দৈনন্দিন বাৰ্তা
পাহাৰীয়া এলেকাত ভাৰতীয় সেনা সকলোতকৈ ভয়ংকৰ৷ এই কথা কৈছে চীনৰ এক সামৰিক বিশেষজ্ঞই৷ পৃথিৱীৰ সকলোতকৈ অভিজ্ঞ আৰু বৃহৎ মাউণ্টেইন আৰ্মি ভাৰততে আছে বুলি বিশেষজ্ঞজনে স্বীকাৰ কৰে৷ চীনৰ মডাৰ্ণ ৱেপনাৰী নামৰ আলোচনীখনৰ জ্যেষ্ঠ সম্পাদক হুয়াং গৌঝিয়ে কয়, ভাৰতৰ সকলো সেনাক পাহাৰত চলাফুৰাৰ প্ৰশিক্ষণ দিয়া হয়৷ আনকি ব্যক্তিগত খণ্ডতো বহু পেশাদাৰী আৰু অপেশাদাৰী পৰ্বতাৰোহীক নিয়োগ কৰা হয়৷ মুঠ ১২টা ডিভিজনত ২ লাখৰো বেছি ভাৰতীয় সেনা পাহাৰী এলেকাত তৎপৰ৷ চিয়াচীনতো পাঁচ হাজাৰ বেছি মিটাৰ উচ্চতাত এশৰো অধিক আউটপ’ষ্ট নিৰ্মাণ কৰিছে ভাৰতে৷ তাত প্ৰায় ৬-৭ হাজাৰ সেনা মোতায়েন কৰা আছে৷ ভাৰততে সকলোতকৈ উচ্চ ৬৭৫৯ মিটাৰতো সেনা আউটপ’ষ্ট নিৰ্মাণ কৰিছে৷ নিৰাপত্তাৰ বাবে ভাৰতে ব্যয় বঢ়াইছে৷ আমেৰিকাৰ পৰা অত্যাধুনিক যুদ্ধাস্ত্র কিনিছে৷ বায়ুসেনাৰ ওপৰত যাতে সকলো সময়তে ভৰসা নকৰে তাৰ বাবে বিশ্বৰ সকলোতকৈ পাতল ১৫৫এমএম হাউৎজাৰ এম৭৭৭ আৰু চিনুক হেলিকপ্টাৰ কিনিছে৷ তদুপৰি ভাৰতৰ হাতত আছে আমেৰিকাৰ এএইচ ৬৪ই লংবো এপাছে হেলিকপ্টাৰ৷