দৈনন্দিন বাৰ্তা ডেস্ক : উত্তৰ প্ৰদেশত এগৰাকী কৃতী ছাত্ৰীৰ মৃত্যুক লৈ ৰহস্য ঘনীভূত হৈছে ৷ আৰক্ষীয়ে দাবী কৰিছে ছাত্ৰীগৰাকী দুৰ্ঘটনাত মৃত্যু হৈছে ৷ ইয়াৰ বিপৰীতে ছাত্ৰীগৰাকীৰ পৰিয়ালে সেই কথাত সন্মত নহয়৷ পৰিয়ালৰ মতে ছাত্ৰীগৰাকীক হত্যা কৰা হৈছে ৷ ২০১৮ চনৰ দ্বাদশ শ্ৰেণীৰ পৰীক্ষাত ৯৮ শতাংশ লাভ কৰিছিল সুদীক্ষা ভাটি নামৰ এই ছাত্ৰীগৰাকীয়ে ৷ আমেৰিকাৰ মেছাচুছেটছৰ এখন নামী বিশ্ববিদ্যালয়ত জলপানি লৈ তেওঁ শিক্ষা গ্ৰহণ কৰিছিল৷ ক’ৰোনাৰ বাবে তেওঁ ঘৰলৈ ঘুৰি আহিছিল৷ আগষ্ট মাহতে পুনৰ আমেৰিকালৈ ঘুৰি যোৱাৰ কথা৷ কিন্তু তাৰ আগতেই বুলন্দচহৰত পথ দুৰ্ঘটনাত তেওঁৰ মৃত্যু হয়৷ আৰক্ষীৰ ওচাত সুদীক্ষাৰ পৰিয়ালে জনাইছে, শিক্ষা সংক্ৰান্ত কেতবোৰ নথি আনিবৰ বাবে সেইদিনা খুৰাকৰ বাইকেৰে বুলন্দচহৰৰ ছিকান্দ্ৰাবাদৰ এখন বিদ্যালয়লৈ গৈছিল সুদীক্ষা ৷ তেওঁলোকৰ দাবী, পথত কেইবাজনো যুৱকে বাইকেৰে সুদীক্ষা আৰু খুৰাকক অনুসৰণ কৰে৷ আনকি সুদীক্ষাক ব্যতিব্যস্ত কৰিছিল৷ তেওঁলোকে বেপেৰুৱাভাৱে বাইক চলাইছিল৷ সুদীক্ষাৰ খুৰাক সত্যেন্দ্ৰ ভাটিৰ দাবী, এই যুৱকৰ দলটোৰে বাইকেৰে তেওঁলোকক পাছ পেলায়৷ ষ্টাণ্ট কৰি দেখুৱায়৷ মই বাইকৰ গতি হ্ৰাস কৰি দিও৷ তেতিয়া পিছফালৰ পৰা এজনে বাইকেৰে জোৰেৰে খুন্দা মাৰি দিয়ে৷ সুদীক্ষা আৰু মই দুয়ো পৰি যাও৷ সুদীক্ষাই মুৰত আঘাত পায়৷ সত্যেন্দ্রৰ দাবী, যিখন বাইকেৰে খুন্দা মাৰিছিল তাৰ আৰোহীক চিনি নাপালে৷ খুন্দা মাৰিয়ে আৰোহীয়ে পলায়ন কৰে৷ জিলা প্ৰশাসনে সাংবাদিকক জনোৱা মতে, খুৰাক নহয়, বাইকখন চলাইছিল সুদীক্ষাৰ ভায়েকে৷ তেওঁ নাবালক৷ তেওঁলোকক হাৰাশাস্তি কৰাৰ কোনো প্ৰমাণ পোৱা নগ’ল৷ বুলন্দচহৰৰ আৰক্ষীয়ে ঘটনাস্থলী পৰিদৰ্শন কৰে৷ এজন প্ৰত্যক্ষদৰ্শীয়ে জনোৱা মতে বিপৰীত দিশৰ পৰা এখন ৰয়েল এনফিল্ড আহিছিল৷ যানজঁটৰ বাবে সেইখন হঠাৎ ব্ৰেক মাৰে৷ তেতিয়াই দুৰ্ঘটনাটো সংঘটিত হয় ৷
