ডিৰাক সীমান্ত
বিস্ফোৰিত বাঘজান তৈলখাদত ভয়ংকৰ অগ্নিকাণ্ড সংঘটিত হৈছে । বাঘজানত যোৱা ২৭ মাৰ্চৰ পূৱা বি জি আৰ ৫ নং তৈলখাদ বিস্ফোৰণ হোৱা আজি চতুৰ্দশ দিনটো অপৰিবৰ্তিত অৱস্থাত নিৰ্গমন হৈ আছিল গেছ আৰু তেল ৷ বিপদাপন্ন হৈ পৰা জীৱকুল, মৎস্যকুল তথা জৈৱ-বৈচিত্ৰৰ ভাৰসাম্য ক্ৰমে শেষহৈ গৈছে ৷ বিস্ফোৰিত তেলখাদটো নিয়ন্ত্ৰণৰ বাবে ত্ৰয়োদশ দিনৰ দিনা খাদটো নিয়ন্ত্ৰণৰ বাবে চিংগাপুৰৰ পৰা অসমলৈ অহা অভিযন্তাৰ দলটোৱে বাঘজানৰ বি জি আৰ ৫ নং তৈল খাদত ভৰি দি দলটোৱে দূৰ্ঘটনা স্থলি পৰিদৰ্শন কৰি পৰিৱেশ পৰিস্থিতিৰ বুজ লৈছিল ৷ তদুপৰি অইল ইণ্ডিয়াই বিগত বাৰ দিনে যি প্ৰাথমিক চেষ্টা অব্যাহত ৰাখিছিল আৰু এইবোৰৰ পৰা তেওঁলোকৰ কিবা সুবিধা হ’বনে নাই তাক পৰ্যবেক্ষণ কৰি কালি অভিযন্তাৰ দলটোৱে বিস্ফোৰিত খাদটোৰ পৰা ওভতি গৈছিল । আজি দলটোৱে তেল সংমিশ্ৰিত গেছ নিৰ্গমণ নিয়ন্ত্ৰণ কৰিবলৈ লওঁতেই অগ্নিকাণ্ডৰ সূত্ৰপাত ঘটে বুলি জানিব পৰা গৈছে । এতিয়া জুই লেলিহান শিক্ষাই ক্ৰমে আগুৰি ধৰিছে খাদটোৰ ওচৰৰ অঞ্চল । এতিয়া ভয়ত ত্ৰস্তমান ৰাইজে গাঁও এৰি পলায়ন কৰিছে । বৃহত্তৰ অঞ্চটোৰ ৰাইজ এতিয়া নিৰাপত্তাহীনতাত ভুগিছে । অইল ইণ্ডিয়া লিমিটেড আৰু চৰকাৰে কেনেধৰণৰ প্ৰদক্ষেপ গ্ৰহণ কৰে সেয়াহে লক্ষণীয় হব ।