অনলাইন বাৰ্তা, ১৫ ডিচেম্বৰ: মহানগৰীৰ গান্ধী মন্ডপ পথৰ বিকল ষ্ট্ৰীট লাইটে সন্ধিয়া অন্ধকাৰচন্ন কৰি তুলিছে শৰনীয়া পাহাৰ ৷ ২অক্টোবৰ গান্ধী জয়ন্তী উপলক্ষে মহানগৰ জিলা প্ৰশাসন – গুৱাহাটী পৌৰনিগমে গান্ধী মন্ডপৰ বৃহত্তৰ অঞ্চল সজাইপৰাই ৰঙীল কৰি তোলে ৷ অনুষ্ঠান শেষ হোৱাৰ পিছৰ পৰা এবাৰো চোৱাৰ আহৰি নাই জিলা প্ৰশাসন তথা গুৱাহাটী পৌৰনিগমৰ ৷ স্হানীয় ৰাইজৰ অভিযোগ অনুসৰি গান্ধীজয়ন্তী উদযাপনৰ মাত্ৰ দুই তিনিদিন আগতে ষ্ট্ৰীট লাইট সমুহ মেৰামতি কৰি পোহৰায় তোলা হৈছিল শৰনীয়া পাহাৰ ৷ কিন্তু এমাহ পাৰ নহোতেই ষ্ট্ৰীট লাইট সমুহ বিকল হোৱা দেখা গৈছে ৷ ইয়াৰ বাবেই বৃহত্তম এলেকাত সন্ধিয়াৰ পৰা অন্ধকাৰচন্ন হৈ পৰে ৷ একাংশ স্হানীয় ৰাইজে জনোৱা মতে শৰনীয়া মুল পথৰ পৰা গান্ধীমন্ডপ যোৱা পথচোৱাত মাত্ৰ ১০-১২ ষ্ট্ৰীট লাইট সন্ধিয়াৰ ভাগত জ্বলে যদিও বাকী লাইট সমুহ সম্পূৰ্ণ বিকল ৷ এনেক্ষেত্ৰত গান্ধী মন্ডপ দৰ্শন কৰিব অহা বিভিন্ন স্তৰৰ ব্যক্তিসকলে সন্ধিয়া সময়ত লাইটৰ অভাবত যঠেষ্ট অসুবিধাৰ সন্মুখীন হৈ আহিছে ৷ সন্ধিয়া আন্ধাৰৰ সুযোগ গ্ৰহন কৰি এচাম যুৱক – যুৱতীয়ে নিশালৈ আদ্দাস্হলীত পৰিনত কৰিছে গান্ধীমন্ডপ অঞ্চল ৷ আন একাংশই সন্ধিয়া হলেই মুকলি মুৰীয়াকৈ মদ,ভাং খোৱা পৰিলক্ষিত হৈছে ৷ সন্ধিয়া ভ্ৰমন কৰিবলৈ অহা নাগৰিক সকলৰ একাংশই জানিবলৈ দিয়ে যে মদ ভাং অসামাজিক কাৰ্য্য স্হলীত পৰিনত হৈছে বৃহত্তৰ গান্ধী মন্ডপ অঞ্চল ৷ ইয়াৰ বাবেই অতি শীঘ্ৰেই ষ্ট্ৰীট লাইট সমুহ মেৰামতিৰ বাবেই গুৱাহাটী পৌৰনিগম তথা জিলা প্ৰশাসনৰ ওচৰত দাবী জনাই ৷
