সদৌ অসম মটক যুৱ ছাত্ৰ পৰিষদৰ উদ্যোগত, অসম ভলিবল সন্থাৰ তত্বাৱধানত, মটক যুৱ ছাত্ৰ পৰিষদ, গুৱাহাটী মহানগৰ সমিতি আৰু গনেশগুৰি যুৱ সংঘৰ সহযোগত একাদশ সংখ্যক ৰাজকুমাৰ লংকেশ্বৰ গোঁহাই ভলীবল কাপ২০২৩ সফলভাৱে সামৰণি পৰে।
ৰাজ্যিক পৰ্যায়ৰ প্ৰতিযোগিতাখন দুদিনীয়া কাৰ্যসূচীৰে ২৬ আৰু ২৭ ফ্ৰেব্ৰুৱাৰী তাৰিখে গণেশগুৰিৰ গোপাল বড়ো উচ্চতৰ মাধ্যমিক বিদ্যালয়ৰ খেলপথাৰত অনুষ্ঠিত হয়।
দ্বিতীয়দিনাৰ কাৰ্যসূচী অনুসৰি ক্ৰীড়া আলোচনী “ক্ৰীড়ানুৰাগ” উন্মোচন কৰে দৈনন্দিন বাৰ্তা কাকতৰ সম্পাদক শংকৰ গোহাঞিয়ে।
আনহাতে নিশা ১০.১২বজাৰ পৰা আৰম্ভ হোৱা অসম ৰাজ্যিক ক্ৰিয়া সন্থা আৰু সৰভোগৰ মাজৰ উত্তেজনা পূৰ্ণ চূড়ান্ত খেলখন উদ্বোধন কৰে টাই আহোম যুৱ ছাত্ৰ পৰিষদৰ সভাপতি দিলিপ গগৈয়ে।
৫ শতাধিক দৰ্শকৰ উপৰিও অসম তথা গুৱাহাটীৰ কেইবাজনো গণ্য-মান্য ব্যক্তিয়ে উপস্থিত থাকি ৰোমাঞ্চকৰ খেল খন উপভোগ কৰে।খেলখনত জয়ী হয় সৰভোগ।
উল্লেখ্য যে বিজয়ী দলক ট্ৰফিসহ নগদ ৩০,০০০টকা আৰু বিজিত দলক ট্ৰফিসহ নগদ ১৫,০০০ নগদ ধনৰ পুৰস্কাৰ আগবঢ়োৱাৰ লগতে শ্ৰেষ্ঠ খেলুৱৈলৈ ট্ৰফিসহ নগদ ৫,০০০ টকা পুৰস্কাৰ প্ৰদান কৰা হয়।
অসমৰ জনপ্ৰিয় কণ্ঠশিল্পী অজয় ফুকনৰ গীতেৰে জীপাল হৈ পৰে খেল পথাৰৰ বাকৰি। খেলুৱৈ সকলেও তেওঁৰ গীতত এপাক স্ফূৰ্তিতে নাচিলে।