সমগ্ৰ ৰাজ্যত ব্যাপক বিহু উদযাপনৰ উচ্চাহৰ মাজতে বৃহত্তৰ হাটিঙাৰ পদুমণি গাঁওত মাহযোৰা প্ৰস্তুতিৰে বৰ্ণাঢ্য কাৰ্যসূচীৰে উদযাপন কৰিলে ত্ৰয়োবিংশতিতম ৰঙালী বিহু সমাৰোহ। পদুমণি শোণিতজ্যোতি যুৱক সংগৰ উদ্যোগ তথা সমুহ ৰাইজৰ সহযোগত অনুষ্ঠিত কৰি অহা ৰঙালী বিহু সমাৰোহভাগ এই বেলিও পহিলা বহাগৰ দিনা পতাকা উত্তোলন আৰু সম্বৰ্দ্ধনা অনুষ্ঠানৰে আৰম্ভ হোৱা ৰঙালী বিহু সমাৰোহভাগৰ লগত সংগতি ৰাখি ছাত্ৰ-ছাত্ৰীৰ মাজত অনুষ্ঠিত কৰে বিভিন্ন প্ৰতিযোগিতা। গাঁওখনত বিভিন্ন জাতি জনগোষ্ঠী তথা ধৰ্মালম্বীলোকৰ সমন্বয়ৰে পৰম্পৰাগত ভাবে পালন কৰি অহা অসমীয়াৰ বাপোতি সাহোন ৰঙালী বিহুটি এই বেলি উলহ মালহৰে উদযাপন কৰে।উল্লেখ্য যে গাঁওখনৰ খাটি খোৱা শ্ৰমজীৱি ৰাইজে বিগত বছৰ বছৰ ধৰি দান বৰঙণি আৰু অস্থায়ী মঞ্চ নিৰ্মাণ কৰি বিহু পাতি আহিছিল যদিও চলিত বৰ্ষতে চৰকাৰী পুজিৰ দ্বাৰা নিৰ্মাণ হোৱা স্থায়ী মঞ্চটি শুভ উদ্ধোধন কৰে মূখ্য অতিথি ৰূপে উপস্থিত থকা চতিয়া সমষ্টিৰ জনপ্ৰিয় বিধায়ক তথা গৰু খুটি প্ৰকল্পৰ অধ্যক্ষ পদ্ম হাজৰিকাই ।
\
বিয়লি অনুষ্ঠিত মুল সভাৰ সভাপতি আসন অলংকৃত কৰে স্থানীয় সমাজ কৰ্মী তৰুন বৰা নিদিষ্ট বক্তা ৰূপে উপস্থিত থাকি বিশিষ্ট সমাজকৰ্মী তুলশী বড়াই অসমীয়া জাতিৰ আয়ুসৰেখা ৰঙালী বিহুৰ ওপৰত এক তত্ত্বগধুৰ বক্তৱ্য আগবঢ়াই। বিশিষ্ট অতিথি ৰূপে উপস্থিত থাকে পদুমণি গাঁও উন্নয়ন সমিতিৰ প্ৰতিষ্ঠাপক সভাপতি পূৰ্ণ চন্দ্ৰ শইকীয়া আৰু সন্মানীয় অতিথি ৰূপে অংশ গ্ৰহণ কৰে ইটাখোলা আৰক্ষী চকীৰ আৰক্ষী বিষয়া ভাস্কৰজ্যোতি শইকীয়া। এক গাম্ভীৰ্যপূৰ্ণ অনুষ্ঠানত কেইবাগৰাকী বিশিষ্ট ব্যক্তিৰ উপস্থিতিত অনুষ্ঠিত মুকলি সভাত বঁটা বিতৰণী আৰু কৃতি ছাত্ৰ-ছাত্ৰীসকলক গামোচা,অভিনন্দন প্ৰত্ৰৰে বিশেষ অভিনন্দন জ্ঞাপণ কৰে । পদুমণি গাঁৱৰ যুৱক-যুৱতীৰ দ্বাৰা পৰিৱেশন কৰা দিহা নামৰে আৰম্ভ হোৱা সাংস্কৃতিক অনুষ্ঠানত অঞ্চলটিৰ ভালে সংখ্যক আমন্তিত নৃত্য শিল্পীৰ দ্বাৰা কৃষ্টি প্ৰদৰ্শণে দৰ্শক মণ্ডলীক আকৰ্ষিত কৰি অনুষ্ঠানটি অধিক সজিৱ কৰি তোলা পৰিলক্ষিত হয়।
নিশা ৰেণু কোঁচ আৰু কিৰণ বসুমতাৰীৰ চাহ জনগোষ্ঠীয় লোক নৃত্য ঝুমুইৰ আৰু স্থানীয় শিল্পী তৰালি বসুমতাৰীৰ পৰিচালনাত বাৰেৰহনীয়া লোক নৃত্যৰ উপৰি জাকৈ-খালৈ বড়ো লোক নৃত্যই সাংস্কৃতিক অনুষ্ঠানটি ৰাইজৰ দৃষ্টি আকৰ্ষণ কৰে। ইফালে এই বেলি পদুমণি শোণিত জ্যোতি যুৱক সংঘৰ উদ্যোগত তথা সভাপতি পুলিন নাথ আৰু সম্পাদক বিশাল ওৰাঙৰ নেতৃত্ব আৰু স্থানীয় শিক্ষক তথা সমাজ কৰ্মী কনক চন্দ্ৰ শইকীয়াৰ পৰিচালনাত অনুষ্ঠিত ৰঙালী বিহু সমাৰোহৰ বিশেষ আকৰ্ষণ সু-প্ৰতিষ্ঠিত জনপ্ৰিয় কন্ঠ শিল্পী প্ৰ্ত্যুষ প্ৰতীম হাজৰিকা আৰু যুৱ প্ৰজন্মৰ ‘হাৰ্ট অফ থ্ৰ’ জুবিন গাৰ্গৰ লগত একেখন মঞ্চৰ সহযোগী কন্ঠ শিল্পী সংগীতা হাজৰিকাৰ গীতৰ শৰাইৰ অনুষ্ঠানত সহশ্ৰাধিক বিহু প্ৰেমী ৰাইজক পুৱা নিশালৈ গীত-নৃত্যৰে মতলীয়া কৰি তোলে। এক উচ্চব মূখৰ পৰিৱেশত অনুষ্ঠিত অনুষ্ঠানটিৰ আদৰণি ভাষণ আগবঢ়াই পদুমণি শোণিত জ্যোতি যুৱক সংঘৰ উপদেষ্টা অনন্ত কোঁচ আৰু শলাগৰ শৰাই আগবঢ়াই সংঘৰ উপদেষ্টা বনাচ ৰাজৱাৰে।