জামুগুৰিহাট :
বিশ্বনাথ জিলাৰ নাগশংকৰ মৌজাৰ এক অন্যতম সামাজিক, সাংস্কৃতিক আৰু স্বেচ্ছাসেৱী অনুষ্ঠান আলোকৰ উদ্যোগত বিগত বৰ্ষসমূহৰ দৰে এইবাৰো ইতিহাস প্ৰসিদ্ধ শ্ৰীশ্ৰী নাগশংকৰ দেৱালয়ৰ সহভূমি চমাৰ দলনিস্থ দক্ষিণ নাগশংকৰ উচ্চ মাধ্যমিক বিদ্যালয়ৰ সভাগৃহ প্ৰাঙ্গনত এক অনুষ্ঠুপিয়া সম্বৰ্ধনা অনুষ্ঠান অনুষ্ঠিত হৈ যায়। এই সভাতে শেহতীয়াকৈ হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হোৱা দক্ষিণ নাগশংকৰ অঞ্চলৰ কৃতীমান ছাত্ৰ-ছাত্ৰীক সম্বৰ্ধনা জনোৱা হয়। সভাত উপস্থিত চতিয়া আঞ্চলিক পঞ্চায়তৰ সভাপতি লক্ষীকান্ত বৰাই সফল শিক্ষাৰ্থীসকলক অভিনন্দন জনোৱাৰ লগতে অনাগত দিনতো সফলতাৰ ধাৰাবাহিকতা অক্ষুন্ন ৰাখি সমাজৰহৈ কাম কৰাৰ মানসিকতালৈ আগবাঢ়ি যাবলৈ প্ৰেৰণা দিয়ে। দক্ষিণ নাগশংকৰ উচ্চ মাধ্যমিক বিদ্যালয়ৰ প্ৰধান শিক্ষক লীলাকান্ত শৰ্মাই আলোকৰ উদ্যোগৰ শলাগ লোৱাৰ উপৰিও ছাত্ৰ-ছাত্ৰীসকলক ন-উদ্যমেৰে আহিবলগীয়া দিনত পঢ়াত মনোনিবেশ কৰিবলৈ পৰামৰ্শ দিয়ে। ইয়াৰ পিছতেই বৃহত্তৰ চমাৰ দলনি অঞ্চলৰ মুঠ আঠগৰাকী ছাত্ৰ-ছাত্ৰীক এখনি ফুলাম গামোছা, মানপত্ৰ আৰু কিতাপৰ টোপোলাৰে সম্বৰ্ধনা জনোৱা হয়। সমজুৱাৰ হৈ স্থানীয় শিক্ষক তথা যুব লেখক অঞ্জন বাচকোটাই আলোকৰ সময়োপযোগী পদক্ষেপৰ শলাগ লোৱাৰ লগতে ছাত্ৰ-ছাত্ৰীসকলক কেৱল সফলতাৰ পিছত নোদৌৰি এগৰাকী হৃদয়বান মানুহহৈ প্ৰয়োজনত সমাজ, জাতি আৰু ৰাষ্ট্ৰ নিৰ্মাণত আগবাঢ়ি যাবলৈ উদঙনি যোগায়। আলোকৰ প্ৰাক্তন সভাপতি পদ্মেশ্বৰ শইকীয়াই আঁতধৰা বিশেষ সম্বৰ্ধনা অনুষ্ঠানত দক্ষিণ নাগশংকৰ গাঁও পঞ্চায়তৰ সভানেত্ৰী পাৰ্বতী শৰ্মা, শিক্ষক দামোদৰ বৰাল, কমল শৰ্মা, নাট্যকাৰ পূৰ্ণ কুমাৰ শৰ্মাৰ লগতে আলোকৰ সভাপতি পৰেশ শইকীয়া, সম্পাদক বিমান শইকীয়া, বিষয়ববীয়া প্ৰণৱ শইকীয়া, পিংকু গায়নকে প্ৰমূখ্য কৰি অন্যান্য সদস্যসকল উপস্থিত আছিল। সভাৰ শেষান্তত আলোকৰ প্ৰাক্তন সভাপতি পুতুল বৰাই কৃতী শিক্ষাৰ্থীৰ প্ৰতি আশীষ বচন দিয়াৰ উপৰিও শলাগৰ শৰাই আগবঢ়ায়।