বোকাখাত, ২৮ ডিচেম্বৰঃঅসমৰ এমেচাৰ নাট জগতৰ এক মাইলৰ খুটি, প্ৰায় দুকুৰি বছৰীয়া বোকাখাতৰ ৰূপজ্যোতি সংঘৰ উদ্যোগত আৰু বোকাখাত নাট্যমন্দিৰৰ সহযোগত অনুষ্ঠিত ১৫ দিনীয়া নাট্য কৰ্মশালাৰ সামৰণি পৰে যোৱা ২৭ ডিচেম্বৰত। ১২ ডিচেম্বৰৰ পৰা ২৭ ডিচেম্বৰলৈ অনুষ্ঠিত নাট্য কৰ্মশালাখনিৰ সামৰণি অনুষ্ঠানৰ সভাপতিত্ব কৰে ৰূপজ্যোতি সংঘ, বোকাখাতৰ কাৰ্যকৰী সভাপতি অনন্ত হাজৰিকাই, আঁত ধৰে ৰূপজ্যোতি সংঘৰ সম্পাদক অভিলাষ বৰবৰাই। উল্লেখ্য যে লক-ডাউনে স্থবিৰ কৰি তোলা বিগত এচোৱা সুদীৰ্ঘ সময়ৰ বিৰতিৰ পাছত ১৬ ৰ পৰা ২৯ বছৰৰ যুৱ প্ৰজন্মৰ প্ৰশিক্ষাৰ্থী সকলক লৈ অনুষ্ঠিত কৰ্মশালাখনি আছিল ৰূপজ্যোতি সংঘৰ প্ৰথম পদক্ষেপ। সমগ্ৰ বোকাখাত মহকুমাটোৰ বিভিন্ন স্থানৰ পৰা অহা প্ৰশিক্ষাৰ্থী সকলক নাট্য বিষয়ক কেইবাটাও শিতানত প্ৰশিক্ষণ প্ৰদান কৰে বোকাখাতৰ যুৱ প্ৰজন্মৰ প্ৰশিক্ষক সকল ক্ৰমে তৰুণ তীৰ্থ শইকীয়া (পৰিবেশ্য কলাৰ স্নতকোত্তৰ, ডিব্ৰুগড় বিশ্ববিদ্যালয়) , অবিনাশ শৰ্মা (এন এচ ডি, চিকিম), অৰ্পিতা কাশ্যপ (পৰিবেশ্য কলাৰ স্নতকোত্তৰ, ডিব্ৰুগড় বিশ্ববিদ্যালয়) টিকেন্দ্ৰজিৎ দাস ( এন এচ ডি, চিকিম)-এ। সামৰণি অনুষ্ঠানত বিশিষ্ট অতিথি হিচাপে উপস্থিত থাকি বক্তব্য প্ৰদান কৰে ক্ৰমে বিশিষ্ট নাট্যকৰ্মী তথা বোকাখাত নাট্যমন্দিৰৰ সাংস্কৃতিক সম্পাদক বিমান বৰুৱা, প্ৰবীন নাট্যকৰ্মী মনো বৰা, বিশিষ্ট নাট্যকাৰ-কবি-সাংবাদিক অমৰ শৰ্মা, বোকাখাতৰ সংবাদসেৱী অনুষ্ঠান কাজিৰঙা নিউজ নেটৱৰ্কৰ মুখ্য সচিব তথা বিশিষ্ট সাংবাদিক প্ৰদ্যুত মহন্ত, বিশিষ্ট লোক সংগীত শিল্পী তথা বোকাখাত জে ডি এচ জি মহাবিদ্যালয়ৰ অধ্যাপক অতুল বেজবৰুৱা, ৰূপজ্যোতিৰ শুভাকাংক্ষী সদস্য তথা বিশিষ্ট নাট্যকৰ্মী মানসজ্যোতি দত্ত আদিয়ে। অনুষ্ঠানত একালত সুধাকণ্ঠ ড° ভূপেন হাজৰিকাৰ সৈতে একেলগে সংগীত পৰিবেশন কৰা বিশিষ্ট সংগীত শিল্পী জিতেন শৰ্মা ৰাজখোৱাই কথা আৰু সংগীতেৰে অনুষ্ঠান পৰিৱেশন কৰাৰ লগতে গোৱালপৰীয়া লোকগীত পৰিবেশন কৰে অতুল বেজবৰুৱাই আৰু অংশুমা শইকীয়াই ভূপেন্দ্ৰ সংগীত পৰিবেশন কৰে। অনুষ্ঠানত প্ৰশিক্ষক সকলক আনুষ্ঠানিকভাৱে একোখনিকৈ ফুলাম গামোচাৰে সম্বৰ্দ্ধনা জনোৱা হয়। সামৰণি অনুষ্ঠানটিত প্ৰশিক্ষক সকলৰ লগতে কৰ্মশালাত প্ৰাপ্ত হোৱা প্ৰশিক্ষণৰ অনুভৱ আদিৰ বিষয়ে কেইবাগৰাকী প্ৰশিক্ষাৰ্থীয়ে বক্তব্য ৰাখে আৰু সৃজনীশীল সাংস্কৃতিক অনুষ্ঠান পৰিৱেশন কৰে। অনুষ্ঠানত স্পৃহা বশিষ্ঠই একক, শ্ৰেয়া ঘোষ আৰু পূজাৰাণী ফুকনে দ্বৈত নৃত্য পৰিৱেশন কৰাৰ লগতে তন্ময় শইকীয়াই সুললিত বাঁহী বাদনেৰে অনুষ্ঠানটো জীপাল কৰি তোলে। অনুষ্ঠানতে কৰ্মশালাৰ প্ৰশিক্ষাৰ্থীসকলক কৰ্মশালাত অংশ গ্ৰহণ কৰাৰ স্বীকৃতি হিচাপে একোখনিকৈ মানপত্ৰ প্ৰদান কৰা হয়। অনুষ্ঠানত ৰূপজ্যোতি সংঘৰ শুভাকাংক্ষী সদস্য তথা বোকাখাত উচ্চতৰ মাধ্যমিক বিদ্যালয়ৰ বিষয় শিক্ষক ধীৰেণ শৰ্মা, বিশিষ্ট নাট্যকৰ্মী তথা বোকাখাত নাট্যমন্দিৰৰ উপ-সভাপতি দুলাল ডেকা, ৰূপজ্যোতি সংঘৰ সাহিত্য উপদেষ্টা তথা কবি-সাংবাদিক অজন্তা তালুকদাৰ, ৰূপজ্যোতি সংঘ আৰু বোকাখাত নাট্যমন্দিৰৰ উপদেষ্টা, বিষয় ববীয়াৰ লগতে ৰূপজ্যোতিৰ যুৱ প্ৰজন্মৰ সদস্য ক্ৰমে প্ৰাচুৰ্য শৰ্মা, ৰূপম বাহেক, নুপূৰ বৰা, হৃষিকেশ শৰ্মা, ৰাহুল আচাৰ্য, আকাশজ্যোতি শইকীয়া আদি, অভিভাৱকসকল আৰু বহু সংখ্যক স্থানীয় গণ্যমান্য ব্যক্তি উপস্থিত থাকে।
