উজনি মাজুলী ,২০ নৱেম্বৰঃ ২০১৯ বৰ্ষৰ “মুখ্যমন্ত্ৰীৰ বিশেষ বৃত্তি পৰীক্ষা” ত মাজুলী জিলাৰ মাজুলী শিক্ষাখণ্ডৰ অন্তৰ্গত বালিচাপৰি মণ্ডল সমল কেন্দ্ৰৰ অন্তৰ্গত ৬৫ নং বালিচাপৰি প্ৰাথমিক বিদ্যালয়ৰ সাত গৰাকী ছাত্ৰ-ছাত্ৰীয়ে উত্তীৰ্ণ হৈ বিদ্যালয়ৰ গৌৰৱ অক্ষুন্ন ৰাখিছে। যুৱলেখক তথা শিক্ষক জিতুল বৰা প্ৰধান শিক্ষক হিচাপে কৰ্মৰত অৱস্থাত থাকোতে বৃত্তি পৰীক্ষাত প্ৰস্তুতি চলাই সুখ্যাতিৰে উত্তীৰ্ণ হোৱা ছাত্ৰ-ছাত্ৰী সকল হৈছে- নয়নজ্যোতি কলিতা, বিক্ৰম শইকীয়া , অঞ্জন শইকীয়া, মৃনাল হাজৰিকা, পুতলি শইকীয়া, তন্ময় কল্যাণ বৰুৱা আৰু দৰ্শনা মুদৈ। বিদ্যালয় খনৰ ছাত্র-ছাত্রী সকলৰ এনে সফলতাত শিক্ষক-শিক্ষয়িত্ৰী সকলৰ লগতে অভিভাৱক তথা স্থানীয় ৰাইজ উৎফুল্লিত হৈ পৰিছে। বিদ্যালয়খনৰ এই সফলতাত বিদ্যালয় পৰিচালনা সমিতিৰ প্ৰাক্তন সভাপতি মহেন্দ্ৰ হাজৰিকাই অভিনন্দন জনাইছে । উল্লেখযোগ্য যে, বিদ্যালয়খনৰ তদানীন্তন প্ৰধান শিক্ষক জিতুল বৰা আৰু সহঃশিক্ষক – যুগবিকাশ পেগু, জোণমনী দেৱী ভাগৱতী, ৰনোজ নৰহৰ অশেষ কষ্টৰ ফলত এই সাফল্য লাভ কৰিছে । বিদ্যালয়খনৰ এই সফলতাত ২০১৯ আৰু ২০২০ বৰ্ষৰ বিদ্যালয় পৰিচালনা সমিতিৰ সভাপতিদ্বয় ক্ৰমে বুধিন শইকীয়া আৰু ৰানু দাস , উপ সভাপতি বাবুল ভৰালী, বিদ্যালয়ৰ ৰান্ধনী কৰ্মীদ্বয় ক্ৰমে মৃনালী হাজৰিকা আৰু নিজু শইকীয়াই অভিনন্দন জনাইছে। ভৱিষ্যতেও বিদ্যালয় খনে সফলতাৰ এই ধাৰা অব্যাহত ৰাখিব বুলি স্থানীয় ৰাইজে আশা কৰিছে। নামনি মাজুলীৰ আগশাৰীৰ প্ৰাথমিক বিদ্যালয় হিচাপে পৰিণত হোৱা ৬৫ নং বালিচাপৰি প্ৰাথমিক বিদ্যালয় খনে পূৰ্বতে অসম চৰকাৰৰ প্ৰাথমিক শিক্ষা বিভাগে অনুষ্ঠিত কৰা গুণোৎসৱ কাৰ্যসূচীত দুবাৰকৈ ‘ এ’ প্লাছ গ্ৰেড লাভ কৰিবলৈ সক্ষম হৈছিল। বিদ্যালয়খন এই শৈক্ষিক ধাৰা ভবিষ্যতেও অক্ষুন্ন থাকিব বুলি অঞ্চলবাসীয়ে আশাঁ ৰাখিছে ।
