নাজিৰা
শিৱসাগৰ জিলাৰ ৰাষ্ট্ৰীয় খাদ্য সুৰক্ষা আইন-২০১৩ ( এন এফ এছ এ ) আঁচনিৰ অধীনত পৰিয়াল পৰিচয় পত্ৰ তথা ৰেচন কাৰ্ড আহৰণ কৰা আৰ্থিকভাৱে সচ্ছল অযোগ্য হিতাধিকাৰীসকলৰ নাম কৰ্তনৰ ব্যৱস্থা কৰিছে শিৱসাগৰ জিলা প্ৰশাসনে। জিলাখনৰ বিভিন্ন অঞ্চলত বহুতো অযোগ্য হিতাধিকাৰীয়ে এন এফ এছ এ আঁচনিৰ অধীনত ৰেচন কাৰ্ড আৰু চাউল উপভোগ কৰি থকা বিষয়টো জিলা প্ৰশাসনৰ দৃষ্টি গোচৰ হৈছে। এই সন্দৰ্ভত শিৱসাগৰ জিলা উপায়ুক্ত লক্ষ্মীনন্দন গগৈয়ে শেহতীয়াকৈ জাৰি কৰা এক গোহাৰি যোগে জিলাখনৰ চৰকাৰী চাকৰিয়াল, পেন্সনভোগী পৰিয়াল, বাৰ্ষিক আয় এক লাখ টকাৰ ওপৰৰ বে-চৰকাৰী চাকৰিয়াল, সচ্ছল ব্যৱসায়ী তথা সচ্ছল খেতিয়কৰ লগতে চাৰিচকীয়া বাহনৰ অধিকাৰী পৰিয়াল আৰু যিসকলৰ এই চাউলৰ কোনো প্ৰয়োজন নাই, তেনে পৰিয়ালসমূহক ১৫ জুনৰ ভিতৰত স্বেচ্ছাই তেওঁলোকৰ ৰেচন কাৰ্ডসমূহ আবেদনসহ উপায়ুক্ত কাৰ্যালয়ত থকা খাদ্য আৰু অসামৰিক যোগান বিভাগৰ কাৰ্যালয়ত সমৰ্পণ কৰিবলৈ আহ্বান জনাইছে। অন্যথাই জিলা প্ৰশাসনৰ নিজাববীয়া অনুসন্ধানত এনে কোনো পৰিয়ালে যদি এই আঁচনিৰ সুবিধা গ্ৰহণ কৰি থকা প্ৰমাণিত হয়, তেন্তে সংশ্লিষ্ট আইনৰ অধীনত তেনে পৰিয়ালৰ বিৰুদ্ধে গোচৰ ৰুজু কৰিবলৈ বাধ্য হ’ব শিৱসাগৰ জিলা প্ৰশাসন। শিৱসাগৰ জিলাত বিভাগৰ চৰকাৰী কৰ্মচাৰীৰ পৰিয়ালেও এই আঁচনিৰ অধীনত বিনামূলীয়া চাউল লাভ কৰাৰ লগতে এনে কৰ্মচাৰীৰ পত্নী, মাতৃৰ নামত কেনেদৰে বছৰ বছৰ জুৰি চাউল লাভ কৰি আহিছে সেই সন্দৰ্ভত তথ্য পোহৰলৈ অহাত শিৱসাগৰ জিলা প্ৰশাসনে এনে কঠোৰ স্থিতি গ্ৰহণ কৰিবলৈ বাধ্য হোৱা বুলি জিলা উপায়ুক্তৰ স্বাক্ষৰিত এক জাননীত প্ৰকাশ৷