নাজিৰা ২১ নৱেম্বৰ:– চৰকাৰী জাননী নং ই ফাইল নং ৩৭৪৪৬৫/ ২৮৭৯২১০/ ২০২৪/পশুধন শাখা, তাৰিখ গুৱাহাটী ১৯ নৱেম্বৰ, ২০২৪ আৰু শিৱসাগৰ (Sivasagar) জিলা পশু চিকিৎসা বিষয়াৰ কাৰ্য্যালয় পৰা লাভ কৰা পত্ৰ নং.ডিভিএছ/এএছএফ/২০২৪-২৫/৬৯০ তাৰিখ ১৯ নৱেম্বৰ/২০২৪ অনুসৰি ডিমৌ ৰাজহ চক্ৰৰ অধীনত ডিমৌ উন্নয়ন খণ্ডৰ অন্তৰ্গত একাৰাণী গ্ৰান্ট(Ekarani Grant) আৰু বৰ দেওধাই জাপিছাজিয়া (বটকা পুৰাণী পাম)গাঁওখন দুখনক আফ্ৰিকান ছোৱাইন ফিভাৰ ডিজিজ”ৰ “এপিচেণ্টাৰ- উৎপত্তিৰ স্থল” হিচাপে ঘোষণা কৰা হৈছে।
শিৱসাগৰ জিলা পশু চিকিৎসা বিষয়াৰ কাৰ্য্যালয়ৰ যোগেদি লাভ কৰা জাননীৰ অনুসৰী এপিচেণ্টাৰৰ আশে-পাশে ১ কিলোমিটাৰ ব্যাসাৰ্ধৰ গাঁওসমূহক “সংক্ৰমিত অঞ্চল” হিচাপে নিৰ্ধাৰণ কৰা হৈছে আৰু ইপিচেণ্টাৰৰ পৰা ১০ কিলোমিটাৰ ব্যাসাৰ্ধৰ অন্তৰ্গত গাঁওসমূহক “চাৰভেইলেন্স জ’ন” হিচাপে চিহ্নিত কৰা হৈছে।
তদুপলক্ষ্য সতৰ্কতামূলক ব্যৱস্থা হিচাপে আফ্ৰিকান ছোৱাইন ফিভাৰ’ৰ সংক্ৰমণ যাতে ৰুদ্ধ কৰিব পাৰি তাৰে পৰিপ্ৰেক্ষিতত সমগ্ৰ শিৱসাগৰ জিলাতে গাহৰিৰ পৰিবহণৰ ওপৰত নিষেধাজ্ঞা আদেশ জাৰি কৰা হৈছে। শিৱসাগৰ জিলা দণ্ডাধীশ আয়ুষ গাৰ্গে এক আদেশ যোগে ১৬৩ বিএনএচএচ ২০২৩ ৰ অধীনত — সমগ্ৰ শিৱসাগৰ জিলাৰ ভিতৰত জীয়া গাহৰি/গাহৰিৰ সামগ্ৰী/গাহৰিৰ মাংস পৰিবহণৰ ওপৰত নিষেধাজ্ঞা আৰোপ কৰিছে। দ্বিতীয়তে জিলাখনত গাহৰি মাংস বিক্ৰী আৰু গাহৰি উৎপাদন নিষিদ্ধ কৰা হৈছে।
তৃতীয়তে শিৱসাগৰ জিলাৰ ভিতৰত গাহৰি বধ, বিক্ৰী বা কিনা সম্পূৰ্ণ নিষিদ্ধ।চতুৰ্থতে শিৱসাগৰ জিলাৰ ভিতৰত গাহৰিৰ যিকোনো মৃত্যু পশু চিকিৎসা বিভাগৰ দৃষ্টিগোচৰ কৰিব লাগিব লগতে গাহৰিৰ মৃত্যু হলে মৃতদেহ দ’ গাতত পুতি থব লাগিব। পঞ্চমতে সকলো গাহৰি উৎপাদক, প্ৰজননকাৰীয়ে কঠোৰ জৈৱ সুৰক্ষা ব্যৱস্থা বজাই ৰাখিব লাগিব যাতে নতুন পকেটত কোনো ধৰণৰ ৰোগ বিয়পি নাযায়।ষষ্টতে গাহৰিৰ খাদ্যৰ যিকোনো ধৰণৰ পৰিবহণ পশু চিকিৎসা বিভাগৰ পূৰ্বৰ অনুমতি সাপেক্ষে কৰিব লাগিব।এই আদেশ তাৎক্ষণিকভাৱে কাৰ্যকৰী হৈছে আৰু পৰৱৰ্তী আদেশ নোপোৱা পৰ্যন্ত বাহাল থাকিব। এই আদেশ উলংঘা কৰিলে ধাৰা ২২৩বিএনএছ বিধানৰ অধীনত আইনগত ব্যৱস্থা গ্ৰহণ কৰা হ’ব ।