গোসাঁইগাঁৱৰ দাৱাগুৰিত মহা শিৱ ৰাত্ৰি উৎসৱৰ ৰূপালী জয়ন্তী

প্ৰতিবছৰৰ দৰে এইবেলিও গোসাঁইগাঁও মহকুমাৰ অসম-বংগ সীমান্তৱৰ্তী দাৱাগুৰি স্হিত বাথৌপুৰী জগন্নাথ ধামত ১১ মাৰ্চৰ পৰা দুদিনীয়া কাৰ্যসূচীৰে মহা শিৱ ৰাত্ৰি পূজাৰ আয়োজন কৰা হৈছে। লগতে উক্ত মন্দিৰৰ ৰূপালী জয়ন্তী বৰ্ষ পালনৰ বাবেও একাধিক কাৰ্যসূচী গ্ৰহন কৰি যাৱতীয় প্ৰস্তুতি সম্পূৰ্ণ কৰি তোলা হৈছে বুলি মন্দিৰ তথা উৎসৱ পৰিচালনা সমিতিৰ সভাপতি সম্পাদক ক্ৰমে মনীন্দ্ৰ নাৰ্জাৰী আৰু সমৰেন্দ্ৰ মুছাহাৰীয়ে জানিবলৈ দিয়ে।এই উৎসৱৰ ৰূপালী জয়ন্তী বৰ্ষ উপলক্ষে মন্দিৰ তথা সংলগ্ন ঠাই সমূহ আটকধূণীয়া কৈ সজাই পৰাই তোলা হৈছে। মহা শিৱ ৰাত্ৰি উপলক্ষে পূজা আৰু ৰূপালী জয়ন্তী উপলক্ষে আয়োজন কৰা কাৰ্যসূচী মতে ১১ মাৰ্চত পুৱা ১০-৩০ বজাত ধৰ্ম ধ্বজা উত্তোলন কৰাৰ পাছতে মহা শিৱ ৰাত্ৰিৰ পূজা পাঠ আৰম্ভ কৰা হ’ব। বিয়লি ২-০০ বজাত ৰূপালী জয়ন্তী উপলক্ষে প্ৰকাশ কৰা ‘ছিজৌ’ নামৰ এখন স্মৃতি গ্ৰন্হৰ উন্মোচন কৰা হ’ব।২-৪৪ বজাত প্ৰথম প্ৰাহৰিক পূজা হ’ব।ইয়াৰ পাছত সন্ধিয়া ৬-০০ বজাত অনুষ্ঠিত হ’ব মহা যজ্ঞাহুতি।সন্ধিয়া ৬-৩০ বজাত দ্বিপ্ৰাহৰিক পূজা আৰু ৰাতি ৯-৩০ বজাত ত্ৰিপ্ৰাহৰিক পূজা অনুষ্ঠিত হ’ব।পাছদিনা অৰ্থাৎ ১২ মাৰ্চত পুৱা ৮-০০ বজাত অনুষ্ঠিত হ’ব গংগাস্নান।পুৱা ৯-০০ বজাত অনুষ্ঠিত হ’ব চাৰি প্ৰাহৰিক মহাশিৱ ৰাত্ৰী পূজা। ইয়াৰ পাছত দুপৰিয়া ১২-৩০ বজাত হ’ব পূৰ্ণাহুতি।পূৰ্ণাহুতিৰ পাছত মহা প্ৰসাদ বিতৰণ আৰু সন্ধিয়াৰ পৰা অনুষ্ঠিত হ’ব ধৰ্মালোচনা আৰু পৰম্পৰাগত সাংস্কৃতিক অনুষ্ঠান।দুদিনীয়া কাৰ্যসূচীত গুৱাহাটীৰ পৰা দীপক বাবা মুখ্য পুৰোহিত হিচাপে উপস্হিত থকাৰ লগতে বৃহত্তৰ অঞ্চলৰ সকলো জাতি জনগোষ্ঠীৰ হেজাৰ হেজাৰ ধৰ্মপ্ৰাণ লোকে মহা শিৱৰাত্ৰি উপলক্ষে আয়োজিত অনুষ্ঠানত উপস্হিত থাকিব বুলি আয়োজক সমিতিয়ে সদৰী কৰে।