সদৌ অসম গোৰ্খা ছাত্ৰ সন্থা ধেমাজি জিলা সমিতিৰ দশম দ্বি-বাৰ্ষিক অধিৱেশনখনি অহা ৬, ৭ আৰু ৮ মে’ত তিনিদিনীয়া বৰ্ণাঢ্য কাৰ্যসূচীৰে চিলাপথাৰৰ ফুলবাৰী পথাৰৰ শ্বহীদ মেজৰ দুৰ্গা মল্ল অস্থায়ী সমন্বয় ক্ষেত্ৰত অনুষ্ঠিত হ’ব | সেই উপলক্ষত আজি বৈদিক ৰীতি-নীতি আৰু মাঙ্গলিক কাৰ্যসূচীৰে সমন্বয় ক্ষেত্ৰৰ বাকৰিত দশম দ্বি-বাৰ্ষিক অধিৱেশনৰ সভাপতি শিৱ কুমাৰ ৰায়, কাৰ্যকৰী সভাপতি হৰি উপাধ্যায়, সম্পাদক বিকাশ উপাধ্যায়ৰ নেতৃত্বত পুৰোহিত জয় নাৰায়ণ উপাধ্যায়ে বৈদিক ৰীতি-নীতি , মাঙ্গলিক কাৰ্যসূচী কৰাৰ অন্তত স্হানীয় ৰাইজৰ সহযোগত লাইখুঁটা স্থাপন কৰে । কাৰ্যসূচীত উপস্থিত থাকে সদৌ অসম গোৰ্খা ছাত্ৰ সন্থা, ধেমাজি জিলা সমিতৰ সভাপতি সোমৰাজ পুৰী, সম্পাদক সুহৃদ থাপাৰ লগতে জিলা সমিতিৰ বিষয়-ববীয়া সকল ।
অধিৱেশনৰ দ্বিতীয় দিনা ৭ মে’ৰ পুৱা ৯ বজাৰ পৰা সন্ধ্যা ৪ বজালৈ ডিব্ৰুগড় আদিত্য হস্পিতেল এণ্ড ডাইগ’নাস্তিক চেণ্টাৰৰ দ্বাৰা এক বিনামূলীয়া চিকিৎসা শিবিৰৰ আয়োজন কৰিছে। তৃতীয় দিনৰ কাৰ্যসূচীৰ সাংস্কৃতিক সন্ধ্যাত উপস্থিত থাকিব জনপ্ৰিয় শিল্পী ৰোহিত চুনাৰ , হৰি নেৱাৰ , হাগ্ৰামা মহিলাৰী খ্যাত কমেদিয়ান কৃষ্ণ থাপা আৰু সমগ্ৰ অসম তথা ধেমাজি চিলাপথাৰৰ গৌৰৱ তথা ফুলবাৰীপথাৰৰ বাসিন্দা বৰ্তমান মুম্বাইত অনুষ্ঠিত হৈ থকা ডি আই ডি লিটল মাষ্টাৰ প্রতিযোগিতাত সুন্দৰ প্ৰদৰ্শনেৰে দৰ্শকৰ মন জয় কৰিবলৈ সক্ষম হোৱা আধ্যাশ্ৰী উপাধ্যায় ।