পশ্চিম কামৰূপ, দক্ষিণ বৰপেটাৰ সাপ্তাহিক বজাৰ সমুহত ধোঁৱাচাঙত ক’ভিড নীতি-নিয়ম ,ক্ৰেতা-বিক্ৰেতাৰ ভিৰে চিন্তিত কৰি তুলিছে সচেতন মহলক

ৰাজ্যৰ বিভিন্ন প্ৰান্তৰ লগতে পশ্চিম কামৰূপ আৰু দক্ষিণ বৰপেটাত ব্যাপক হাৰত কৰোনা সংক্ৰমণ বৃদ্ধি পোৱাৰ পিছতো যেন গা লৰা নাই একাংশ লোকৰ। জানিব পৰা মতে নগৰবেৰা ব্লক প্ৰাথমিক স্বাস্থ্য কেন্দ্ৰৰ অন্তৰ্ভুক্ত অঞ্চল সমুহত যোৱা ১০ এপ্ৰিলৰ পৰা ৭ মেলৈকে ২৮৮ জন ব্যক্তি কভিড পজিটিভত আক্ৰান্ত হোৱাৰ পাছতো পশ্চিম কামৰূপৰ বিভিন্ন সাপ্তাহিক বজাৰ সমুহত শ শ  ক্ৰেতা-বিক্ৰেতাৰ ভিৰে চিন্তিত কৰি তুলিছে সচেতন মহলক। স্থানীয় প্ৰশাসনৰ লগতে আৰক্ষী প্ৰশাসনে সৰ্বসাধাৰণ লোকক সাৱধানতা অৱলম্বন কৰিবলৈ বাৰম্বাৰ আহ্বান জনোৱাৰ পিছতো যেন ভ্ৰূক্ষেপ নাই একাংশৰ। আবেলি ২ বজালৈ দোকান পোহাৰ খোলা থকাৰ সুযোগ গ্ৰহণ কৰি সাপ্তাহিক বজাৰ সমুহত ক্ৰেতা-বিক্ৰেতাৰ অভাৱনীয় ভিৰে বৃহত্তৰ অঞ্চলটোত কৰোনা সংক্ৰমণ ব্যাপক হাৰত বৃদ্ধি পোৱা বুলি ব্যক্ত কৰিছে একাংশ সচেতন লোকে। জানিব পৰা মতে পশ্চিম কামৰূপৰ সোণতলী, ৰাংগাপানী, বদলা, টুপামাৰী, ভখুৰাদিয়া, কিচমতকাঠমি, ডেকাচাং, বালিঝাৰ, বামুণবড়ী, নগৰবেৰা, মালিবাৰী, বিদ্যানগৰ, কল্যাণপুৰ আদিকে ধৰি বহু হাট-বজাৰত শ শ  লোকে কিনা বেচা কৰিছে যদিও বজাৰ সমুহত নাই কোনো সামাজিক দূৰত্ব, বহুতে মাস্ক পৰিধান নকৰা পৰিলক্ষিত হৈছে। ইপিনে একেই অৱস্থা দক্ষিণ বৰপেটাৰ চৰ-চাপৰি অঞ্চলৰ সাপ্তাহিক বজাৰ সমুহতো। দক্ষিণ বৰপেটাৰ দক্ষিণ প্ৰান্তৰ কাছুমাৰা-আণ্ডাভাংগা, মৈৰাদিয়া, খোলাবান্ধা জনপ্ৰিয় বজাৰ, আলোপতি মাজৰচৰ, খাটিয়ামাৰী, বাঘমাৰাচৰ, সুখোৱাৰঝাৰ , ছয়সীমানা, উজিৰৰচৰ, কাৰাইখাইতি আদি বজাৰ সমুহত শ শ  ক্ৰেতা-বিক্ৰেতাই ন্যূনতম কভিড নীতি মানি চলা পৰিলক্ষিত হোৱা নাই। এনে পৰিস্থিতিত বৰপেটাৰ চৰ-চাপৰিতো অস্বাভাৱিক ভাৱে বৃদ্ধি পাবলৈ ধৰিছে কৰোনা সংক্ৰমণ। দুয়োটা অঞ্চলত উদ্বেগজনকভাৱে কৰোনা সংক্ৰমণ বৃদ্ধি পোৱা ঘটনাৰ প্ৰতি লক্ষ্যৰাখি জিলা প্ৰশাসনৰ লগতে স্থানীয় আৰক্ষী প্ৰশাসনক অধিক কঠোৰ হবলৈ দাবী জনাইছে সচেতন মহলে।