গুৱাহাটী মহানগৰীত সংঘটিত হৈছে ভয়ংকৰ ঘটনা।এজন অভিযন্তাৰ ডিঙি কাটি ধন লুট দুৰ্বৃত্তৰ।সংকট জনক অৱস্থাত অভিযন্তা কিশোৰ কলিতাক মঠঘড়ীয়াৰ গেট হাস্পাতালত ভৰ্তি।সম্প্ৰতি হাস্পাতালত সংকট জনক অৱস্থাত চিকিৎসা সেৱা আগবঢ়াই আছে চিকিৎসকে লোক জনক।
মঠঘড়ীয়াৰ বড়ো চকৰ বাসিন্দা কিশোৰ কলিতাই ৰেল বিভাগত অভিযন্তা হিচাপে কৰ্মৰত হৈ আছিল।সন্ধিয়া কিশোৰ কলিতাই কৰ্তব্য সমাধা কৰিবলৈ শিলচৰলৈ গৈ আছিল।মঠঘড়ীয়াৰ পৰা নুনমাটি অভিমুখে খোজ কাঢ়ি গৈ থকা অৱস্থাত ৰেল লাইনত এটা দুৰ্বৃত্তৰ দলে অভিযন্তা জনক আগছি ধৰি চোকা অস্ত্ৰৰে ডিঙি ৰেপি নগদ সাত হাজাৰ টকা, সোণৰ চেইণ আৰু মোবাইল ফোন লুট কৰি নিয়ে।তেজেৰে লুতুৰী পুতুৰী অৱস্থাত অভিযন্তা জনক স্থানীয় লোকে আৰক্ষীৰ সহযোগত সংকট জনক অৱস্থাত গেট হাস্পাতালত ভৰ্ত্তি কৰায়।ঘটনাস্থলীত আৰক্ষীৰ লোক উপস্থিত হৈ তদন্ত আৰম্ভ কৰিছে।