷
